Read Falam Chin JOSHUA 5 Bible Online

JOSHUA 5 - Falam Chin bible

JOSHUA 5

¹Jordan tiva ihsin nitlaknak lamih a um Amor siangpahrang pawl le Mediterranean Tifinriat kapih a ummi Kanaan siangpahrang pawl cu Israel mi pawl in Jordan tiva an tan tikah BAWIPA in tiva a kangter ṭheh, ti kha an thei thluh. Curuangah an ṭih ih thinphang le thinnau in an um.

²Cule BAWIPA in Joshua hnenah, “ṭeklung namte tuah awla Israel mi pawl hi an serh tan sal aw,” tiah a ti.

³Curuangah Joshua cun ṭeklung namte a tuah ih Israel mi pawl cu Serhtannak Tlang [2] an timi ah an serh a tan.

⁴Zianghrangah an serh a tan tile Izipt ram ihsin an suah laiih raldo theimi mipa hmuahhmuah cu an tar zo ih hramlakih khual an tlawnnak lamzin ah an thi thluh zo.

⁵Izipt ram ihsin a suakmi mipa hmuahhmuah cu serhtanmi an si naón hramlak an feh laiih a suakmi pawl cu serhtan hrih lomi lawnglawng an si ṭheh.

⁶Hramlak an vahvaihnak ah Israel mi pawl cu kum sawmli an feh. BAWIPA ih thu an ngai lo ruangah Izipt ram ihsin raldo thei ciami mipa hmuahhmuah cu an thi thluh zo. An pipu hnenah ka lo pek ding tiih siatcam in a rak kam ciami, cawhnawi le khuaitizu a luannak ram cu ka thlengter hrimhrim lo ding, tiah BAWIPA in a ti.

⁷Anmah ih ai-awhtu an fapa pawl cu serhtan hrih lomi an si. Cuih mino pawl cu Joshua ih serh a tanmi pawl an si.

⁸An zatein serh an tan ṭheh tikah an hma a dam ṭheh hlan lo an zatein an riahbuk ah an um thluh.

⁹Cule BAWIPA in Joshua hnenah, “Izipt ram sal nan taannak ruangih ningzahnak cu tuih sunah ka hlon thluh zo,” tiah a ti. Curuangah acuih hmun cu Gilgal[3] tiah hmin an saknak a si; tuih sun tiang cuticun an ko lai.

¹⁰Israel mi pawl Gilgal ih an um laiah, Jerikho kiangih hmunrawn ahcun cuih thla ni hleili zanlam ihsin Lantak Puai an tuah.

¹¹A thaisun ah Kanaan ram ihsin a suakmi rawl, vaikan le thilnu telh lomi sang an ei.

¹²Cuih ram ihsin a suakmi rawl an ei vete cun van ihsin manna sang a rung tla nawn lo; nehhnu khalah Israel mi in an hmu nawn lo. Cuih kum thok in Kanaan ramih a suakmi rawl lawng an ei.

¹³Joshua cu Jerikho kiang a thlen tikah khua a hun tang ih, ralnam zuuk ciami keng in a hmaiah mipa pakhat a din kha a hmu lohli. Joshua cun a hei naih ih, “Kanmah ih milai na si maw, kan ral so na si?” tiah a sut.

¹⁴Cutikah cupa cun, “Zo ih milai hman ka si lo; BAWIPA ih ralkap pawl hotu ka si ih hinah ka ra,” tiah a ti. Cutikah Joshua cu leilungah upatnak thawn a bok ih, “BAWIPA, kei na salpa hnenah hin ziangso na sim duhmi a um?” tiah a sut.

¹⁵Cule BAWIPA ih ralkap hotu pa cun, “Na kedam phuak aw; hmun thianghlim ah na ding a si,” tiah a ti. A ti bangtuk in Joshua cun a phuak.