Read Falam Chin TITAS 2 Bible Online

TITAS 2 - Falam Chin bible

TITAS 2

¹Asinain nang cun a dikmi thurin thawn a kaih awmi kha na zirh pei.

²Patar deuh pawl kha zu ri hlah uh, thinlung felfai in um uh, nan thinlung uk thei uh; zumnak dik, duhdawtnak le harsat tuartheinak neimi si uh, tiah zirh aw.

³Cubangtuk ṭhiamṭhiam in nutar deuh pawl kha nunau si ding daan te in nun thianghlim nei dingin zirh aw. Mi relsiat hmang an si lo pei ih zu-ih salah an tla lo pei. A ṭhami an zirh pei ih,

⁴nutar deuh pawl in kum no deuh nunau pawl cu an pasal le an faale pawl duhdaw deuh dingin,

⁵mah le mah uk-aw theitu si dingin, mithiang si dingin le an pasal thu ngai in tangdor thiammi nupi ṭha ih an cannak dingah zirh dingin sim aw. Cutiin Pathian hnen ihsin a rami thuthang cu zohman in an relsia lo ding.

⁶Cubangtuk thothoin tlangval pawl khal mah le mah uk-aw theitu an sinak dingah forh aw.

⁷Ziang hmuahhmuahah nangmah rori zohṭhim tlak in um aw. Rintlak mifel si awla thu na zirh tikah thungaithlak in zirh aw.

⁸Zohman ih soisel thei lo dingin ṭongkam ṭha hmang awla kan ral pawl in soisel ding in thei lo ding ih an ning lehlam a zak sawn ding.

⁹Sal pawl cu nan bawi pawl ih tangah dor uhla ziangtinkim ah an lungawiter uh, tiah sim aw. An thu sawnkir hlah hai seh.

¹⁰Cule an thil khal ru hlah hai seh. Miṭha an sinak le rinsantlak an sinak kha langter sawn hai sehla, cuticun an tuahmi kipah in Runtu kan Pathian ih thu kan zirhmi parah thangṭhatnak an thlenter ding a si.

¹¹Ziangahtile Pathian in a zaangfahnak cu mi hmuahhmuah rundam dingah a langter zo.

¹²Cuih zaangfahnak in Pathian ziaza thawn a mil-aw thei lomi nun daan le leilung taksa hiarnak pawl baansan dingah in zirh. Cule mah le mah a uk-aw theimi le dingnak le hi leikhawvel ah hin Pathian ih duhzawng thawn a mil-awmi ziaza ih kan nun theinak dingah in zirh fawn.

¹³Cutiin a maksakmi kan Pathian le in Runtu Jesuh Khrih ih sunlawinak a lang ding tiin kan ruahsanmi Ni sunglawi cu kan hngak a si.

¹⁴Amah ih nunnak rori kha kannih pawl ṭhatlonak ihsin runsuak dingah le thil ṭha tuah a hiartu si dingah le amah ih bulta mithiang ih in canternak dingah kan hrangah a pek zo.

¹⁵Hi thu pawl hi zirh awla na thusim a ngaitu pawl thazaang na pek ah siseh, nun na sim tikah siseh, na thuneihnak kha famkim zetin hmang aw. Zohman in lo hmuhsuam hlah hai seh.