Read Falam Chin JOSHUA 3 Bible Online

JOSHUA 3 - Falam Chin bible

JOSHUA 3

¹Zingpitte-ah Joshua cu a tho ih amah le Israel mi hmuahhmuah an riahnak Shittim ihsin an pok ih Jordan tiva ah an feh. An tan hlanah tiva kapah cun an riak.

²Ni thum hnuah Israel hruaitu pawl cu miburpi riahnak hmun kipah an feh ih,

³“BAWIPA nan Pathian ih pekmi Thukam Kuang kha Levi puithiam pawl in an zawn ih an fehpi nan hmuh tikah nan umnak ciar ihsin pok uhla thlun uh.

⁴Hi lam nan thlen dah lo ruangah fehnak tla nan thei lo pang ding. Sikhalsehla Thukham Kuang cu naih tuk hlah uh; peng hrek tluk hlat in thlun uh,” tiah mi zapi hnenah an sim.

⁵Cule Israel mi pawl hnenah Joshua in, “Tithianghlim aw uh. Ziangahtile thaisun ah nanmah lakah BAWIPA in mangbangza a tuah ding a si,” tiah a sim.

⁶Cule puithiam pawl hnenah Joshua in, “Thukam Kuang cu lak uhla senpi hmaiah feh uh,” a ti ih a ti vek cun an feh.

⁷Cutikah BAWIPA in Joshua hnenah, “Tuihsun ih ka tuahmi ruangah hin Israel mi pawl in nangmah cu an lo cawisaang ding ih an lo upat ding; Moses hnenih ka rak um bangtuk in na hnenih ka um hi an thei ding.

⁸Thukam Kuang a phurtu puithiam pawl hnenah, ‘Jordan tivakap nan thlen ih nan tan tikah ti sungah cun ding uh,’ tiah thu pek aw,” tiah a ti.

⁹Cule Joshua in Israel senpi pawl cu, “I rak naih uhla, BAWIPA nan Pathian ih ṭongkam cu ngaihnik uh.

¹⁰Nanmah lakah a nungmi Pathian a umzia cu tuihsun ah nan thei ding. Hmailamih nan nor deuhdeuh tikah Kanaan mi, Hit mi, Hiv mi, Periz mi, Girgash mi, Amor mi le Jebus mi pawl cu Amah in a dawi suak thluh ding.

¹¹Leilung pumpi ih BAWIPA ih Thukham Kuang cun nan hmaiah Jordan tiva a tan ding.

¹²Curuangah minung hleihnih, Israel phun khat ihsin minung pakhat ciar, hril uh.

¹³Leilung pumpuluk uktu BAWIPA ih Thukam Kuang a zawntu puithiam pawl ti sungih an ke an vun thlak vete in Jordan tiva a luang rero mi cu a cat ding; saklam ihsin a rung luangmi tidai cu hmun khatah a li luailo ding,” tiah a ti.

¹⁴Jordan Tiva tan dingah Israel mi pawl cu an riahnak ihsin an pok. Cule Thukam Kuang a zawntu puithiam pawl hmaisabik ah an feh.

¹⁵Rawl lak caan a si ih Jordan tiva cu a lianzet. Tiva kap an thlen ih tidai sungih an ke an vun thlak vete in,

¹⁶Jordan tiva cu a cat; luang loin a cawl; a li luailo ih Zarethan khawpi kiangih a ummi Adam khua tiangin tidai cu a hung li. Arabah Tipi, Tipi Thi timi sungih a vung luang mi tidai cu a cat thla rori. Cule Israel mi pawl cun Jerikho khua ralden zawn in an tan.

¹⁷Leilung ro par ihsin Israel mi pawl cu an feh ih an zate ih an tan thluh hlan lo BAWIPA ih Thukam Kuang a zawntu puithiam pawl cu Jordan tiva laifang leilung ro parah an ding ringring.