Read Falam Chin HEBRU 10 Bible Online

HEBRU 10 - Falam Chin bible

HEBRU 10

¹Judah mi pawl ih Daan cun a ngaingai a si mi kha felte le kimtein a langter thei lo; a ra thleng dingmi thil ṭha ih thluathlam lawng a si. An tuah ṭheumi raithawinak kha kumtinte an tuah ringring. Cutiin asile ziangtinso Daan ih a fialmi hi bangtuk raithawinak pawl hmangin Pathian a pantu minung pawl cu mi famkimah a tuah thei ding?

²Pathian a biatu pawl an sualnak ihsin thianfaitermi rak si ngaingai hai sehla an sual phuhrunawknak an nei nawn lo ding ih raithawinak hmuahhmuah a um nawn lo ding.

³Sikhalsehla thil umdaan ngaingai ahcun kumtinte an sualnak an theihnak dingah raithawinak cu a rak si riangri.

⁴Ziangahtile cawcang thisen le me thisen in sualnak cu a tlengfai thei dah lo.

⁵Cubangtuk a si ruangah leilungih Khrih a rung lang zik tikah Pathian hnenah, “Raithawinak le peknak cu na duhmi an si lo; sikhalsehla ka hrangah taksapum na remruat zo.

⁶Ṭilva pum ih pekmi mei-ur thawinak parah lungkimnak na nei lo. Sual thianfainak dingih raithawinak khalah lungawinak na nei cuang lo.

⁷Cule Daan cabu sungih ka thuhla an nganmi vekin a hnenah, ‘Maw Pathian, na duhmi tuah dingin hinah ka um,’ ka ti,” tiah a sim.

⁸A hmaisa bikih a simmi cu, “Raithawinak le hlanmi ah siseh, biakṭheng parih ṭilva le sual thianfainak hrangih raithawinak ah siseh, na lungawi zawng le na duhmi khal an si lo,” a ti. Hi raithawinak pawl cu Daan vekih tuahmi an si ṭheh ko naón hi bangtuk in a sim thotho.

⁹Cuih hnuah anih in, “Maw Pathian, na duhmi tuah dingah hinah ka um,” tiah a ti. Curuangah Pathian in raithawinak hlun pawl cu a hnong thluh ih cuih ai-ah Khrih raithawinak a ret.

¹⁰Ziangahtile Pathian in tuahter a duhmi cu Jesuh Khrih in a tuah ṭheh ruangah amah ih taksapum kumkhua daih in a pek awknak thawngin kan sualnak ihsin in tlengfai a si.

¹¹Judah puithiam pawl in an ṭuanvo cu nitinte an tuah ih an pek ṭheumi raithawinak cu voi tampi an pek. Sikhalsehla raithawinak in sualnak cu a tlengfai dah lo.

¹²Asinain Khrih in sualnak hrangah raithawinak cu voikhat a pek ih cucu kumkhua daih a si; cuih hnuah Pathian vorhlam kamah a to.

¹³Cutawk ihsin Pathian in a ral pawl a ke-phah ih a tuah hai hlan sung a hngak.

¹⁴Voikhat raithawinak in sualnak ihsin a tlengfaimi pawl cu kumkhua mi famkimah a tuah a si.

¹⁵Cule Thlarau Thianghlim khal in a theihpinak kan hnenah a langter. A hmaisabik ah Thlarau Thianghlim in,

¹⁶“Himi hi Bawipa ih ṭongkam a si: Hmailam caanah anmah thawn kan tuah dingmi thukam cu hiti in a si; Ka daan pawl an thinlung sungah ka re ding ih an ruahnak parah ka ngan ding,” a ti.

¹⁷Cuih tlunah a sim sal ih, “An sualnak le an siatnak pawl cu ka ciing nawn lo ding,” tiah a ti.

¹⁸Cubangtuk in an sualnak ngaidam a si ahcun sualthawinak a ṭul nawn lo.

¹⁹Curuangah u le nau pawl, Jesuh thihnak thawngin Hmun Thianghlim Bik sungih luh theinak luatnak famkim kan nei zo.

²⁰Amah in puanzar thlek tahratin lamzin thar, lamzin nung, in on sak zo. Cuih puanzar cu amah ih taksa pum kha a si.

²¹Vancung ih Pathian innpi kilkhawitu dingah Puithiam Saang bik kan nei.

²²Curuangah thinlung tak ngai le zumnak fel thawn Pathian cu naih uhsi. Mawhnak thinlung thianfaitermi le tidai thiang thawn tlengfaimi kan taksapum thawn Pathian cu pan uhsi.

²³Ruahsannak kan nei tiih kan langtermi kha hngetkhoh zetin pom uhsi; ziangahtile a thukamnak a kimtertu Pathian cu rintlak a si.

²⁴Pakhat le pakhat zawnruahnak nei uhsi; pakhat le pakhat bawm aw in duhdawtnak le ṭhatnak khal langter ton uhsi.

²⁵Hmunkhatih kan pumkhawm ṭheumi kha baansan hlah uhsi. Mihrek cun an baansan naón Bawipa ih Ni a nai vivo ruangah, kannih cu pakhat le pakhat thazaang pe-aw sinsin ding kan si.

²⁶Thudik kan theih ngah hnuah sualnak kha thei cingin kan tuah vivo thotho a si ahcun sual thianfai theinak dingah sual hrang raithawinak zianghman a um nawn lo.

²⁷An hrangih a taangmi an covo cu a thleng cing dingmi Pathian thuṭhennak le Pathian a dodaltu pawl a kaangfai ṭhehtu ding ṭihnungza meisa kha ṭih thlohthlo in an hngak ding lawng a si thlang.

²⁸Moses Daan thu a thlun lotu cu thutheitu pahnih pathum in a sual a si an tinak in a thu an relcatmi cu, zaangfahnak zianghman um loin thah a si.

²⁹Cuti asile, Pathian Fapa ziangih a siar lotu le sualnak ihsin mi a thianfaitertu Pathian thukamnak thisen nautattu le, zaangfahnak a neitu Thlarau a hmuhsuamtu pawl teh ziang bangtuk in tuah an si pei? Cubangtuk minung cu ziangtlukih a nasami hremnak an tuar ding tikha ruat hnik uh!

³⁰Ziangahtile, “Keimah in phu ka la ding, keimah in ka lehrul ding,” a tiih tlunah, “Bawipa in a minung pawl cu an thu a ṭhen ding,” a titu zo a si ti kan thei.

³¹A nungmi Pathian kut sungih tlak cu tuksumza a si.

³²Hlanih nan um daan vun ruathnik uh. Culai ah Pathian tleunak nan hnenih a thlen pek ah khan tuarnak le harsatnak a phunphun nan tong naón cuih harsatnak in a lo neh hai lo.

³³Voikhat khatah misenpi hmuhah hmuhsuamnak le hremnak nan tong ih voi dangah cuti vekih hmuhsuamnak le hremnak a tongtu pawl nan tuarpi ve a si.

³⁴Harsatnak a tongmi thawngtla pawl parah lainatnak nan nei. Nan neihmi thilri hmuahhmuah an lo lon ṭheh tikah nan sunnak cu lungawiin nan tuar thei, ziangahtile hi thilri hnakin a ṭha deuhmi le kumkhua in a hmun dingmi kan nei hrih a si, ti nan thei.

³⁵Curuangah nan thin nau hlah uh, ziangahtile ralṭhatnak nan neih ahcun laksawng tumpi nan ngah ding a si.

³⁶Pathian duhnak tuah thei dingah le a thukammi co thei dingah thinfual in um uh.

³⁷Ziangahtile Ca Thianghlim in, “Caan tawite hnuah a ra dingmi Amah cu a thleng ding, a rei lo ding.

³⁸A dingmi ka miphun in an zum ding ih an nung ding; Asinain dungsiptu an um ahcun, an parah ka lung a awi lo ding,” a ti.

³⁹Kannih cu dungah a siip ih a hloral tami kan si lo. Rinnak nei in rundamnak a cotu sawn kan si.