Read Falam Chin 2 THESALON 2 Bible Online

2 THESALON 2 - Falam Chin bible

2 THESALON 2

¹Ka u le ka nau tla, kan Bawipa Jesuh Khrih a ratsalnak ding le amah thawn hmun khatih kan tonkhawm awknak ding thu-ah,

²thinlung hnokin um hlah uh; cun Bawipa ih Ni cu a ra thleng zo a si, an timi khalah mangbangin um hlah uh, tiah ka lo dil. Cubangtuk ih a titu in kanmah lehlam, sim cianak an rak nei, a si lole thu an simnak ah an telh, a si lole an cakuat sungah an ngan, ti tla-in in ti ding.

³Zohman in lo bum hlah hai seh. Ziangahtile neta bik Ralthawhnak a thlen hlan le hell ih tla dingmi Misualral pa a ra thlen hlanah cun Bawipa ih Ni cu a ra thleng lo ding.

⁴Misualral pa cun midang in khawzing ih an ruahmi le biak dingih an ruahmi hmuahhmuah a dodal ding ih cu pawl ih tlunah a ret-aw ding. Pathian Biakinn sung khalah a lut ding ih to tahratin keimah hi Pathian ka si, a ti ding.

⁵Nan ciing nawn lo maw si? Nan hnenih ka um laiah hi thu hmuahhmuah hi ka lo sim ṭheh zomi an si.

⁶Asinain atu-ah cun a ra thleng hrih lo ding, ziangahtile dawntu a um. Cuih dawntu cu ziang a si ti nan thei. A tikcu a kim tikah Misualral pa cu a lang ding.

⁷Misualral pa cu a thupte in hna a ṭuan rero zo; sikhalsehla a dawntu kha hmun dangih ṭhawn hlo a si hlanah cun a lang dingmi cu a lang thei hrih lo ding.

⁸Tikcu a kim tikah Misualral pa cu a lang ding. Asinain Bawipa Jesuh a thlen tikah a kaa sung ihsin a suakmi a thaw in a that ding ih a tleumi a sunlawinak in a siatsuah ding.

⁹Misualral pa cu Satan cahnak huham thawn a ra ding ih hmuhsaknak mak le khawruahharza a phunphun mi bumnak ah a tuah ding.

¹⁰A hloral ding pawl hnenah cun a ṭha lo zetmi mibumnak phunphun a hmang ding. Cu pawl cu an hloral ding, ziangahtile rundamnak ngahnak ding a ummi thutak kha an duh lo ih an cohlang fawn lo.

¹¹Curuangah Pathian in an hnenih hnaṭuan dingah sualpalhnak huham a thlak ih a dik lomi kha an zum.

¹²Cuticun thutak zum loin sualnak lam a hriltu pawl cu siatralnak ah an thleng ding.

¹³Bawipa ih duhdawtmi u le nau tla, nanmah ruangah Pathian cu kan thangṭhat ringring ding. Ziangahtile Thlarau cahnak ruangah Pathian mi thianghlim ih canter dingah le thutak nan zumnak ruangah rundamnak ngah dingah Pathian ih hril hmaisa bikmi nan si.

¹⁴Kan Bawipa Jesuh Khrih sunlawinak a cotu si dingah Pathian in nan hnenih kan phuanmi Thuthangṭha hmangin a lo ko zo.

¹⁵Cuti a si ruangah u le nau tla, kan thusimmi in siseh, nan hnenih kan cakuatmi in siseh, kan lo zirhmi thutak pawl cu kaihnget uhla khohzetin ding uh.

¹⁶Kannih in duhdawt ih in zaangfah ruangah cat loin ralṭhatnak le a hngetmi beiseinak in petu kan Bawipa Jesuh Khrih Amah le kan Pa Pathian in,

¹⁷a ṭhami kha nan sim ih a tuah tla nan tuah theinak dingah ralṭhatnak le thazaang cahnak thawn lo khatter hram seh.