Read Falam Chin JOSHUA 11 Bible Online

JOSHUA 11 - Falam Chin bible

JOSHUA 11

¹Israel in ral an nehnak thu pawl cu Hazor siangpahrang Jabin in a rak theih tikah Madon siangpahrang Jobab, Shimron khua siangpahrang, Akshaf khua siangpahrang,

²saklam tlang par siangpahrang pawl, Galilee Tili ihsin thlanglam ih ummi Jordan horkuam siangpahrang pawl, tlanghram hmunrawnih ummi siangpahrang pawl le nitlaknak lamih Dor kiangkap siangpahrang pawl thu a cah.

³Cun Jordan tiva kap hnih ih a ummi Kanaan mi pawl, Amor mi pawl, Hit mi pawl, Periz mi pawl, tlangpar ramih ummi Jebus mi pawl, le Mizpah ram Hermon Tlang hram hrawngih ummi Hiv mi pawl a cah thluh.

⁴A cah vekin an ra ih an ralkap pawl cu tifinriat kap ih vunnel zat an si. Rang le rangleng tampi an keng.

⁵Hi siangpahrang pawl cun an ralkap pawl an finkhawm ih Israel do dingah Merom ih ummi Merom Cerh timi kapah an tong khawm aw.

⁶Cutikah BAWIPA in Joshua hnenah, “ṭih hlah. An zatein thaisun atu tikcu-ah Israel kut sungah ka lo pe ding ih an thi thluh ding. An rang pawl ih kaizatha cu sat cat awla an rangleng pawl cu meisa in ur thluh aw,” tiah a ti.

⁷Curuangah Joshua le a ralkap pawl cun an rin lo laiah Merom Cerh kiang ahcun an do ciamco.

⁸BAWIPA in nehnak cu Israel kut sungah a pek ih an nam tikah an neh ih saklam ah a ummi Sidon le Misrefoth Maim tiang, nisuahnak lamah Mizpah horkuam tiang, an ral pawl cu an dawi. Minung pakhat hman taang nawn lo tiangin an that thluh a si.

⁹BAWIPA ih thupekmi bangtuk in Joshua cun an rang pawl ih kaizatha cu a sat cat ih an rangleng pawl cu meisa in a ur ṭheh.

¹⁰Cule Joshua cu a kir sal ih Hazor khua a neh ih an siangpahrang bawipa tla a that. A cuih san ahcun Hazor khua siangpahrang cu siangpahrang ukmi pawl lakah an hotu bik a si.

¹¹Hazor khawsung mi pawl cu pakhat hman taang loin an that thluh ih an khua khal an ur ṭheh.

¹²Cutawk hrawngih siangpahrang pawl le an khawpi pawl cu Joshua in a neh thluh. BAWIPA ih siahhlawh Moses ih thupeknak bangtuk in Joshua cun a that thluh hai a si.

¹³Sikhalsehla tlang fatete parih an tohmi khua lakah Joshua ih urmi Hazor khua siar lo khawpi dang pakhat hman Israel mi in an ur lo.

¹⁴Hi khawpi pawl ihsin an lonmi thil mankhung le ṭilva pawl hmuahhmuah cu Israel mi pawl in anmah ih hrangah an lak. Asinain minung cu an zatein an that thluh; pakhat hman an luat lo.

¹⁵BAWIPA Pathian in a siahhlawh Moses hnenah thu a pek ih Moses in Joshua hnenah cuih thu cu a pek; acuih thu bangtuk in Joshua cun a thlun ṭheh. Moses hnenih BAWIPA ih thupekmi bangtuk in Joshua cun a tuah thluh a si.

¹⁶A cuih ram cu Joshua in a neh thluh: tlangpar ram, Negev ram hmuahhmuah, Goshen ram hmuahhmuah, nitlaklam tlanghram, Jordan phairawn, Israel ram sungih tlangpar ram le hmunrawn pawl,

¹⁷Seir ram lamih a hungfehmi Halak tlang ihsin Hermon Tlang thuai ih a ummi Lebanon Phairawn ram sungih Baal Gad tiang a neh thluh. Hi ramih siangpahrang pawl cu a kaih hnuah a vuak ih a that hai.

¹⁸Caan reipi hi siangpahrang pawl cu a do.

¹⁹Gibeon khua ih a ummi Hiv mi pawl siar lo, khui khua hman in Israel mi thawn remnak thukam an tuah lo. An zatein do-awk hnu lawngih nehmi an si thluh.

²⁰Zaangfahnak zianghman um loin thah thluh le siatsuah thluh an sinak dingah an thinlung cu Israel mi do dingah BAWIPA in a khohter. Cutiih tuah dingah BAWIPA in Moses cu a rak tiam cia zo a si.

²¹A cuih caan ah tlangpar ramih a ummi: Hebron khua, Debir khua, Anab khua le Judah le Israel tlangpar ram pawl ih a ummi, mitum zetzet Anak mi pawl cu Joshua in a that thluh. An minung pawl an ci in a mihter ih tlunah an khawpi pawl tla a siatsuah thluh a si.

²²Israel ram sungah Anak mi pakhat hman an taang nawn lo. Asinain Gaza, Gath le Ashdod khua ahcun malte an taanglai a si.

²³BAWIPA in Moses hnenih thu a pek bangtuk in acuih ram pumpuluk cu Joshua in a neh thluh. Cule acuih ram cu Joshua in anmah ih comi ro si dingah Israel mi hnenah a pek; Israel miphun zat in ram cu a ṭhen ih ṭhen khat fingfing a pek a si. Cuticun an ram cu ral nei loin a cawl.