Read Falam Chin JOSHUA 4 Bible Online

JOSHUA 4 - Falam Chin bible

JOSHUA 4

¹Israel mi pawl an zatein Jordan tiva an tan thluh tikah BAWIPA in Joshua hnenah,

²“Israel miphun phun khat ihsin pakhat ciar minung hleihnih hril awla,

³an hnenah, ‘Puithiam pawl an dinnak Jordan tiva laifangih ta lungto hleihnih nan lak pei ih tuih zan nan riahnak hmunah nan ret pei,’ tiin thu pe aw,” tiah a ti.

⁴Cule a hril ciami minung hleihnih cu Joshua in a ko ih,

⁵“Jordan tiva ah BAWIPA nan Pathian ih Thukam Kuang hmaiah feh uhla lungto pakhat fingfing ti sung ihsin lak uhla nan liangah pu uh; lungto pakhat cu Israel miphun phun khat ai-ah a si ding.

⁶BAWIPA ih a tuahmi hmuahhmuah Israel mi in an cinken ringringnak dingah hi lungto pawl cu hminsinnak a si ding. Hmai lamih nan tefa pawl in hi lungto pawl hi a tican ziangso a si tiih an lo sut tikah,

⁷BAWIPA ih Thukam Kuang Jordan tiva a tan tikah Jordan tiva cu luang loin a cat, timi Israel mi pawl ih an theih ringringnak dingah hi lungto pawl cu an si, tiah nan ti pei,” a ti.

⁸Cute pawl cun Joshua ih thupek bangtuk in an tuah. BAWIPA in Joshua hnenih a sim vekin minung hleihnih pawl cun Jordan tiva laifangih ta lungto hleihnih an lak ih lungto pakhat cu Israel miphun phun khat fingfing ai-ah a si. Lungto cu an keng ih an riahnak hmunah an ret.

⁹Cule Joshua in Jordan tiva laifang, Thukam Kuang zawntu puithiam pawl an dinnak hmun, ahcun lungto hleihnih a phun. A cuih lungphun pawl cu atu tiangin a um lai.

¹⁰Israel mi pawl tuah dingah BAWIPA in Joshua hnenih thu a pekmi hmuahhmuah an tuah thluh hlan lo puithiam pawl cu Jordan tiva laifangah an ding ringring. Cumi cu Moses ih thu a rak pek ciami an thlunmi a si. Cule Israel mi pawl cun zamrangin tiva cu an tan.

¹¹An zatein tiva ral an thlen thluh tikah BAWIPA ih Thukam Kuang le puithiam pawl cu Israel misenpi hmaiah an feh.

¹²Reuben mi pawl, Gad mi pawl le Manasseh mi a hrek pawl cu, Moses ih a rak tiam cia bangtuk in raldo dingah mi senpi hmaiah an feh.

¹³Raldo dingih a thuam-awmi milai thawng sawmli cu BAWIPA ih mithmuh ah Jerikho kiang hmunrawn lamah an feh.

¹⁴Cuih ni ih BAWIPA ih thil tuahmi ruangah Israel mi pawl in Joshua cu an cawisaang ih an upat ngaingai. Moses an upat vekin a Joshua khal a nun sung hmuahhmuah an upat ve.

¹⁵Cule BAWIPA in Joshua hnenah,

¹⁶“Thukam Kuang a zawntu puithiam pawl cu Jordan tiva sung ihsin hung suak dingah thu pe aw,” a ti.

¹⁷BAWIPA ih fial vekin Joshua cun thu a pek.

¹⁸Puithiam pawl tikap ah an hung suak ih lei ro an pal vete in Jordan tiva cu a luan keel in a luang sal ih tidai cu a kawr a khat.

¹⁹Israel mi pawl in Jordan tiva cu thla hmaisa bik[1] ni hra ni ah an tan ih Jerikho ihsin nisuahnak lamih a ummi Gilgal khua ah an riak.

²⁰Cutawkah Jordan tiva ihsin an lakmi lungto hleihnih cu Joshua in a phun.

²¹Joshua in Israel mi pawl hnenah, “Hmailamah nan fanau pawl in, ‘Hi lungto pawl cu a tican ziangso a si?’ tiih an lo sut tikah,

²²‘Israel mi in Jordan tiva an tan tikah leiro par ihsin an feh, tican a si,’ tiah nan sim pei.

²³BAWIPA Pathian in Tipi Sen kan tan thluh hlan lo a roter vek thotho in nan hrang khalah Jordan tiva cu nan tan thluh hlan lo a roter ve a si.

²⁴Curuangah leilungmi hmuahhmuah in BAWIPA ih thilti theinak an thei ding ih nannih khal in BAWIPA nan Pathian cu a kumkhua in nan upat pei,” tiah a ti.