Read Falam Chin 1 TIMOTE 1 Bible Online

1 TIMOTE 1 - Falam Chin bible

1 TIMOTE 1

¹In Runtu kan Pathian ih thupeknak in le kan ruahsannak a si mi Khrih Jesuh zaarin Khrih ih tirhthlah a si mi keimah Paul in,

²kan rinnak sungah ka fapa ngaingai a si mi Timote na hnenah ca ka lo kuat. Kan Pa Pathian le kan Bawipa Khrih Jesuh in ngilneihnak, zaangfahnak le daihnak lo pe hram seh.

³Masidonia peng ka feh zawng ih ka lo fial zo bangin Efesa khua ah um dingin ka lo duhsakmi a si. Efesa khua ih thurin dik lo a zirhtu kha cubangtuk ih zirh nawn lo dingin va kham rori aw ti ka duh.

⁴El awknak lawng a suaktertu thuanthu menmen le cem thei lo ko ih rak nganmi an suahkehnak pupa hmin pawl uarnak khal hlon dingah sim hai aw. Ziangahtile cubangtuk pawl cun Pathian tumtahnak an kimter thei lo. Zumnak lawngin Pathian tumtahnak cu theih thei a si.

⁵Hi bangtuk ih ka lo fial tikah ka tumtahmi cu, thinlung thiang sungin a rami duhdawtnak, le siaṭha thleidannak thinlung thiang le a felmi zumnak um seh ti duhnak ruangah a si.

⁶Hi bangtuk hi mi hrekkhat cun an tlansan ih aat-thlak thu-el awknak sung an thleng.

⁷Pathian ih daan thuhla ahcun zirhtu saya ṭuan an duh; asinain anmah ih simmi lala hman a tican an thei lo ih a theizet le lunghmuizet vekih an simmi thu khal an thei ngah ngaingai lo.

⁸Daan cu a sinak ding vekih hmanah cun a ṭhami a si ti kan thei.

⁹Asinain kan ciin ding a ṭulmi cu, daan timi cu miṭha hrangih tuahmi a si lo; daan a buartu, miṭha lo, Pathian upatnak nei lo le mi sualral pawl, biaknak siseh thlarau lam siseh zianghman ih a siar lotu pawl, an nu le an pa a thattu pawl, laithat pawl,

¹⁰cin le daan nei loih a nung pawl, mihur pawl, sal zuarnak in sumtuah pawl, thuphan per pawl, thu theihpitu dik lo pawl, cule thurin dik kalhkih ih a nungtu pawl, cu pawl hrangih tuahmi a si.

¹¹Cubangtuk zirh awknak cu than dingih i fialmi Thuthang ṭha sungah a um ih cuih Thuthang ṭha cu sunloih le upatin a ummi Pathian hnen ihsin a rami a si.

¹²Ka hnaṭuan ka ṭuan theinak ah thazaang i petu kan Bawipa Khrih Jesuh hnenah lungawi thu ka sim. Hlanah cun Amah cu ka simsia, ka hrem ih ka hmuhsuam ciamco naón,

¹³Amah riantu dingah i hril ih a hnaṭuantu ding tlak ih i ruah ruangah ka thangṭhat a si. Pathian cu i zaangfahtu a si, ziangahtile zumnak zianghman ka rak nei lo ih ka tuahmi hi ziang a si ti hman ka rak thei lo.

¹⁴Bawipa in a tamzetmi a zaangfahnak thawn i run burh ih zumnak le duhdawtnak i pek. Cuih zumnak le duhdawtnak cu Khrih Jesuh thawn kan pehzom awknak thawngin kan ta an si zo.

¹⁵Khrih Jesuh cu misual pawl rundamsuak dingah leilung ah a rung ṭum, timi hi a dikmi ṭong a si ih famkim zetin pom tlak le zum tlak a si. Cuih misual pawl lakah kei hi misual bik ka si.

¹⁶Sikhalsehla Pathian cu ka parah zaangfahnak a nei ih Khrih Jesuh a thinsaunak le a lungnemnak ka parih a langnak dingah a si. Cubangtuk in Khrih Jesuh lungnem thinsaunak kei misual bik miangmo parih a thlennak cu neh hnuah mi in amah an zum ih kumkhua nunnak an ngahnak dingih zohṭhim dingah a si.

¹⁷Kumkhua in Siangpahrang a si mi, thih ni nei lo, le mit-ih hmuh theih lo, amah lawng Pathian taktak a si mi, a hnenah upatnak le sunlawinak kumkhua in hmun camcin seh! Amen.

¹⁸Timote, ka fapa, na tuah dingmi pawl na hnenah ka lo ap. Hitiih ka lo ap tikah a hlanah nangmah ih thu-ah profet ih a rak simmi thawn a kaih awmi a si. Cuih profet simmi pawl cu raldonak hriamnam ah hmang awla,

¹⁹thinlung thiang nei in na zumnak fekter aw. Mihrek cu an siaṭha thleidan thiamnak thinlung an thlun duh lo ruangah an zumnak an siatter ṭheu.

²⁰Cubangtuk mi lakah Himenaias le Alexander tla an tel ih an pahnih in Satan kut sungah ka pek. Hi bangtuk ih ka tuahmi cu Pathian an simsiatnak reh seh tinak ah a si.