Read Falam Chin JOSHUA 19 Bible Online

JOSHUA 19 - Falam Chin bible

JOSHUA 19

¹A pahnihnak ih zemmi cu Simeon hrin an si. An comi ram cu Judah hrinih comi ram a thleng.

²An ram sungah Beersheba (a si lole Sheba), Moladah,

³Hazar Shual, Balah, Ezem,

⁴Eltolad, Bethul, Hormah,

⁵Ziklag, Beth Markaboth, Hazar Susah,

⁶Beth Lebaoth, le Sharuhen khawpi pawl an um. Khawpi hlei thum le an kiangkapih khawte pawl tla an si.

⁷A dang khawpi pawl cu, Ain, Rimmon, Ether, le Ashan an si. Khawpi pali le an kiangkapih khawte pawl tla an si.

⁸Hi khawpi kiangkapih a ummi khawte hmuahhmuah cu Baalath Beer le Negev ramih Ramah kiangkap tiangin an tel thluh a si. Himi cu Simeon hrin pawl ih an comi ram a si.

⁹Judah ih comi ram cu an hrangih a kauh tuk ruangah an ram sungah Simeon hrin in comi ram an nei.

¹⁰A pathumnak ih zemmi cu Zebulun hrin pawl ih comi ram a si. An ngahmi ram cu Sarid tiang a thleng.

¹¹An ramri cu Sarid ihsin nitlaknak lamah a so ih Mareal a thleng; Dabbesheth kap le Jokneam ihsin nisuahnak lamih tiva kap in a feh.

¹²Sarid khua ihsin khatlam kapih ramri cu nitlaknak lamah a feh ih Kisloth Tabor ihsin Daberath ah a so ih Jafia a hung thleng.

¹³Cutawk ihsin nisuahnak lamah a feh ih Gath Hefer le Eth Kazin a thleng ih Neah lamah a kel ih Rimmon lamzin a tan phah.

¹⁴Saklam ramri cu Hannathon lamah a kel ih Iftah El horkuam ah a netnak a si.

¹⁵An khawpi pawl cu Kattath, Nahalal, Shimron, Idalah, le Bethlehem an si. An zatein khawpi hleihnih an um ih an kiangkapah khawte pawl tla an um.

¹⁶Hi khawpi le khawte pawl hmuahhmuah cu Zebulun hrin pawl ih comi an si.

¹⁷A palinak ih zemmi ram cu Issakhar hrin pawl ih comi ram a si.

¹⁸An ram sungah cun Jezreel, Kesulloth, Shunem,

¹⁹Hafaraim, Shion, Anaharath,

²⁰Rabbith, Kishion, Ebez,

²¹Remeth, En Gannim, En Haddah, le Beth Pazzez khawpi pawl tla an um.

²²An ramri cu Tabor, Shahazumah, le Beth Shemesh khua pawl tla a dai phah ih Jordan tiva ah a netnak a si. An zatein khawpi hlei ruk an um ih an kiangkapah khawte dang pawl khal an um.

²³Hi khawpi le khawte pawl cu Issakhar hrin pawl ih comi ram a si.

²⁴A panganak ih zemmi cu Asher hrin pawl an si.

²⁵An ram sungah Helkath, Hali, Beten, Aksaf,

²⁶Allam Melek, Amad, le Mishal khawpi pawl an um. An ramri cu nitlaknak lamah Karmel le Shihor Libnath a thleng.

²⁷Cun nisuahnak lamah Beth Dagon lamah a kel ih Zebulun ramri dai phah in Iftah El horkuam ihsin saklam ah Beth Emek le Neiel a hung thleng. Cutawk ihsin a so sal ih Kabul,

²⁸Ebdon, Rehob, Hammon, Kanah, le Sidon khawtumpi tiang a hung thleng.

²⁹Cule Ramah lamah a kel ih ralhruang in kulhmi ṭai-ar khawpi a va thleng. Cun a kel sal ih Hosah ihsin Mediterranean Tifinriat ah a netnak a si. Khawpi dang pawl cu Mahalab, Akzib,

³⁰Ummah, Afek, le Rehob an si. An zatein khawpi kul hluanhnih an um ih an kiangkapah khawte pawl tla an um.

³¹Hi khawpi le khawte pawl cu Asher hrin pawl ih comi ram sungih ummi khua an si.

³²Paruknak ih zemmi cu Naftali hrin pawl an si.

³³An ramri cu Helef ihsin Zaanannim ih a ummi sasua kung in a feh ih Adami-nekeb le Jabneel ihsin Lakkum tiang, cule Jordan ah a netnak a si.

³⁴Nitlaknak lamah cun a feh vivo ih Aznoth Tabor tiang a thleng; cutawk ihsin Hukkok ah a kel ih thlanglam ah Zebulun ramri, nitlaknak lamah Asher ramri le nisuahnak lamah Judah ramri Jordan tiva ah a netnak a si.

³⁵Ralhruang ih kulhmi khawpi pawl cu Ziddim, Zer, Hammath, Rakkath, Khinnereth,

³⁶Adamah, Ramah, Hazor,

³⁷Kedesh, Edrei, En Hazor,

³⁸Yiron, Migdal El, Horem, Beth Anath, le Beth Shemesh tla an si. An zatein khawpi hleikua an um ih an kiangkapah khawte pawl tla an um.

³⁹Hi khawpi le khawte pawl cu Naftali hrin pawl comi ram sungih ummi khua an si.

⁴⁰Pasarihnak ih an zemmi cu Dan hrin pawl an si.

⁴¹An ram sungah Zorah, Eshtaol, Ir Shemesh,

⁴²Shaalabbin, Aijalon, Ithlah,

⁴³Elon, Timnah, Ekron,

⁴⁴Eltekeh, Gibbethon, Baalath,

⁴⁵Jehud, Bene Berak, Gath Rimmon,

⁴⁶Me Jarkon, le Rakkon khawpi pawl le Joppa khua ralkhat ih a ummi ram tla an tel.

⁴⁷Dan hrin pawl ih ram cu lon a si tikah Leshem ah Dan hrin pawl cu an feh ih an va do. A cuih khua cu an neh ih khawsungmi pawl an thah thluh. Anmah ih hrangah an ham ih an luahta. Cule an pu Dan ih hmin suangin cuih khawpi hmin cu Leshem ihsin Dan ah an thleng.

⁴⁸Hi khawpi le khawte pawl cu Dan hrin pawl ih comi ram sungih ummi khua an si.

⁴⁹Israel mi pawl ram an zem awk ṭheh tikah, Nun ih fapa Joshua khal a co dingah ram an pek ve.

⁵⁰BAWIPA ih thupekmi thlun in amah Joshua ih dilmi Efraim tlangpar ramih khawpi Timnath Serah an pek. Cuih khawpi cu Joshua in a sak sal ih cunah a umta.

⁵¹Shiloh ih an sakmi BAWIPA umnak Puanthlam sangka kiangah puithiam Eleazar, Nun ih fapa Joshua le Israel miphun pawl ih sungkhat ciar hotu pawl cun camcawhfung zuk in BAWIPA ih duhnak vekin ram cu an zem aw. Cuticun ram an zem awknak cu an ṭheh a si.