Read Falam Chin 2 THESALON 1 Bible Online

2 THESALON 1 - Falam Chin bible

2 THESALON 1

¹Paul, Silas[1] le Timote in Thesalonika khua ih a ummi kawhhran, Pathian kan Pa le Bawipa Jesuh Khrih ta a si mi, nan hnenah ca kan lo kuat.

²Pathian kan Pa le Bawipa Jesuh Khrih in zaangfahnak le daihnak lo pe hram seh.

³Ka u le ka nau tla, nanmah ih ruangah Pathian hnenah kan lung a awizet. Cutiih Pathian kan thangṭhat cu a dikmi a si, ziangahtile nan zumnak a ṭhangzet ih pakhat le pakhat nan duhdawt awknak khal a ṭhang vivo a si.

⁴Curuangah Pathian kawhhran pawl hnenah nanmah ih thu-ah kan porh-aw ih harsatnak le hremnak nan tong nacingin tuartheinak le zumnak nan neih thei ruangah kan hmai a hngalzet a si.

⁵Himi hin Pathian thuṭhennak cu a dik a si ti a langter ih Pathian uknak ruangih a tuarmi nan si ruangah Pathian uknak thawn a tlak awmi nan si.

⁶Pathian in a dikmi a tuah ding. Harsatnak a lo petu pawl ih parah harsatnak a thlenter ve ding;

⁷harsatnak a tuartu nan hnenah colhdamnak a lo pek ding ih kannih hnen khalah in pe ve ding. Cumi cu kan Bawipa Jesuh le huham thawn a khatmi a vancungmi pawl an rat tikah a tuah ding;

⁸Pathian a hnongtu le kan Bawipa Jesuh ih Thuthang ṭha a cohlang duh lotu pawl cu meisa hliau thawn a hrem hai ding.

⁹Annih pawl cu kumkhua siatralnak an tuar ding. Bawipa cu a minung le a zumtu pawl hnen ihsin sunlawinak le upatnak co dingih

¹⁰a rat Ni ah, a huham sunlawinak le Bawipa mithmai hmu lo dingin annih pawl cu hnon an si ding. Cule nannih cu nan hnenih kan phuan mi Thuthang ṭha nan zum ruangah Bawipa a sunloihtu le upatnak a petu pawl lakah nan tel ding.

¹¹Curuangah cat loin nan hrangih thla kan camnak a si. Kan Pathian ih a lo kawhsannak thawn mil-aw in nan nun theinak dingah kan dil ringring. A cahnak huham sungin nan duhmi hmuahhmuah cu ṭhatnak ah kimter in nan zumnak ih hnaṭuannak cu amah in tlamtlingter hram seh.

¹²Cuticun kan Bawipa Jesuh hmin cu sunlawinak nan hnen ihsin a ngah dingih kan Pathian le Bawipa Jesuh Khrih zaangfahnak ruangah nannih khal in sunlawinak cu a hnen ihsin nan ngah ve ding.