Read Falam Chin 1 TIMOTE 4 Bible Online

1 TIMOTE 4 - Falam Chin bible

1 TIMOTE 4

¹Caan neta lamah cun mihrek in Khristian thurin hi an taan ding; bumtu thlarau an zum ding ih khawsia ih zirhnak an thlun ding, tiah fiangtein Thlarau in a sim.

²Cubangtuk zirhnak cu thuphanper mibum thiam pawl in an zaiter. An siaṭha thleidannak thinlung cu thirling ih holh kangmi bangin a thimi a si.

³Cuih pawl cun nupa ṭhit awk le rawl hrekkhat ei tla a ṭha lo tiin an zirh. Sikhalsehla Pathian in cuih rawl pawl cu ei dingah a tuah ih Pathian a zumtu le thutak a theitu pawl hrangah cun lungawi thlacamnak thawn ei dingah a ṭhami a si.

⁴Pathian ih a tuahmi hmuahhmuah cu an ṭha ṭheh; zianghman hnon ding an um lo. Sikhalsehla ziang hmuahhmuah cu lungawi thlacamnak thawn cosaan ding a si;

⁵ziangahtile Pathian ih thu le thlacamnak in a thiang ah a canter.

⁶Hi zirh awknak hi Khristian kan unau pawl na sim a si ahcun Khrih Jesuh riantu ṭha na si ding. Nangmah khal na thlun rero zomi a dikmi thuzirhnak le zumnak ṭongkam ihsin thlarau lamah na cawm aw a si.

⁷Asinain Pathian thu thawn pehtlaihnak zianghman a nei lomi simrel tlak lo thuanthu menmen pawl cu hrial aw. Pathian duhzawng ih nung dingin zirh-aw ringring aw.

⁸Taksa harhdamnak ih zirmi cu man a nei ve ko naón thlarau harhdamnak hrangih zirmi cu ziangtinkim in man a nei. Ziangahtile atu-ah siseh, hmailam hrang khalah siseh, in tiamkammi cu nunnak a si.

⁹Hiti ka simmi hi a dikmi ṭong a si ih zumtlak le cotlak an si.

¹⁰Rethei zet le harsa zetin hna kan ṭuan; ziangahtile kumkhua in a nungmi Pathian parah kan ruahsannak kan bun. Cuih Pathian cu mi hmuahhmuah Rundamtu a si ih amah a zumtu pawl hrangah a si hleice.

¹¹Hi thlun dingmi le thuzirhnak pawl hi sim awla zirh aw.

¹²Mino na si ruangah zohman in lo nautat hlah hai seh. Sikhalsehla na hmurka na ṭong daan, na umtlan na ziaza, duhdawtnak le zumnak le thianhlimnak khalah zumtu dang pawl ih zohṭhim dingin nung aw.

¹³Na hnen ka ra thlen hlan sung cu misenpi hnenah Ca Thianghlim siar awla, thusimnak le thuzirhnak in na tikcu le na thazaang rak hmang aw.

¹⁴Profet pawl in thu an phuang ih upa pawl in na lu tlunih an kut an suan zawng ih na ngahmi thlarau laksawng kha thlahthlam hlah.

¹⁵Na ṭhanso zia kha mi hmuahhmuah ih an hmuhnak dingah himi pawl hi na tikcu le na thazaang pe in hmang aw.

¹⁶Na nundaan ralring awla na zirhmi tla ralring aw. Himi pawl hi cat loin tuah aw. Na tuah ringring thei a si ahcun nangmah le na thusimmi a theitu pawl kha na rundam ngah ding a si.