Read Falam Chin JOSHUA 16 Bible Online

JOSHUA 16 - Falam Chin bible

JOSHUA 16

¹Josef tesinfa pawl hnenih pekmi ramih thlanglam ramri cu Jerikho khua kiang Jordan tivakap um Jerikho cirhti ihsin nisuahnak lamah nelrawn ram tiang a si. Cule Jerikho khua ihsin tlangpar ramah Bethel tiang a hung feh.

²Bethel ihsin Luz ah a feh ih Arkhi mi pawl an umnak Ataroth Addar ah a va phei.

³Cutawk ihsin nitlaknak lamah Jaflet mi ram tiang a feh ih Thlanglam Beth Horon tiang a thleng. Cule Gezer ah a feh ih a netnak cu Mediterranean Tifinriat ah a si.

⁴Josef ih tefa Manasseh le Ephraim hrin pawl in Nitlak lam Manasseh ram cu an co.

⁵Efraim sungkhat pawl comi ram cu hihi a si. Nisuahnak lam an ramri cu Ataroth Addar ihsin Beth Horon tiang a hung thleng.

⁶Cutawk ihsin Mediterranean Tifinriat tiang a thleng. Saklam ih ramri cu Mikmethath a si. Nisuahnak lamih an ramri cu Taanath Shiloh lamah a keel ih acuih khua a lan hnuah Janoah tiang a thleng.

⁷Cule Janoah ihsin Ataroth le Naarah ah a vung ih Jerikho khua ihsin Jordan tiva ah a net a si.

⁸Cun nitlaknak lam ramri cu Tappuah ihsin Kanah tiva a thleng ih cutawk ihsin Mediterranean Tifinriat ah a net a si. Hi ram cu Efraim sungkhat pawl ih comi ram a si.

⁹Manasseh ram sungih a ummi khawpi le khawte pawl thawn Efraim sungkhat pawl hnenih pekmi an si ṭheh.

¹⁰Sikhalsehla Gezer ih a ummi Kanaan mi pawl cu an dawi suak lo. Curuangah Efraim mi lakah Kanaan mi cu tuih san tiangin an um lai a si. Asinain sal hnaṭuan in an um.