Read Falam Chin 1 TIMOTE 5 Bible Online

1 TIMOTE 5 - Falam Chin bible

1 TIMOTE 5

¹Upa pawl kha va kawk hlah; na pa vekah ruat in neemte in forh hai aw. Mino deuh kha na unau-ah ruat aw.

²Nunau upa deuh cu na nu bangtuk ah ruat awla, nunau no deuh pawl cu thinlung thiangte in na farnu bangtuk ah ruat aw.

³Mahte lawng khua a sami nuhmei pawl kha upat aw.

⁴Sikhalsehla nuhmei nu in faate a si lole tu a neih ahcun a hmaisabik ah cuih tu le fa pawl cun an nu le an pa, a si lole an pi an pu pawl kha an daanih a fial vekin kilkhawi hai sehla cawm ve hai seh. Ziangahtile cumicu Pathian lungawitertu a si.

⁵Mahte lawng khua a sami nuhmei cu, kilkhawitu zohman a neih lo ruangah, Pathian lawng a rinsan ih a sun a zanin thla a cam ih bomnak a dil.

⁶Sikhalsehla tisa nomnak hrangih a taksa a hmangmi nuhmei cu a nung cingin a thi a si.

⁷Nuhmei pawl cu zohmanih mawhthluk lomi an sinak dingah hi thuzirhnak pawl hi rak sim aw.

⁸Sikhalsehla mi pakhat cu a sungkhat, amah ih innsang sung hman kilkhawi loin zianghman ah a siar lo a si ahcun a zumnak a dungtun a si ih zum lotu hnak hmanin a sual sawn a si.

⁹Ziang bangtuk nuhmei hman kum sawmruk tlun a si lo ahcun nuhmei cazin sungah telh hlah. Cuih tlunah cuih nuhmei nu cu voikhat lawng pasal a neimi siseh.[6]

¹⁰Hnaṭuan ṭhatnak ah hmin a neimi siseh. Hnaṭuan ṭha timi ahcun: a faate a kilkhawi thiamtu, mikhual zoh thiamtu, hnaṭuan nauta bik kekholh khal Khristian unau parah a ṭuan zuamtu, harsat mangbang an ton caanah mi a bawmtu, le thilṭha tuah ah a tikcu le a thazaang a petu, timi pawl hi an si pei.

¹¹Sikhalsehla nuhmei no deuh pawl cu nuhmei cazin sungah rak telh hlah. Ziangahtile pasal neih an duh sal tikah Khrih kha dung an tun ṭheu.

¹²Cuticun Khrih hnenih an thukammi an siatbal ih mawhthluk an tong.

¹³Culawng si loin inn khat hnu inn khatah an vak ih a lakin an tikcu an cemter. Cu hnakih a sia sinsin cu: an ṭong a tam, mi an relsia, mi tinkim an tokhrok ih ṭong lo ding khal an ṭong.

¹⁴Curuangah kum no deuh nuhmei pawl cu pasal nei hai sehla faate tla nei in an inn kilkhawi hai seh ti ka duh. Cuti asile kan ral pawl in kanmah thangsiatnak caanṭha an ngah lo ding.

¹⁵Ziangahtile nuhmei hrekkhat cu Satan thlun duh ah in tlansan zo.

¹⁶Sikhalsehla Khristian nunau in a innsang ah nuhmei a neih ahcun kawhhran phurh ritter lo dingin amah in cawm seh. Cuti cun cawmtu nei loih khua a sami nuhmei taktak pawl kha kawhhran in a zoh thei ding a si.

¹⁷Kawhhran Hruaitu, hnaṭuan ṭha a ṭuantu cu ṭuan man a let hnih in ngah tlak an si. Cuih hruaitu lakah thusimnak le thuzirhnak ih a zuamzet pawl cun ngah tlak an si cuang.

¹⁸Ziangahtile Ca Thianghlim in, “Fang a ciil rerotu cawcang a hmur ṭem hlah,” a ti ih, “Hnaṭuantu cun a ṭuanman ngah ding a si,” a ti.

¹⁹Thutheitu a mal bik pahnih tal an um lo ahcun kawhhran hruaitu mawh an puhnak cu ngai duh hlah.

²⁰Sualnak a tuahtu pawl cu misenpi hmaiah kawk awla midang in an ṭih deuh ding.

²¹Pathian le Khrih Jesuh le a thianghlim vancungmi hmaika-ah ka lo fial: ziang na tuah khalle zohman thleidannak le duhdannak um lotein hi thuzirhnak pawl hi rak thlun aw.

²²Bawipa ih hnaṭuantu dingah zo par hmanah nawt-sa-ling in kutsuannak va tuah hlah. Midang tuahmi sualnak ah va tel hlah; thianghlim tein um aw.

²³Tidai lawnglawng in loin na pum na le na nat dang nuam deuh dingah sabitti maltete in rak in aw.

²⁴Mi hrekkhat an sualnak cu fiangtein a lang ih thuṭhennak ah an sualnak cu anmah ih hlanah a thleng hmaisa; sikhalsehla midang sualnak cu neh hnupi lawngah a lang.

²⁵Cubangtuk in hnaṭuan ṭha cu fiangtein a lang ih a lang hrih lomi khal thuh-ralta a theih lo.