Read Falam Chin 1 THESALON 4 Bible Online

1 THESALON 4 - Falam Chin bible

1 THESALON 4

¹A netnak ah u le nau tla, Pathian duhzawng ih nan nun theinak dingah ziangtin nun ding a si ti cu kan hnen ihsin nan zir zo. Cuvek ih nan nun thei sinsinnak dingah Bawipa Jesuh hmin in kan lo forh a si.

²Ziangahtile Bawipa Jesuh hnen ihsin a rami thupekmi vekin kan lo zirhmi a si cu nan thei.

³Pathian in nannih cu nupa sualnak tuah hrimhrim loin thianghlim dingah a lo duh.

⁴Mipa pawl, nan nupi thawn[2] thianghlim le zoh mawi in um uh;

⁵Pathian thei lo khawvel mi bangin taksa hiarnak thlun in nung hlah uh.

⁶Hi thu-ah hin Khristian nan unau pawl hmuhsuam in zawmtai hlah uh. Hi bangtuk cu tuah lo dingah kan lo sim zo ih atu-ah napi in ralrinnak kan lo pe: hibangtuk a tuahtu pawl cu Bawipa in a hrem ding.

⁷Pathian in nupa sualnak tuah dingah in ko lo, thianghlim dingah in ko sawn a si.

⁸Curuangah hibangtuk thuzirhnak a thlun duh lotu cu minung ih thu a el a si lo, Thlarau Thianghlim a lo petu Pathian ih thu a el a si.

⁹Zumtu unau pawl duhdawt ding thu-ah cun ca ngan a ṭul nawn lo. Pakhat le pakhat nan duhdaw aw pei, tiah Pathian in nanmah rori a lo zirh zo ih,

¹⁰Masidonia ramih a ummi nan unau pawl parah cubangtuk in nan nungcang zo. U le nau tla, cu hnakih ṭha sinsin in nungcang dingah kan lo forhfial duhmi a si.

¹¹Kan lo sim cia zo vekin daiteih nun kha tumtah uhla nanmahte nan hnaṭuan fingfing kha ṭuan in nan pumcawmnak hlawh fingfing uh.

¹²Cuticun Pathian a zum lotu pawl ih upat le zohsonak nan co ding ih nan ṭulnak ah midang rinsan rero a ṭul lo ding.

¹³Ka u le ka nau tla, beiseinak zianghman nei lo ih riahsia-in a ummi pawl vekin nan um lonak dingah, a thi ciami pawl ih thuhla-ah thutak nan theih ding hi kan duh a si.

¹⁴Jesuh cu a thi ih a thosal ti kan zum; curuangah Jesuh zum ih a thimi cu amah thawn hmun khatah Pathian in a thoter ding ti kan zum.

¹⁵Atuih kan lo zirhmi hi kan Bawipa ih zirhmi a si: kan Bawipa a rat sal tikah kannih a nungmi pawl hi a thi ciami pawl ih hlanah kan feh hmaisa lo ding.

¹⁶Van ihsin Bawipa ih thupeknak aw a thang ding, van ih vanmi upabik au-nak aw a si ding, Pathian ih tawtawrawt aw-thawng a thang ding ih Bawipa cu vancung ihsin a rung ṭum ding. Khrih a zumtu a thi ciami pawl an tho hmaisa ding;

¹⁷cule kannih a nunglai mi pawl in vanah Bawipa cu a tho hmaisa pawl thawn mero lakah kan hmuak ding. Cuticun Bawipa thawn kumkhua in kan umtlang ding.

¹⁸Curuangah hi thu in pakhat le pakhat hneem aw uh.