Read Falam Chin 1 THESALON 5 Bible Online

1 THESALON 5 - Falam Chin bible

1 THESALON 5

¹U le nau tla, Bawipa ih ratnak ding ni le caan, ziangtikah a si ding, ti thu ahcun nan hnenah ca kuat a ṭul lo.

²Ziangahtile nanmah rori in Bawipa ih ratsalnak Ni cu zan ih fifir rat bangin a ra ding, ti fiangtein nan thei.

³Mi in, “Daihnak le himnak a um,” an ti laifangah nunau in nauhrinnat a tuar bangin rinlopi ah siatralnak an parah a thleng ding ih zohman an luat lo ding.

⁴Sikhalsehla u le nau tla, nannih cu khawthim sung ummi nan si lo ruangah cuih Ni in zanih fifir bangin nan rin lo laiah lo man hlah seh.

⁵Nannih cu nan zate in tleunak sung ummi nan si; sun minung nan si. Thimnak sungmi kan si lo; zanih minung khal kan si lo.

⁶Curuangah midang pawl bangin itthat ding kan si lo; itthat loin fimhringtein a nung dingmi kan si.

⁷Minung cu zanah an itthat; zanah zu an ri.

⁸Sikhalsehla kannih cu sunih mi kan si ih fimvar zetih a um ding kan si. Curuangah zumnak le duhdawtnak cu ṭaangphaw ai-ah hmang in kan ruahsanmi rundamnak cu thirlukhuh ai-ah hmang uhsi.

⁹Pathian in a thinhengnak tuarter dingah in hril lo; sikhalsehla kan Bawipa Jesuh Khrih sungin rundamnak co dingah in hril a si.

¹⁰Kan Bawipa cu a ratsal tikah kan rak nunah siseh, kan rak thih zo khalah siseh, amah thawn umtlang dingah kan ai-ah a thi a si.

¹¹Curuangah atuih nan tuah rero zo bangin pakhat le pakhat thazaang pe aw-in bawm aw uh.

¹²Ka u le ka nau tla, Khristian nitin nan nunnak ah a lo hotu le a lo zirhtu pawl, nan lakah hna a ṭuantu pawl kha upat hmaizahnak pe uh, tiah kan lo forh.

¹³Nan hrangih hna an ṭuan ruangah hmaizahnak a saang bik le duhdawtnak pe hai uh. Nanmah lakah daite le rem-awtein um uh.

¹⁴U le nau tla, zaangzel pawl kha ralrinnak pe uh, thinnau mi pawl an ral ṭhatter uh, a derdaimi pawl bawm uhla mikip parah thinsau in um uh, tiah kan lo forh.

¹⁵Zohman in ṭhat lonak cu ṭhatlonak in lehrulh ding a si lo; sikhalsehla pakhat le pakhat parah siseh, mi hmuahhmuah parah siseh, ṭhatnak tuah tum ringring uh.

¹⁶Cat loin nan lungawi uh;

¹⁷thlacam ringring uh.

¹⁸Ziangvek dinhmun khalah lungawi thu sim uh. Cucu Khrih Jesuh ah Pathian ih a lo duhsakmi a si.

¹⁹Thlarau Thianghlim kha hmit hlah uh;

²⁰profet thusim thiamnak kha nautat hlah uh.

²¹Ziang hmuahhmuah hniksak hmaisa uh; a ṭhami asile pom uhla,

²²a ṭha lomi hmuahhmuah in hnong uh.

²³Daihnak in petu Pathian amah in famkim zetin lo thianghlimter sehla, kan Bawi Jesuh Khrih a ratsal tikah nan thlarau, nan thinlung le nan taksa, nan ziangzongza in mawhnak nei lo ah lo tuah hram seh.

²⁴Nannih a lo kotu cu rinsan tlak a si ruangah cumicu a tuah ding a si.

²⁵U le nau tla, kannih hrang khalah thla in cam sak ve uh.

²⁶Zumtu unau pawl kha a thianghlimmi hnamnak thawn cibai buk uh.

²⁷Kan Bawipa ih thupeknak in hi cakuat hi zumtu hmuahhmuah hnenah rak siarsak uh tiah ka lo forh a si.

²⁸Kan Bawipa Jesuh Khrih zangfahnak cu nan parah um hram seh.