Read Falam Chin JOSHUA 22 Bible Online

JOSHUA 22 - Falam Chin bible

JOSHUA 22

¹Joshua in Reuben mi, Gad mi le Nisuahnak lam Manasseh mi a hrek pawl cu hmun khatah a ko ih an hnenah,

²“BAWIPA ih siahhlawh Moses ih thupekmi hmuahhmuah cu nan thlun ṭheh ih keimah ih thupekmi tla a zatein nan thlun thluh.

³Tuihsun tiangah hin nan unau Israel mi pawl voikhat hman nan tlansan hrih lo. Tuihsun tiangah hin BAWIPA nan Pathian ih thupekmi cu felzetin nan thlun a si.

⁴Atu-ah an hnenih a rak tiam cia bangtuk in nan unau Israel mi pawl hnenah BAWIPA in colhnak a pek. Curuangah BAWIPA ih siahhlawh Moses ih a lo pekmi nan ram, Jordan tiva ihsin nisuahnak lamah cun va tlung thlang uh.

⁵Cule BAWIPA ih siahhlawh Moses in, ‘BAWIPA nan Pathian cu duhdaw uh; a lamzin in feh uhla a thukham thlun uh; BAWIPA cu hngette in pom uh; nan thinlung le nan nunnak zate thawn a hna ṭuan uh,’ tiih thu a lo pekmi cu felfai zetin thlun suak tum uh,” tiah thu a cah.

⁶Cule Joshua in thlawsuah a pek ih an khua ah an tlung.

⁷Manasseh hrin a hrek pawl cu Jordan tiva ihsin nisuahnak lam Bashan timi pengah Moses in leiram a pek; asinain a hrek cu hrindang pawl thawn hmun khatah Jordan tiva ihsin nitlaknak lamah leiram a pek. Reuben hrin, Gad hrin le Manasseh hrin a hrek pawl cu an khua ih an tlun tikah Joshua in,

⁸“Atu nan khua ciarah, sumsaw le ṭilva tampi, sui, ngun, dar, thir le hnipuan tampi thawn lianzet in nan tlung a si. Nan ral hnen ihsin nan lonmi hi thilri pawl cu nan unau Israel mi pawl thawn va zem-aw uh,” tiah thu a cah.

⁹Cutiin Reuben hrin, Gad hrin le Manasseh hrin a hrek pawl cu Jordan tiva nisuahnak lamah an khua ah an tlung. Kanaan ram Shiloh ih an riahnak ahcun Israel midang pawl cu an taanta ih BAWIPA in Moses hnen ihsin thu a pek zomi vekin an comi anmah ih ram Gilead ahcun an feh.

¹⁰Kanaan ram, Jordan tiva kapih a ummi Geliloth an thlen tikah Reuben hrin, Gad hrin le Manasseh hrin a hrek pawl cun tiva kapah cun biakṭheng tumzet pakhat cuang zetin an don.

¹¹Cutikah, “Ruat hnik uh, Reuben hrin, Gad hrin le Manasseh hrinih a hrek pawl cun Jordan tiva khatlam kap, Kanaan ramri kiang, Geliloth ah biakṭheng an don a si,” tiah mi in an rel ciamco.

¹²Cumi cu Israel mipi in an theih tikah an zatein Shiloh ahcun an khawm-aw ih Reuben hrin, Gad hrin le Manasseh hrin a hrek pawl cu do an tum.

¹³Cutikah puithiam Eleazar ih fapa Finehas cu Israel mi in Gilead ram Reuben hrin, Gad hrin le Nisuahlam Manasseh hrin a hrek pawl hnenah an thlah.

¹⁴Amah lawng si loin Israel hrin khat in pakhat ciar hotu pahra Finehas thawn an feh. Cuih palai pawl cu hrin khatih lu bik ciar an si.

¹⁵Gilead ramah cun an thleng ih Reuben mi, Gad mi le Nisuah lam Manasseh mi a hrek pawl hnenah,

¹⁶“Zianghrangah hi bangtuk thil ṭha lo cu Israel ih Pathian hmaiah nan tuah? Hi biakṭheng nanmah hrangih nan don ruangah BAWIPA nan dodal a si. Amah nan thlun nawn lo.

¹⁷Peor ah Israel mi sualnak ruangih BAWIPA in a minung pawl a hrem kha nan ciing lo maw si? A cuih sualnak ruangah atu tiangin kan tuar lai hrih a si. Cuhmuah cu a tawk thlang lo maw?

¹⁸Atu in maw BAWIPA cu nan dungtun ding? BAWIPA tuihsun nan dodal a si ahcun thaisun ah Israel misenpi parah a thin a heng ding.

¹⁹Cule nan ram hi a baal zo ih BAWIPA biaknak hrangih a tlak nawn lo nan ti a si ahcun BAWIPA ih ram a puanthlam umnak ah ra uh. Kanmah ih lakah covo ra la uh. Sikhalsehla BAWIPA kan Pathian biakṭheng siar lo biakṭheng dang nanmah ih hrangah sak tahrat in BAWIPA cu dodal hlah uh; kannih tla BAWIPA dodaltu-ah in canter hlah uh.

²⁰Siatsuah thluh ding tiih thupekmi Zerah fapa Akhan in a thlun duh lo ruangah Israel pumpi in hremnak kan tuar kha nan cing nawn lo maw si? Akhan sualnak ruangah hin amah lawng a thi a si lo,” tiah an ti.

²¹Cutikah Reuben mi, Gad mi le Manasseh mi a hrek pawl in Israel miphun hotu pawl hnenah cun,

²²“Ziangkimtithei Pathian! Amah cu BAWIPA a si! Ziangkimtithei Pathian! Amah cu BAWIPA a si! Hi thil kan tuahnak thu hi BAWIPA amah in a thei; Israel mi khal in nan theih a ṭul a si. BAWIPA kan dodal ih kan zuarthlai a si ahcun tuihsun ah hin in nunter hlah uh.

²³BAWIPA ih thu thlun loin kan hersan ih kanmah hrangih mei-ur thawinak, thlairawl thawinak le remnak thawinak dingah biakṭheng kan don a si ahcun BAWIPA amah rori in in hrem seh.

²⁴Hitiih biakṭheng kan donnak cu ziangruangah a si tile: hmailamah nan tefa pawl in, ‘Israel ih Pathian, BAWIPA thawn ziang peh awknak so nan neih?

²⁵Reuben mi le Gad mi pawl, nannih le kannih karlakih ramri si dingah Pathian in Jordan tivapi a tuah zo. BAWIPA thawn nannih cu pehtlaihnak nan nei nawn lo,’ tiah kan tefa pawl hnenah an ti pang ding, ti kan phan ruangah a si. Cutiin ti ngaingai hai sehla nan tefa pawl in kan tefa pawl cu Pathian biak an kham a si lo ding maw?

²⁶Curuangah peknak le meisa-ur thawinak tuahnak hrangah si loin,

²⁷BAWIPA cu mei-ur thawinak le raithawinak le remnak thawinak tla thawn a Puanthlam thianghlim hmaiah kan biak a si, ti kha nanmah le kanmah karlakah siseh, nan tefa le kan tefa karlak khalah siseh, hminsinnak le thutheitu ah hi biakṭheng cu kan don a si. Hitiih kan tuah asile nan tefa pawl in kan tefa pawl cu, ‘BAWIPA thawn zianghman pehtlaihnak nan nei lo,’ tiah hmailamah an ti thei lo ding.

²⁸Cutiih an ti hman ah kannih in, ‘Zoh uh, BAWIPA ih biakṭheng vek rori in kan pupa pawl in biakṭheng pakhat an don ve a si. Thawinak hrang le mei-ur thawinak hrangah si loin kan pahnih karlakih hminsinnak thutheitu ah a si,’ kan ti thei ding, tiah kan ruahnak a si.

²⁹BAWIPA amah umnak Puanthlam hmaiih a ummi BAWIPA kan Pathian ih biakṭheng siar lo, mei-ur thawinak le thawinak dang le thlairawl thawinak hrangah a dang biakṭheng pakhat don tahratin BAWIPA cu dodal kan tum hrimhrim lo. Amah thlun lo khalin um kan tum lo a si,” tiah an ti.

³⁰Cutiih an ti cu puithiam Finehas le a hnenih a telmi Israel phun hotu pawl in an theih tikah Reuben mi, Gad mi le Nisuah lam Manasseh mi a hrek tlunah cun an lung a awi ngaingai.

³¹Cutikah Reuben mi, Gad mi le Manasseh mi hnenah puithiam Eleazar ih fapa Finehas cun, “BAWIPA nan dodal lo hrangah BAWIPA cu kan hnenah a um a si, ti kan thei. BAWIPA ih cawhkuannak tuar lotein Israel mi pawl cu nan luatter a si,” tiah a ti.

³²Cule Finehas le Israel phun hotu pawl cu Gilead ramih ummi Reuben mi le Gad mi hnen ihsin an kir ih Kanaan ramih ummi Israel mi hnenah cuih thuhla cu an va sim.

³³An simmi thu an theih tikah Israel mi cu an lung a awi ngaingai. Pathian an thangṭhat ih Reuben mi le Gad mi an umnak ram siatsuah dingih ral thawh ding thu cu an rel nawn lo.

³⁴Reuben mi le Gad mi pawl in an donmi biakṭheng cu “Theihpitu,” tiah an ko; ziangahtile “BAWIPA cu Pathian a si, ti kha kan zate hrangah theihpitu a si,” an ti.