Read Falam Chin JOSHUA 13 Bible Online

JOSHUA 13 - Falam Chin bible

JOSHUA 13

¹Joshua cu a tarzet thlang. BAWIPA Pathian in, “Na tarzet thlang; asinain neh dingmi ram tampi a um lai.

²Neh hrih dingmi ram pawl cu: Filistin ram hmuahhmuah le Geshur ram hmuahhmuah,

³Izipt ramri ih a ummi Shihor tiva ihsin saklam ih Ekron ramri tiang a zatein Kanaan mi ramah siar a si; Filistin mi uktu pawl cu Gaza, Ashdod, Ashkelon, Gath le Ekron khua pawl ah an um; thlanglam ah Avvim peng hmuahhmuah,

⁴Kanaan mi ram, le Mearah peng (Mearah cu Sidon mi ram a si), Amor ramri kiangih a ummi Afek tiang;

⁵Gebal ram, nisuahnak lamah Lebanon ram hmuahhmuah, Hermon Tlang hramih a ummi Baal Gad ihsin Lebo Hamath tlangkawn tiang an si.

⁶Hi sungah hin tlangpar ram: Lebanon tlang pawl le Misrefoth Maim karlakih a ummi Sidon mi hmuahhmuah an tel a si. Israel mi-ih an nor vete in himi pawl cu ka dawi thluh ding. Thu ka lo pek zo bangtuk in hi ram cu Israel mi-ih co dingah ṭhen awla zem aw.

⁷Atu ihsin an co dingah Israel miphun phun kua le Manasseh phun a hrek pawl hnenah hi ram cu ṭhen awla zem aw,” tiah a ti.

⁸Reuben hrin, Gad hrin le Manasseh hrin a hrek pawl ih comi ram cu Jordan tiva ihsin nisuahnak lamah a si. BAWIPA ih siahhlawh Moses ih a pekmi ram cu hi ram pawl hi an si.

⁹An ram cu Arnon Horkuam ri-ih a ummi, Aroer ihsin horkuam laifangih a ummi khawpi le Medeba rawn a zatein Dibon tiang a si.

¹⁰Heshbon khua ihsin ram uktu Amor siangpahrang Sihon ih ukmi khawpi pawl a zatein Ammon ramri tiang a tel.

¹¹Gilead ram, Geshur mi le Maakah mi an umnak ram, Hermon Tlang a zatein, Bashan ram a zatein Salekah tiang a tel thluh.

¹²Ashtaroth le Edrei ihsin ram uktu Og siangpahrang ih ukmi ram tla a tel. Og cu Refaim miphun sungih a taangsunmi a si. Himi pawl cu Moses ih rak nehmi le dawihlomi an si.

¹³Asinain Geshur mi le Maakah mi pawl cu Israel mi in an dawi lo. Israel ram sungah an um lai a si.

¹⁴Moses in Levi hrin pawl cu ram a pe lo. Ziangahtile BAWIPA in Moses hnenih a rak tiamcia bangtuk in, Israel mi pawl in BAWIPA hnenih mei-ur thawinak an pekmi pawl an co ding a si.

¹⁵Moses in Reuben hnam pawl cu an hrin ciar in ram a pek.

¹⁶An ram cu Arnon tiva kuam ri-ih a ummi, Aroer ihsin horkuam laifangih a ummi khawpi le Medeba kiangkapih a ummi hmunrawn hmuahhmuah a si;

¹⁷cun Heshbon le hmunrawnih khawpi: Dibon, Bamoth Baal, Beth Baalmeon,

¹⁸Jahaz, Kedemoth, Mefaath,

¹⁹Kiriathaim, Sibmah, hmunrawnih a ummi tlangpar khua Zereth Shahar,

²⁰Beth Peor, Pisgah tlangtluan hmuahhmuah, Beth Jeshimoth,

²¹hmunrawnih khawpi dang pawl le Heshbon ah a um ih ram uktu Amor siangpahrang Sihon ih ukmi khawpi hmuahhmuah pawl an tel thluh a si. Siangpahrang Sihon cu Moses in a neh ih Midian ram uktu Evi, Rekem, Zur, Hur, le Reba pawl tla a neh. Hi bawi pawl cu siangpahrang Sihon kuthnuai ih ram uktu an si.

²²Israel mi ih an thahmi lakah Beor ih fapa, pol a si mi Balaam khal a tel a si.

²³Reuben hrinih ramri cu Jordan tiva a si. Hi khawpi pawl le khawte pawl cu Reuben hrin pawl an innsang tam le mal zoh in an zemmi a si.

²⁴Moses in Gad hrin pawl khal an innsang zoh in an co dingah ram a pek.

²⁵An ram sungah cun Jazer le Gilead pengih khawpi hmuahhmuah; Ammon ram hrek, Rabbah ihsin nisuahnak lamih a ummi Aroer khua tiang;

²⁶Heshbon ihsin Ramath Mizpah le Betonim tiang; Mahanaim ihsin Lodebar ramri tiang an tel.

²⁷Cule Jordan phairawn ah Beth Haram, Beth Nimrah, Sukkoth, Zafon le Heshbon siangpahrang Sihon ih ukmi ram a taangmi hmuahhmuah an tel thluh. Nitlaknak lamah an ramri cu Jordan tiva a si ih saklam ah Galilee Tili tiang a si.

²⁸Hi khawpi pawl le khawte pawl cu Gad hrin innsang pawl ih comi ram an si.

²⁹Moses in Manasseh hrin a hrek innsang pawl hnenah an co dingin ram a pek.

³⁰An ram cu Mahanaim ihsin Bashan peng a zate le Bashan siangpahrang Og ih ukmi ram hmuahhmuah le Bashan peng sungih Jair ih khawte sawmruk pawl tla an tel.

³¹Gilead ram a hrek, Bashan ram sung Og siangpahrang ih ukmi khawpi Ashtaroth le Edrei pawl an tel a si. Hi ram le khawpi pawl cu Manasseh ih fapa Makhir ih tefa hrekkhat innsang pawl hnenih pekmi an si.

³²Cuticun Jordan tiva le Jerikho khua ihsin nisuahnak lam ram cu Moab hmunrawnah Moses in a ṭhen a si.

³³Sikhalsehla Levi hrin pawl co dingah Moses in ram a pek lo. “Israel ih Pathian BAWIPA hnenih pekmi cu nan covo a si,” tiah a ti.