Read Falam Chin TITAS 3 Bible Online

TITAS 3 - Falam Chin bible

TITAS 3

¹Uktu bawi le thuneitu upa pawl ih tangah dor in an thu nan ngai pei; cule thil ṭha tuah dingah timtuah ciain nan um ringring pei, tiah na milai pawl sim aw.

²Zokhal nan relsia lo pei; daite le rualremte in nan pawl-aw niakno pei ih mi hmuahhmuah parah lungnemnak le umtlanzia thiamnak nan langter ringring pei, tiah sim aw.

³Ziangahtile kanmah hman hi tuih hlanah cun kan rak aa, thu ngai lomi kan rak si ih kan rak palh a si. Taksa hiarnak le tisa nomnak a phunphun ih sal kan rak si. Mi nahsuahnak le mi thiiknak in kan tikcu kan rak hmang. Mi in in hua ih kannih khal in kan hua ve.

⁴Sikhalsehla in Runtu kan Pathian ih zaangfahnak le duhdawtnak a rung lang tikah,

⁵kannih cu in rundamsuak. Kanmah in thilṭha kan tuah ruangah si loin amah ih zaangfahnak ruangah in rundam suak ih hrintharnak le nun tharthawhnak in petu Thlarau Thianghlim ih kholhfainak ruangah a si.

⁶In Runtu Jesuh Khrih sungin Thlarau Thianghlim cu kan parah famkin zetin Pathian in a run toih;

⁷cumicu a zaangfahnak ruangih Pathian thawn kan rem awk theinak dingah le kan ruahsanmi kumkhua nunnak cu kan ta a si theinak dingah a si.

⁸Hi thu cu thudik a si. Hi thu pawl hi thupi an si tiah a hleice ih na ruah dingah ka duhmi a si. Ziangahtile Pathian a zumtu pawl cun thilṭha tuahnak ah an tikcu hmang ding an si. Cumi cu mi hmuahhmuah hrangah a ṭhami le santlaimi an si.

⁹Sikhalsehla aat-thlak thu-el awknak, pupa hmin cazin sau zetzet thu el awknak, tawh awknak le Daan thu-el awknak pawl cu hrial aw. Cumi pawl cu ṭhathnemnak le man neihnak ziang hman a um lo.

¹⁰Ṭhenṭheknak a suahtertu kha ralrinnak a mal bikah voi hnih pe ta aw; cuih hnuah cun a pawl khal pawl nawn hlah.

¹¹Cubangtuk minung cu miborhhlawh le misual a si ti na thei ih a sualnak in hnonmi a siter.

¹²Na hnenah Artemas, a si lole Taikhikas ka rak thlah vete in Nikopolis ah zamrangte in i ra tong aw. Ziangahtile cutawkah thlatang sung ka um ding.

¹³Apollos le sih-ni Zenas khualtlawn an thawh tikah rak bawm awla an ṭulmi hmuahhmuah rak tawlrel sak aw.

¹⁴Kan milai pawl cu thilṭha tuahnak ah an caan hmang hai seh; cutiin an tuah asile a ṭulnak ih kipah mi an bawm thei ding. Santlaihnak nei loih um meen ding an si lo.

¹⁵Ka hnenih a ummi pawl in cibai an lo buk. Zumnak sungih in duhdawtu pawl kha cibai in rak buk sak aw. Nan zate hnenah Pathian zaangfahnak um hram seh.