Read Falam Chin 1 THESALON 1 Bible Online

1 THESALON 1 - Falam Chin bible

1 THESALON 1

¹Paul, Silas le Timote in, Thesalonika khua ih a ummi kawhhran, Pathian kan Pa le Bawipa Jesuh Khrih ih ta a si mi, nan hnenah ca kan lo kuat. Pathian zaangfahnak le daihnak cu nan hnenah um hram seh.

²Nanmah ih ruangah Pathian cat loin kan thangṭhat ih kan thlacamnak in kan lo ciing ringring a si.

³Ziangtin tile nan zumnak cu nitin nan nuncan daanih a langnak thu, duhdawtnak nan neih ruangah nasa zetih hna nan ṭuannak thu le kan Bawipa Jesuh Khrih sungih ruahsannak nan neihmi a hnget daan pawl thu thlacamnak in kan Pa Pathian hnenah kan sim ringring.

⁴U le nau pawl, Pathian in a lo duhdawt ih amah ih minung si dingah a lo hril, ti kan thei a si.

⁵Ziangahtile Thuthang ṭha nan hnen kan thlenpi tikah ṭongkam men lawng si loin cahnak huham le Thlarau Thianghlim le thutak a sinak theihfelnak thawn kan thlenpi a si. Nan hnenih kan um sungah ziangbangtuk in kan um kan tlang a si, ti cu nan thei; nanmah ih ṭhatnak hrangah a si.

⁶Kan nundaan le kan Bawipa nundaan nan cawng ih harsatnak tampi nan tong naón Jesuh Khrih ih thu cu Thlarau Thianghlim hnen ihsin a rami lungawinak thawn nan pom a si.

⁷Curuangah nanmah cu Masidonia le Akhaia[1] pengih a ummi zumtu Khristian pawl hrangah zohṭhim tlakmi nan si.

⁸Ziangahtile Bawipa ih thu cu nanmah ih hnen ihsin Masidonia le Akhaia peng khuazakip ah a thlen lawng si loin Pathian nan zumnak thu cu khuaza ramkipah a thang a si. Kanmah ih sim rero hman a ṭul lo.

⁹Nan zumnak thuhla a rak theitu pawl hmuahhmuah in kan lo tlawn laiih in rak cohlan zia, milem pawl nan tlansan ih Pathian nan pan zia, a dikmi le a nungmi Pathian rian dingih nan pan zia tla an sim ih,

¹⁰vancung ihsin a Fapa a ratnak ding nan hngahnak khal an sim a si. A Fapa Jesuh cu thihnak ihsin a thawhtermi le a ra dingmi Pathian thinhengnak ihsin in runsuaktu a si.