Read Falam Chin HEBRU 13 Bible Online

HEBRU 13 - Falam Chin bible

HEBRU 13

¹Khristian unau nan si bangtuk in pakhat le pakhat duhdaw aw ringring uh.

²Nan innah mikhual tlunter uhla duhdaw uh. Cubangtuk a tuahtu pawl cu an theih loin an innah vancungmi an tlungter ṭheu.

³Thawngtlami hngilh hlah uh; anmah thawn thawng a tla tlaang bangtuk in ruat aw uh. Harsatnak a tuartu pawl hngilh hlah uh; anmah thawn a tuar tlaang bangtuk in ruat aw uh.

⁴Ṭhitawknak cu zokhal in upat hmaizah ding a si. Nupi le pasal cu zumtlak in um veve hai seh.[4] Nupa sualnak a tuahtu le ṭang ṭawm sualnak a tuahtu pawl cu thu ṭhennak an tong ding.

⁵Tangka duh tuk hlah uh; nan neihmi-ah nan lung kim uh. Ziangahtile Pathian in, “Ka lo tlansan lo ding ih ka lo hnong lo ding,” in ti.

⁶Cuti a si ruangah ralṭha in um uhsila, “Bawipa cu i bawmtu a si, ka thin a phang lo ding. Mi in ziangso ka parah an tuah thei ding?” tiah ti uhsi.

⁷Pathian thu a lo simtu, hlanih nan hotu pawl kha ciing ringring uh. An nun sungih an umtlandan le an thihnak thuhla pawl kha ruat saal uhla an zumnak khal cawng ṭha uh.

⁸Jesuh Khrih cu mizan, tuihsun le kumkhua in a hmun ringring a si.

⁹Zirhnak phun dangdang in lamzin dik ihsin lo pialter hlah hai seh. Kan thinlung thazaang cahnak cu, rawl thuhla ah ei ding, ei lo ding tiih daan sung ihsin ngah loin, Pathian zaangfahnak sung ihsin ngah a ṭha sawn. Daan a thluntu pawl cu cuih an thlunmi daan in a bawm cuang lo.

¹⁰Judah mi pawl Pathian an biaknak ih hna a ṭuantu puithiam pawl in kan biakṭheng parih raithawinak pekmi pawl kha an duhduh in an ei thei lo.

¹¹Ṭilva thisen cu Judah mi Puithiam Saang in sual raithawinak hrangah Hmun Thianghlim Bik sungah a luhpi; sikhalsehla cuih ṭilva ruangpum cu hnarpawn ah an ur a si.

¹²Cuti a si ruangah Jesuh a thih tikah mipi an sualnak ihsin a thisen thawn tlengfai dingah Jesuh cu khawpi lengah a thi.

¹³Curuangah kannih khal hnarpawn ah feh in a tuarmi ningzahnak tuar ve uhsi.

¹⁴Ziangahtile hi leitlunah hin kumkhua a hmunmi khawpi kan nei lo; a ra lai dingmi khawpi lawng kan cuan a si.

¹⁵Curuangah kan raithawinak ai-ah thangṭhatnak cu Pathian hnenah pe ringring uhsi; cuti kan pekmi cu kan kaa in Jesuh cu kan Bawipa a si tiih kan phuannak a si.

¹⁶Ṭhatnak tuah kha hngilh hlah uhla, nan neihmi midang thawn hlawm-awk ding tla hngilh hlah uh; ziangahtile cumi cu Pathian lungawitertu raithawinak an si.

¹⁷Nan hruaitu pawl thu ngai uhla an thu pekmi bangin thlun uh. An hnaṭuan daan cu Pathian hmaiah an phuan ṭheh leh ding ruangah cawl loin an lo kilkhawinak hi a si. An thu nan ngai asile lungawi aipuang in an hna an ṭuan ding; an thu nan thlun lo asile riahsiatnak thawn an ṭuan ding ih cumi cu nan hrangah zianghman ṭhathnemnak a um lo ding.

¹⁸Kan hrangah thla cam ringring uh. A dikmi kha tuah kan duh ringringmi a si ruangah siaṭha thleidannak kan thinlung cu a thiang a si.

¹⁹Nan hnenah Pathian in in thlenter sal cing hram dingin napi in thlacam uh, tiah ka lo dil a si.

²⁰Raithawinak ih a nun a peknak ruangah Tuukhal Tum kan Bawipa Jesuh cu Pathian in thihnak ihsin a thoter zo; cule a thihnak sungin kumkhua thukamnak cu a hngetter zo.

²¹Daihnak Pathian in amah ih duhmi nan tuah theinak dingah nan ṭulmi thilṭha hmuahhmuah lo pe hram seh; cule Jesuh Khrih hmangin a duhmi cu kan sungah tuah hram seh. Kumkhua in kumkhua tiang Khrih cu sunloih si ko seh! Amen.

²²U le nau tla, ka cakuat hi a sau lem lo ruangah hiti in thapeknak thu ka lo simmi hi thinsau zetin rak ngai uh, tiah ka lo dil.

²³Kan unau Timote cu thawng sung ihsin a suak zo ti ka lo theihter duh a si. A thlen man asile nanmah tong dingih ka rat tikah ka rak hruai ding.

²⁴Nan hruaitu pawl le Pathian minung pawl an zate hnenah kan cibai buknak in rak sim sak uh. Italy ramih a ummi unau pawl khal in cibai an lo buk a si.

²⁵Pathian zaangfahnak cu nan zate hnenah um hram seh.