Read Falam Chin 2 TIMOTE 1 Bible Online

2 TIMOTE 1 - Falam Chin bible

2 TIMOTE 1

¹Khrih Jesuh thawn kan pehzom awknak ruangih in tiam ciami nunnak thu phuang dingah Pathian lungkimnak in Khrih Jesuh ih tirhthlah keimah Paul in,

²ka duhdawtmi ka fapa Timote na hnenah ca ka lo kuat. Pathian kan Pa le Khrih Jesuh kan Bawipa in ngilneihnak, zaangfahnak le daihnak lo pe hram seh.

³Ka pu le ka pa ih an rak rianmi le thinlung thiangte ih ka rian vemi Pathian hnenah lungawi thu ka sim. A sun a zanih ka thlacamnak ih nangmah ka lo theihtinte in Pathian hnenah lungawi thu ka sim a si.

⁴Na mitthli a tlak kha ka cing ringring ih ka lungawinak tlamtling dingin lo tong thei ningla ti ka duhzet.

⁵Zumnak fel na neihmi kha ka ciing ringring. Cuih zumnak cu na pi Lois le na nu Zunis in an rak neihmi zumnak a si. Atu khalah cuih zumnak cu na nei lai a si, tiin ka zum.

⁶Curuangah na lu parih kutsuannak ka tuah laiih Pathian ih a lo pekmi laksawng kha nung ringring dingin kilkhawi aw tiah ka lo theihternak a si.

⁷Ziangahtile Pathian ih in pekmi Thlarau in ṭihhrutmi ah in tuah lo; cahnak huham, duhdawtnak le mah le mah uk-awk theinak in in khatter sawn a si.

⁸Kan Bawipa ih thu cu mi sim dingah na ningzak hlah. Khrih hrangih thawng a tlami keimai hrang khalah na ningzak hlah. Pathian ih thazaang a lo pek vekin Thuthang ṭha hrangah zonzaihnak tuar ngam sawn aw.

⁹Pathian in amah ih minung si dingah in ko ih in rundamsuak zo. Cutiih in rundam suaknak cu kanmah tuah theimi kan neih ruangah a si lo, a zaangfahnak le tumtahnak a neihmi ruangah a si sawn. Hi a zaangfahnak cu Khrih Jesuh hmangin caan hramthok hlan ihsin in rak pek zo.

¹⁰Asinain in Runtu kan Bawipa Khrih Jesuh a ratnak sungin atu-ah kan hnenah a langter a si. Thihnak ih hmual cu a cemter ih Thuthang ṭha sungin kumkhua nunnak a langter zo.

¹¹Pathian in Thuthang ṭha phuang dingah tirhthlah le zirhtu ah i hril zo.

¹²Hi bangtuk ih ka tuarnak cu cutiih in hrilnak ruangah a si. Sikhalsehla ka rinsan ngah-mi hi zo a si ti ka theih ruangah hnangam lunghmuinak ka nei. Curuangah a kut sungih ka kiltermi[1] thil cu cuih Ni a thlen tiangin himte in amah in a kilkhawi ding tiah fiangtein ka thei.

¹³Ka lo zirh ciami thudik cu hngetzet in kai ṭha awla na thlun ding le na zohṭhim dingah re ṭha aw. Khrih Jesuh thawn kan pehzom awknak ruangih kan ta a si mi zumnak le duhdawtnak sungah um ringring aw.

¹⁴Kan sungih a nungmi Thlarau Thianghlim ih cahnak in na hnenih a lo pekmi thil ṭha pawl cu kil ṭha aw.

¹⁵Asia peng sungih a ummi hmuahhmuah in in dungtun ih in tlansan ṭheh zo ti cu na thei. Cuih sungah Figelas le Hermogenes khal an tel.

¹⁶Asinain Onesiforas cun voi tampi ka thin i nuamter ruangah Bawipa in a zaangfahnak cu a innsang sungah thlenter hram seh.

¹⁷Thawng sungah ka um naón i zahpi loih Rom khua a ra thlen vete in i hmuhsuak hlan lo i hawl ciamco.

¹⁸Khi Ni ah Bawipa in zaangfahnak pe hram seh. Cule Efesa khua ah ziang tlukin ka hrangah hna a ṭuan ti khal fiangtein na theihmi a si.