Read Falam Chin 2 THESALON 3 Bible Online

2 THESALON 3 - Falam Chin bible

2 THESALON 3

¹A netnak ah u le nau tla, Bawipa ih Thuthang cu nanmah lakih a karhzai bangtuk in zamrangin a karhzai vivonak dingah le sunloihnak thawn an cohlannak dingah thla in cam sak uh.

²Bawipa ih Thuthang cu mi hmuahhmuah in an zum lo ruangah Pathian in miṭha lo le mi sualral pawl hnen ihsin in runsuak dingah thla in cam sak uh.

³Sikhalsehla Pathian cu rintlak a si, amah in thazaang a lo pe ding ih Misualral pa hnen ihsin a lo humhim ding.

⁴Kan lo zirhmi pawl hi nan thlun rero ih hmailam khalah nan thlun vivo ding ti Bawipa ah rinsannak kan nei.

⁵Pathian duhdawtnak le Khrih ih a lo pekmi tuartheinak cu tam sinsin ih nan theih theinak dingah Pathian in lo hruai vivo hram seh.

⁶U le nau tla, kan thuzirhmi bangtuk ih a thlun lotu unau pawl le mi zaangzel pawl cu hrial uh, tiah kan Bawipa Jesuh Khrih hmin in thu kan lo pe a si.

⁷Kan tuahmi vekih tuah ding cu nan thei fiang a si. Nan hnenih kan um laiah khan zaangzel in kan um lo.

⁸A man pek loin kan lakmi zianghman a um lo. Kanmah rori in kan ṭuan, kan cangvai ih zo hrang hmanih thilrit si lo dingin a sunzan in kan ṭuan a si.

⁹Hitiih kan ṭuannak cu nanmah ih bom dingah dil theinak thu kan neih lo ruangah a si lo; nanmah ih cawn dingah kan ṭuanmi a si.

¹⁰Nan hnenih kan um laiah khan, “Hna a ṭuan duh lotu cu rawl khal ei hlahseh,” tiah kan lo sim ṭheu.

¹¹Hitiih kan lo simnak cu nanmah sungah mi hrekkhat zaangzel in an um ih hnaṭuan zianghman zuam loin midang hnaihnawh lawng an thiam.

¹²Cubangtuk ih a nungmi pawl hnenah felfai teih nung dingah le mahih pumcawmnak hrang ṭuan ve dingah Bawi Jesuh Khrih hmin in kan forhfialmi le ralrinnak kan pek duhmi an si.

¹³Sikhalsehla nannih u le nau tla, thil ṭha tuah cu ning hlah uh.

¹⁴Hi cakuat sungih thu vekin a thlun duh lotu nanmah sungah an um meen ding. Cubangtuk mi cu zohman in pawl hlah uh, a ningzak seh.

¹⁵Asinain ral vekin zoh hlah uh; unau bangtuk in nun sim uh.

¹⁶Daihnak hram a si mi kan Bawipa in daihnak cu a phunphun in ziangtik caan khalah lo pe hram seh. Bawipa cu nan zate hnenah um hram seh.

¹⁷Keimah Paul in cibai ka lo buk timi hi keimah ih kut rori in ka nganmi a si. Ca ka kuatmi kipah hiti in ka hmin ka khen ih ka ngan a si.

¹⁸Kan Bawipa Jesuh Khrih zaangfahnak cu nan zate hnenah um hram seh.