Read Falam Chin HEBRU 1 Bible Online

HEBRU 1 - Falam Chin bible

HEBRU 1

¹Hlanlaiah Pathian in kan pupa pawl hnenah voi tampi a phunphun in profet pawl hmangin thu a rak sim.

²Sikhalsehla hi ni neta bik lamah cun kan hnenah a Fapa sungin a sim a si. Cuih a Fapa hmangin Pathian in lei le van a sersiam ih a netnak ah ziang hmuahhmuah nei ṭhehtu si dingin Amah cu a hrilmi a si.

³Amah cu Pathian sunlawinak langtertu a si ih Pathian sinak famkim a nei. Huham a neimi a thu in leikhawvel le vantlolak pumpi cu a cawmdawl ih a fingkhawi. Minung pawl ih sual ngaidamnak le sual thianternak a tuah ṭheh hnuah vancungah Cungnungbik Pathian ih vorhlamah a to.

⁴Pathian in a Fapa hnenih a pekmi hmin cu vanmi pawl ih hmin hnakin a cungnung sawn bangtuk in a Fapa cu vanmi pawl hnakih cungnung sawn in a ret.

⁵Ziangahtile Pathian in ziangbangtuk vancungmi hman: “Nangmah cu ka Fapa na si; tuihsun ah na Pa ah ka cang zo,” a ti dah lo. Cuih tlunah ziangbangtuk vancungmi thu khalah, “Keimah cu a Pa ka si ding ih, amah cu ka Fa a si ding,” a ti dah lo.

⁶Sikhalsehla Pathian in a fatir leilungih a run thlah tikah, “Pathian ih vancungmi hmuahhmuah in amah cu an biak ding,” tiah a ti.

⁷Sikhalsehla vancungmi pawl thu ahcun, “Pathian in a vancungmi pawl cu thli ah a tuah ih, A hnaṭuantu pawl cu mei-alh ah a tuah a si,” a ti.

⁸Cule a Fapa thu ah Pathian in, “Nangmah cu Pathian na si ih, na bawi tokham cu kumkhua in a hmun ding; Na minung pawl dingnak in na uk ding.

⁹Dingnak na duh ih sualnak na hua. Curuangah a si Pathian, Na Pathian in a lo hril ih, Na rualpi pawl hnenih a pekmi hnakin a tum cuangmi upat lungawinak a lo pek,” a ti.

¹⁰“Cule Bawipa nangmah in a hramthokah leilung cu na seemsuah ih, Na kut rori in van tla khi na sersiam a si.

¹¹Cu pawl cu an hloral ding, sikhalsehla nang cu na hmun ding. Annih cu puan bangin an ṭet ding a si.

¹²Angki bangin na bil ding ih hnipuan bangin an thleng aw ṭheh ding a si. Sikhalsehla nang cu nangmah keel na si ringring ih na nunnak cu cem ti a nei lo,” a ti.

¹³Pathian in a vanmi hnenah, “Na ral pawl cu na kephah ih ka ret hlan lo, ka vorhlamah to aw,” a ti dah lo.

¹⁴Cuti asile vancungmi pawl cu zo so an si? Annih cu Pathian a riantu thlarau an si ih rundamnak a ngahtu ding pawl bawm dingah Pathian ih thlahmi an si.