Read Falam Chin JOSHUA 24 Bible Online

JOSHUA 24 - Falam Chin bible

JOSHUA 24

¹Shekhem ah Israel mi pawl cu an zatein Joshua in a ko ṭheh. Upa pawl, hotu pawl, thureltu pawl le bawi pawl an zatein a ko ih Pathian hmaiah cun an rak suak ciar.

²Cule Joshua in an hnenah, “Israel ih Pathian BAWIPA cun nan hnenah hiti in a ti: ‘Hlanlaipi ah nan pupa pawl cu Eufrates Tiva ih khatlam ralah an rak um ih khawzing dangdang an rak biak. A cuih nan pupa lakih pakhat cu Abraham le Nahor ih pa Terah a si.

³Cun Eufrates tiva ral ihsin Abraham cu ka lakih Kanaan ram khawzakipah ka hruai. Tefa tampi tla ka pek. A fapa Isaak ka pek ih,

⁴Isaak hnenah Jakob le Esau tla ka pek. Cule Seir timi tlangpar ram cu a co dingah Esau ka pek ih Jakob le a faale pawl cu Izipt ramah an vung feh.

⁵Cun Moses le Aaron ka ko ih Izipt ramah siatnak tampi ka thlenter. Cuih hnuah nan zatein ka lo hruaisuak.

⁶Nan pu le nan pa pawl cu Izipt ram ihsin ka hruai suak ih Tipi Sen an thleng. Izipt mi pawl in an rangleng le rang ralkap pawl thawn an rak dawi.

⁷Mangbang vansaang in Israel mi pawl in ka hnenih an au tikah anmah le Izipt mi pawl karlakah khawthim ka ret. Izipt mi pawl tlunah tipi ka ratter ih tidai in a khuh thluh hai. Izipt mi pawl tlunih ka thil tuahmi cu nan mit in nan hmu. “‘Hramlak nelrawn ah caan reipi nan um.

⁸Cule Jordan tiva ihsin nisuahnak lamih a ummi Amor mi ram ah ka lo thlenpi. An lo do naón nehnak cu nan hnenah ka lo pek. An ram nan lak ih nan fehnak kipah anmah cu ka siatsuah vivo.

⁹Cule Zippor ih fapa Moab siangpahrang Balak in Israel mi cu a lo do. Cuih tlunah Beor ih fapa Balaam hnenah nanmah cam dingah thu a cah.

¹⁰Sikhalsehla Balaam ih thu cu ka ngai lo; thlawsuahnak sawn a lo pek hai ih cutiin Balak ih huham sung ihsin ka lo luatter hai a si.

¹¹Cun Jordan tiva nan tan ih Jerikho khua nan thleng. Cutikah Jerikho khua mi lawng si loin Amor mi, Periz mi, Kanaan mi, Hit mi, Girgash mi, Hiv mi le Jebus mi pawl in an lo do. Asinain an zate ih tlunah nehnak ka lo pe.

¹²Lungphan thinlaunak[10] nan hmaiah ka thlah ih cumi in Amor siangpahrang pahnih cu a dawi hai a si; nan ralnam le nan li cahnak zianghman a tel lo.

¹³Nan ṭuan dah lomi loram ka lo pe ih nan sak dah lomi khawpi pawl ah nan um; nan ciin dah lomi sabit hri ihsin sabit nan ei ih nan phun dah lomi tanluan[11] kuang ihsin tanluan rah nan ei a si,’ a ti.

¹⁴“Curuangah BAWIPA cu ṭihzahnak thawn biak uhla amah ih hna cu rintlakzet le thinlung taktein ṭuan uh. Nan pupa pawl in Mesopotamia ram le Izipt ramih an rak biakmi khawzing dangdang pawl cu hnong thlang uhla BAWIPA cu rian uh.

¹⁵BAWIPA nan ren duh lo a si ahcun tuihsun ah hin hril uh; Mesopotamia ram nan pupa pawl ih an rak biakmi khawzing pawl maw nan biak sawn ding; a si lole atuih nan umnak ram Amor miphun pawl ih khawzing pawl deuh so nan biak ding, hril uh. Kei le ka innsang cun BAWIPA kan biak ding a si,” tiah a ti.

¹⁶Cutikah Israel mi pawl cun, “BAWIPA tlansan tahratin khawzing dangdang biak ding cu kan tum dah lo ding.

¹⁷BAWIPA kan Pathian in kan pupa pawl siseh, kanmah siseh, Izipt ram sung saltaannak ihsin in suah ih thil mangbangza a tuahmi pawl cu kan hmu zo. Miphun tampi lakah kan feh ih kan fehnak kipah amah in himte in in kilkhawi.

¹⁸Hmailam kan feh vivo tikah BAWIPA amah thotho in hi ram sungih a ummi miphun le Amor mi pawl cu a dawi thluh a si. Curuangah kannih khal BAWIPA kan biak ve ding. Amah cu kan Pathian a si,” tiah an ti.

¹⁹Joshua in an hnenah, “BAWIPA cu nan rian thei lem pei maw? Ziangahtile amah cu a thianghlimmi Pathian a si ih thiik nei Pathian a si. Nan mawhnak le nan sualnak khal a lo ngaithiam lo ding.

²⁰BAWIPA tlansan tahratin ramdang khawzing nan biak a si ahcun nan parah caan reipi rak ṭha zo hman sehla amah in a lo ral ding ih a lo hrem ding; a lo siatsuah ṭheh hai ding a si,” tiah a ti.

²¹Cutikah Israel mi pawl in Joshua hnenah, “A si lo, BAWIPA lawnglawng kan rian ding a si,” tiah an ti.

²²Cule Joshua in, “Amah ih hnaṭuan tum in BAWIPA nan hrilnak thu a theitu cu nanmah lala nan si,” tiah a ti. Annih in, “A si, kanmah hi thutheitu kan si,” an ti.

²³Cun Joshua in, “Cuti asile nan lakih a ummi ramdang pathian lem pawl cu hlon thluh thlang uhla Israel ih Pathian BAWIPA hnenah nan thinlung cu pe thluh uh,” tiah a ti.

²⁴Israel misenpi in, “BAWIPA kan Pathian kan biak ding ih amah thupekmi kan thlun ding,” tiah an ti.

²⁵Curuangah Joshua in cuihsun ah thukamnak cu Israel mi hrangah a tuah ih Shekhem ahcun daan le an thlun ding mi pawl a pek.

²⁶A cuih daan pawl cu Joshua in Pathian ih pekmi Daan cabu sungah a ngan. Cule Joshua in lungto tumpi a lak ih Pathian hmun thianghlim ih sasua kung hnuai ah a phun.

²⁷Cun an hnenah, “Hi lungphun hi zohhnik uh! Kan karlakah kan thu in theihpitu a si ding. BAWIPA in kan hnenih a simmi thu hmuahhmuah cu hi lungphun in a thei thluh. Curuangah nan Pathian dodal tahratih ral nan thawh lonak dingah kan thu in theihpitu lungphun a si ding,” tiah a ti.

²⁸Cule misenpi cu Joshua in a ṭiakter ih anmah ih comi ram ciar ah an tlung.

²⁹Cuih hnuah Nun ih fapa Joshua, BAWIPA siahhlawh cu kum za le kum hra a kimah a thi.

³⁰Gaash tlang ihsin saklam, Efraim tlangram ih a ummi amah ih ram sung Timnath Serah ah an phum.

³¹Joshua a nun sung hmuahhmuah ah Israel mi cun BAWIPA an biak ih a thih hnu khalah Israel hrangih BAWIPA ih thil timi a thei thluhtu Israel hotu pawl an nun sung cu BAWIPA an biak thotho.

³²Izipt ram ihsin Israel mi pawl in an kenmi Josef ruh pawl cu Shekhem ah an phum. Cuih an phumnak hmun cu Shekhem ih pa Hamor tesinfa hnen ihsin Jakob in ngun tangka zakhat in a leimi a si. Josef tesinfa pawl in ro ih an comi a si.

³³Aaron ih fapa Eleazar a thi ih Efraim tlangram ih a ummi a fapa Finehas an pekmi Gibeah khua ah an phum.