Read Falam Chin KOLOSE 1 Bible Online

KOLOSE 1 - Falam Chin bible

KOLOSE 1

¹Kolose khua ih a ummi Pathian minung, Khrih thawn nan pehzom awknak ruangah rinsan tlak a si mi Khristian unau pawl nan hnenah,

²Pathian lungkimnak in Khrih Jesuh ih tirhthlah a si mi keimah Paul le Khrih sungah kan unau a si mi Timote in ca kan lo kuat. Pathian kan Pa in thlawsuahnak le daihnak lo pe hram seh.

³Nan hrangih thla kan cam tik poh ah kan Bawipa Jesuh Khrih ih Pa le kan Pathian hnenah lungawinak thu kan sim ringring.

⁴Ziangahtile Khrih Jesuh nan zumnak le Pathian minung pawl hmuahhmuah hnenah duhdawtnak nan neih kha kan rak theih ruangah a si.

⁵A dikmi Thuthang ṭha nan hnenih a ra thlen pek ah ziang bangtuk in ruahsannak a lo pek ti cu nanmah in nan thei. Curuangah rinnak le duhdawtnak cu vancungah nan hrangah himte in a lo retsakmi nan ruahsannak parah hram an bun a si.

⁶Pathian zaangfahnak nan rak theih hmaisa bik ni ihsin thokin atu tiang a si bangtuk in, Thuthang ṭha in thlawsuahnak cu nan hnenah a thlenpi ih leitlun khuazakipah a karh zaiter a si.

⁷Pathian zaangfahnak cu Epafras hnen ihsin nan theihmi a si. Amah cu kan duhdawtmi kan hnaṭuanpi, kan ai-ah[1] rinsan tlak zetin Khrih riantu khal a si.

⁸Amah in Thlarau ih a lo pekmi duhdawtnak nan neihmi thu tla in sim.

⁹Hi bangtuk in nan thuhla kan theih vete in nan hrangah thla kan cam ringring. Pathian in amah ih duhnak theih theinak le Thlarau ih pekmi fimnak le theihthiamnak in lo khatter dingah Pathian kan dil a si.

¹⁰Cuticun Bawipa ih duhnak vekin nan nung thei ding ih amah lungtong zawng kha nan tuah ringring thei ding. Cule nan nunnak in rah ṭha a phunphun a rah ding ih Pathian nan theihnak ahcun nan ṭhang vivo ding.

¹¹Ziang hmuahhmuah kha thinsaunak thawn nan tuartheinak dingah Pathian sunlawinak ihsin a ra suakmi a thazaang in lo cakter hram seh.

¹²Tleunak ram sungah Pathian in a mi thianghlim pawl hrangih a retmi kha a cotu si ve dingin a lo sersiamtu Pa Pathian cu lungawi in thangṭhat uh.

¹³Amah in kannih in uktu thimnak huham sung ihsin in runsuak ih a Fahniang uknak sungah in luhpi zo;

¹⁴a Fapa thawngin sual ngaidamnak kan ngah ih miluat kan si zo.

¹⁵Khrih cu hmuh theih lomi Pathian ih hmuihmel langnak a si. Amah cu Fapa tir a si ih siammi thil hmuahhmuah hnakin a cungnung a si.

¹⁶Ziangahtile Pathian in Khrih sung ihsin ziangzongza vancung le leilung tlunah siseh, hmuh theimi le hmuh thei lomi siseh, thlarau lam cahnak huham neitu le bawi le uktu pawl le thuneitu pawl siseh a tuah. Pathian in van le leilung ziang hmuahhmuah Khrih sungin a tuah ih Khrih hrangah finkhawm ṭheh dingin a tuah a si.

¹⁷Khrih cu ziang hmuahhmuah hlanah a rak um zo ih amah thawn an pehzom awknak thawngin ziangzongza cu umnak hmun an nei cio.

¹⁸Kawhhran cu Khrih ruangpum a si ih Khrih cu a lu a si. A pumsa ruangpi nunnak hram cu amah Khrih a si. Amah cu Fapa tir a si ih ziang hmuahhmuah lakah cungnung bik a si ringringnak dingah thihnak ihsin thawhter sal a si zo.

¹⁹Fapa in amah ih sungah Pathian sinak famkimih a neihnak cu amah Pathian ih lairelnak in a si.

²⁰Cuticun a Fapa sung ihsin lei le van pumpuluk cu Pathian in a hnenah kirter sal a duh. Pathian in a Fapa thinglamtah parih a thihnak ruangin lei le vanih ummi thil hmuahhmuah thawn remnak a tuah ih cutiin a hnenah a hruaikir sal a si.

²¹Hlanah cun thil ṭha lo nan tuah ruangah le nan ruah ruangah Pathian thawn nan rak hlaat aw ih a ral nan rak si.

²²Sikhalsehla atu-ah cun a Fapa taksa ruangpum rori in thihnak a tuarnak ruangah Pathian in a rualpi-ah a lo tuah zo. Cutiih remnak a tuahnak cu mi thianghlim, mawhnak nei lo le soiselnak um loin a hmaika ih thlenter a lo duh ruangah a si.

²³Cuti a si ruangah nan hramṭoh-nak a hngetmi parah khan fekzetin zumnak thawn ding ringring uh. Thuthang ṭha nan theihnak ihsin nan co ngahmi ruahsannak thawn zohman in lo ṭhen hlah hai seh. Hi Thuthang ṭha hrangah keimah Paul hi hnaṭuantu ka si ih, leilung tlun khuazakip mi hmuahhmuah hnenih simmi Thuthang ṭha a si.

²⁴Nan hrangah harsatnak ka tuarmi pawl ruangah hin lungawinak ka nei; ziangahtile ka taksa-ih ka tonmi tuarnak ruangah Khrih in a ruangpum a si mi kawhhran ai ah tuarnak a tonmi kha ka kimter ve a si.

²⁵Kei cu Pathian in kawhhran hnaṭuantu ah i tuah zo. Hi hnaṭuan i pekmi cu nanmah ih ṭhathnemnak dingah a si. Cumi cu Pathian thuthang famkim zetih phuan kha a si ih,

²⁶cuih thuthang cu san tampi sung zo miphun hnen hmanah phuang loin thuhmi a rak si ih atu lawngah a minung hnenah phuanmi Thuthang ṭha a si.

²⁷Pathian tumtahmi cu mi hmuahhmuah hrangah a rak ruah ciami a sunglawi le mangbangza a si mi thuthup cu atu-ah a minung pawl hnenih langter ding kha a si. Cule cuih thuthup cu nan sungih a ummi Khrih hi a ti duhmi a si ruangah Pathian sunlawinak kha nan ṭawm ve ding, tinak a si.

²⁸Curuangah zozo hnen khalah Khrih cu kan phuang a si. Mikip hnenah fimnak kan neihmi hmuahhmuah hmangin ralrinnak thu kan sim ih kan zirh. Cuti kan tuahnak cu zozo khal Khrih thawn an pehzom awknak sungin Khristian pitling si in Pathian hmaiih thlenpi kan duh ruangah a si.

²⁹Himi tuahsuak dingah amah Khrih in i pekmi, ka sungih nasa zetin hna a ṭuantu, cahnak hmangin ka ṭuan ciamco a si.