Read Falam Chin JOSHUA 15 Bible Online

JOSHUA 15 - Falam Chin bible

JOSHUA 15

¹A hnuailam ih ram cu Judah hrinmi innsang khat ciarih comi ram a si: An ram cu thlanglam ah Edom ramri ihsin thlanglam bikih Zin nelrawn tiang a si.

²Hi thlanglam an ramri cu Tipi Thi ih thlanglam tikel ihsin,

³thlanglam ah a vung ih Akrabbim tlangkawn ihsin Zin tiang a si. Cule Negev ihsin Kadesh Barnea tiang a hung ih Hezron a lan ih Addar tiang; cule Karka lamah a feh ih,

⁴Azmon lamih a feh hnuah Izipt ramri ih tiva thlun in Mediterranean Tifinriat a thleng ih cu tawkah a net. Judah ramih thlanglam ramri cu cu bangtuk in a si.

⁵Nisuahnak lamih an ramri cu Tipi Thi a si ih saklam ah Tipi Thi sungih Jordan tiva a vung luhnak kaa tiang a si. Cutawk tikel ihsin saklam ramri a thok ih,

⁶Beth Hoglah le saklam sin ah Beth Arabah tiang a si. Cutawk ihsin saklam ah Bohan ih Lungpi tiang, Bohan cu Reuben ih fapa a si;

⁷cule Akhor, Harsatnak Horkuam an timi ihsin Debir tiang saklam ah a hung so ih horkuam thlanglam kapih a ummi Adummim tlangkawn a vun hoihtu Gilgal lamah a keel. Cutawk ihsin Enshemesh ih cirh pawl le Enrogel lamah a phei ih,

⁸Hinnom fapa ih phairawn an timi ihsin a so ih Jerusalem khua a umnak Jebus tlangtluan ih thlanglam ah a hung. Cule Refaim phairawn ih saklam zimah nitlaknak lam Hinnom phairawn thawn a zawn awmi tlang zim ihsin a hung.

⁹Cutawkih tlang zim ihsin Neftoah ih Cerhti umnak ah a hung ih Efron Tlang kiangih khawpi pawl a hung thleng. Cule Baalah, a si lole Kiriath Jearim, lamah a keel ih,

¹⁰Baalah ih nitlaknak lam ihsin Seir tlang a vel ih Jearim, a si lole Khesalon, Tlang ihsin Beth hemesh a vung thleng ih Timnah a lan.

¹¹Cule an ramri cu Ekron ih saklam tlangtluan ah a hung feh ih Shikkeron lamah a keel ih Baalah Tlang a lan hnuah Jabneel a thleng. An ramri cu Mediterranean Tifinriat a thleng ih cutawk cu a netnak a si.

¹²Nitlaknak lam ramri cu Mediterranean Tifinriat a si. Judah hrin sungkhat pawl ih ramri cu a tlunih kan timi bangtuk in a si.

¹³BAWIPA in Joshua hnenih a sim bangtuk in Judah hrin Jefunneh ih fapa Kaleb hnenah Judah mi pawl ih ram a hrekkhat cu pek a si. A cuih khua pakhat cu Hebron a si. Hebron cu Anak ih pa Arba ih khawpi a si.

¹⁴Cutikah Anak ih fapa pathum, Sheshai, Ahiman, le Talmai pawl cu hi khua ihsin a dawi suak.

¹⁵Cuih hnuah Kaleb cu a feh ih Kiriath Sefer ti ih an rak kawh ṭheumi, Debir khuami pawl a do.

¹⁶Cutikah Kaleb cun, “Kiriath Sefer khua a neh theitu cu ka fanu Aksah ka pe ding,” tiah a ti.

¹⁷Cule Kaleb ih unau Kenaz ih fapa Othniel in cuih khua cu a lak; curuangah Kaleb in a fanu Aksah cu a pek.

¹⁸A pasal Othniel hnenih a thlen tikah a pa Kaleb hnen ihsin lo pakhat dil dingah a pasal Othniel[8] cun a rak fial. A fial vekin a pa Kaleb hnenah cun laak in a va feh. Laak par ihsin a ṭum tikah a pa cun, “Ziang so na poi?” tiah a rak sut.

¹⁹Cutikah Aksah in, “Thil ka lo dil duhmi a um. Negev ramcaar ih ram i pek ruangah tikhur kan ṭul ih i zaangfah hram aw,” tiah a ti. Curuangah a pa cun saklam tikhur le thlanglam tikhur a rak pek.

²⁰Judah hrin an innsang ciarih an comi ram cu hihi an si:

²¹An comi khawpi pawl, Edom ram kiangih a ummi, thlanglam bik khawpi pawl cu, Kapzeel, Eder, Jagur,

²²Kinah, Dimonah, Adadah,

²³Kedesh, Hazor, Ithnan,

²⁴Zif, Telem, Bealoth,

²⁵Hazor Hadattah, Kerioth Hezron (a si lole Hazor),

²⁶Amam, Shema, Moladah,

²⁷Hazar Gaddah, Heshmon, Beth Pelet,

²⁸Hazar Shual, Beersheba, Biziothiah,

²⁹Baalah, Iim, Ezem,

³⁰Eltolad, Khesil, Hormah,

³¹Ziklag, Madmannah, Sansannah,

³²Lebaoth, Shilhim, Ain le Rimmon an si. A kiangkap ih khawte pawl thawn an zatein khua kul hluan kua an si.

³³Tlang hramih khawpi pawl cu, Eshtaol, Zorah, Ashnah;

³⁴Zanoah, En Gannim, Tappuah, Enam,

³⁵Jarmuth, Adullam, Sokoh, Azekah,

³⁶Shaaraim, Adithaim, Gederah, le Gederothaim an si. An kiangkapih khawte pawl thawn an zatein khua hleili an si.

³⁷Cuih tlunah Zenan, Hadashah, Migdal Gad,

³⁸Dilean, Mizpah, Joktheel,

³⁹Lakhish, Bozkath, Eglon,

⁴⁰Kabbon, Lahmam, Khitlish,

⁴¹Gederoth, Beth Dagon, Naamah, le Makkedah khawpi pawl tla an tel. An kiangkapih khawte pawl thawn an zatein khua hleiruk an si.

⁴²Khawpi dang pawl cu Libnah, Ether, Ashan,

⁴³Iftah, Ashnah, Nezib,

⁴⁴Keilah, Akzib, le Mareshah an si. An kiangkapih khawte pawl thawn an zatein khua kua an si.

⁴⁵Cun Ekron khawpi, a kiangkapih ummi khawpi le khawte pawl le,

⁴⁶Ekron le Tifinriat karlakih ummi, Ashdod khua kiangih khawte pawl tla an tel.

⁴⁷Cule Ashdod le Gaza tla, an kiangkapih khawte pawl thawn an tel ih Izipt ramri ih tiva le Mediterranean Tifinriat a thleng.

⁴⁸Tlangpar ramih khawpi pawl cu Shamir, Jattir, Sokoh,

⁴⁹Dannah, Kiriath Sefer (a si lole Debir),

⁵⁰Anab, Eshtemoa, Anim,

⁵¹Goshen, Holon, le Giloh an si. An kiangkapih khawte pawl thawn khua hleikhat an si.

⁵²Cule a dang khawpi pawl cu Arab, Dumah, Eshan,

⁵³Janim, Beth Tappuah, Afekah,

⁵⁴Humtah, Kiriath Arba (a si lole Hebron), le Zior an si. An kiangkapih khawte pawl thawn khua kua an si.

⁵⁵Cule Maon, Karmel, Zif, Juttah,

⁵⁶Jezreel, Jokdeam, Zanoah,

⁵⁷Kain, Gibeah, le Timnah tla an si.An kiangkapih khawte pawl thawn khua hra an si.

⁵⁸A dang khawpi pawl cu Halhul, Bethzur, Gedor,

⁵⁹Maarath, Beth Anoth, le Eltekon an si. An kiangkapih khawte pawl thawn khua ruk an si.

⁶⁰Cuih tlunah Kiriath Baal (a si lole Kiriah Jearim) le Rabbah tla an tel. An kiangih khawte pawl thawn khua hnih an si.

⁶¹Nelrawn ramah Beth Arabah, Middin, Sekakah,

⁶²Nibshan, Ci khawpi timi le Engedi khawpi pawl an um. An kiangkapih khawte pawl thawn khua ruk an si.

⁶³Asinain Jerusalem ih a ummi Jebus mi pawl cu Judah mi pawl in an dawisuak thei lo. Curuangah Jebus mi le Judah mi pawl cu tuih san tiangin Jerusalem khua ah an umtlang a si.