Read Falam Chin KOLOSE 3 Bible Online

KOLOSE 3 - Falam Chin bible

KOLOSE 3

¹Nannih cu nunnak ah Khrih thawn thawhter nan si zo ruangah Pathian vorhlam kap Khrih tonak vancung khua ih thil ah khin nan thinlung bun uh.

²Leilung tlun thil pawl ruat loin vancung thil pawl khi ruat sawn uh.

³Ziangahtile nan thi zo ih nan nunnak taktak cu Khrih thawn Pathian sungah thuh-in a um a si.

⁴Cuih nan nunnak taktak cu Khrih kha a si ih amah a lang tikah nannih tla amah thawn nan langtlang ding ih a sunlawinak nan ṭawm ve ding a si.

⁵Nan sungih hna a ṭuantu leilung pumsa duhnak: nupa sualnak le zoh mawi lo nuncan, taksa hiarnak le hurnak le hamṭamnak pawl tla cu nunter nawn hlah uh. (Hamṭamnak tla cu milem biak phunkhat a si.)

⁶Hi bangtuk in thilsual an tuah ruangah Pathian thinhengnak cu cutiih a thu a thlun lotu pawl parah[3] a ra thleng ding.

⁷Tuih hlanah cun nanmah hrimhrim tla hi cubangtuk taksa duhnakih ukmi nan rak si ih tisa hiarnak sungih a nungmi nan rak si.

⁸Sikhalsehla atu-ah cun cubangtuk taksa duhnak cu nan hlonfai ṭheh a ṭul: thinhengnak, aithawhnak le mi mitkemnak pawl cu hnong thlang uh. Mi hmuhsuamnak ṭong siseh, ṭongsia siseh, nan kaa sungin nan suahter lo pei.

⁹Nan nun hlun nuncan ziaza cu nan phuak zo ruangah pakhat le pakhat bum aw nawn hlah uh;

¹⁰cule nun thar ziaza nan hruk aw zo ih cuih nun thar cu a siamtu Pathian in amah ih hmuihmel keng sinsin vivo dingin cat loin a tharter ringring. Cutiih a tharternak cu amah famkim zetih nan theihsuaknak ding hrangah a si.

¹¹Cuti a si ruangah, Zentail mi le Judah mi tiin siseh, serhtan le tanlo ti in siseh, mi aa phun ti le ziangthu hman thei lo ramsa phun,[4] sal pawl tile miluat pawl tiih thleidan awknak a um nawn lo; Khrih lawng hi ziangzongza a si ih ziang hmuahhmuah sungah a um a si.

¹²Nannih cu Pathian ih minung nan si; a lo duhdawt hai ih amah ih hrangah a lo hrilmi nan si. Curuangah zawnruahnak, zaangfah thinpemnak, tangdornak, thinlung nemnak le thinsaunak pawl cu hnipuan bangtuk in hruk uh.

¹³Pakhat le pakhat karah thinlung hmuh-awk lonak le phunzainak a um ahcun pakhat le pakhat zawi-awk theinak le ngaidamnak nei uh. Bawipa in a lo ngaidam vekin nannih tla pakhat le pakhat ngaidam aw ve uh.

¹⁴Cule hibangtuk ziaza ṭha nan neihmi tlunah duhdawtnak beetcih uh; ziangahtile duhdawtnak cu ziangtinkim famkim zetih a finkhawmtu le rem ṭhepṭhep ih a tuahtu a si.

¹⁵Khrih ih a lo pekmi daihnak cu thu nan ruah nan relcatnak kipah a lo hotu-ah tuah uh; ziangahtile hi daihnak sungih um dingah Pathian in taksa ruang pakhat sungah a lo kawhmi nan si. Cule lungawi aipuang in um uh.

¹⁶Khrih Thuthang ṭha cu nan thinlung sungah a tlamtlinnak phunzakip thawn cam ringring seh. Fimnak phunzakip thawn pakhat le pakhat zirh-aw in nunsim aw uh. Hlanawknak hla, thangṭhatnak hla le hla thiang pawl sa uh. Nan lungawinak hla in Pathian kha thangṭhat uh.

¹⁷Kan Pa Pathian cu Khrih sungin nan thangṭhat ruangah, ziang hmuahhmuah nan tuah ah siseh, nan simah siseh, Bawipa Jesuh hmin in tuah uhla sim uh.

¹⁸Nupi pawl, nan pasal thu ngai uh; ziangahtile Khristian nan si vekin cumicu nan tuah dingmi a si.

¹⁹Pasal pawl, nan nupi duhdaw uhla an hnenah awkam saang hmang hlah uh.

²⁰Nauhak pawl, Khristian nan si ruangah ziangtinkim ah nan nu le nan pa thu ngai uh. Cumi cu Pathian lungawitertu a si.

²¹Nu le pa pawl, nan faale kha an thinhengter hlah uh; an thin a nau tata pang ding.

²²Salle pawl, ziangtinkim ah nan bawi pawl ih thu ngai uh. An mithmuh lawngah an lungkim seh tiin an thu ngai si loin, Bawipa nan ṭihzah ruang sawn ah nan thinlung taktein an thu cu ngai uh.

²³Ziang hmuahhmuah nan tuah tinkim ah milai hrangah si loin Bawipa hrangah kan ṭuan ti thinlung nei in nan thinlung taktein ṭuan uh.

²⁴Cule Bawipa in a minung pawl hrangih a ret ciami ṭuanman cu ro ah in pe ding, ti kha ciing ringring uh. Nan rianmi Bawi ngaingai cu Khrih lawng a si.

²⁵Cule zozo khal thilsual a tuahtu cu a thilsual tuahman a ngah ve ding; ziangahtile Pathian cun thu a rel tikah thleidannak zianghman a nei lo.