Read Falam Chin 1 TIMOTE 3 Bible Online

1 TIMOTE 3 - Falam Chin bible

1 TIMOTE 3

¹“Zo khal in kawhhran hruaitu si a duh ahcun hnaṭuan ṭha duhtu a si,” timi hi thudik a si.

²Kawhhran hruaitu cu soiselnak nei lomi a si ding. Nupi pakhat lawng a neitu,[3] rit theinak thil ih a suup aw theimi, a uk aw theimi, felfai zoh rem in a nungmi, mikhual a zohthiamtu le mi zirh a thiamtu a si ding.

³Zurit hmangmi a si lo ding ih, thinsuup aw thei lo, midang thawn a to aw ṭheumi khal a si lo ding. Sikhalsehla mi lungnem le daihnak a duhtu a si ding. Tangka duh tukmi a si lo ding.

⁴A innsang ṭhatein a ho theitu a si ding ih a faate pawl cu mi thu a ngaimi le mi upat thiammi a si ding.

⁵Amah ih innsang hman ṭhatein a kilkhawi thei lo ahcun ziangtinso Pathian ih kawhhran a kilkhawi thei ding.

⁶Zumnak lamah lungthleng pekte a si lo ding; culo ahcun a zum aw sual pang ding ih Satan cu hnon a rak ton vekin anih khal hnon a tong ve pang ding.

⁷Pathian awi lo misenpi pawl ih an upatmi a si ding; cubangtuk a si lo ahcun mi ih relsiat a tong ding ih Satan ih thang ah a awk aw ding.

⁸Kawhhran Upa pawl cu ziaza ṭha a neimi le ṭong tam lo thinlung tluangtlammi si hai seh. Zu in le tangka a duh tukmi an si lo pei.

⁹Pathian ih a run phuanmi thutak kha a siaṭha thleidannak thinlung thiangte in hngette ih a pomtu an si ding.

¹⁰Upa ṭuan a duh pawl cu hniksak hmaisa an si pei ih soiselnak um lo an si le an ṭuan pei.

¹¹An nupi khal[4] ziaza ṭhami an si ding ih mi relsia ih ṭong tammi an si lo pei. Zu in lomi an si ding ih ziangtinkim ah mifel an si ding.

¹²Kawhhran Upa cu nupi pakhat lawng a neitu[5] a si ding ih a innsang le a faate pawl ṭhatein a uk theitu a si ding.

¹³An hnaṭuan felteih a ṭuan theitu upa cu upat an co ih Khrih Jesuh an zumnak thu kha ralṭha zetin an phuang ngam a si.

¹⁴Na hnenih hi cakuat ka ngan laiah hin a rei hlanah ka ra lo tong cing ding tiin ka ruat.

¹⁵Sikhalsehla ka tlai pang a si ahcun Pathian innsang a si mi kawhhran sungah ziang bangtuk in so kan umtlandan a si ding, ti kha hi ka cakuatmi in a lo sim ding. Pathian innsang cu kumkhua in a nungmi Pathian ih kawhhran a si ih cuih kawhhran cu thudik hramṭoh-nak le a dinhngettu ṭhuam a si.

¹⁶Kan biaknak sungih thuthup hi a tum ngaingai a si, ti cu zokhal in an el thei lo ding: Amah cu minung taksa in a suak, a dikmi a si thu Thlarau in a langter; Cule vancungmi khal in an hmu; A thuhla cu miphun zakip hnenah phuan a si ih leilung khuazakipah an zum. Cule sunlawinak ah lakso a si.