Read Falam Chin HEBRU 2 Bible Online

HEBRU 2 - Falam Chin bible

HEBRU 2

¹Cuti a si ruangah zinpeng zawh ih kan pial lonak dingah kan theih ciami thudik cu hnget sinsin ih kan pom a ṭul a si.

²Vancungmi in kan pupa pawl hnenih an pekmi thu kha a dikmi a si tiin langter a si ih cuih thu a ngai lo le a thlun lotu cu hrem tlak an si vekin hremnak an tuar ding.

³Cuti asile kannih in hi tlukih rundamnak maksak hi zianghman ih kan siar lo a si ahcun ziangtinso hremnak ihsin kan luat thei ding? Bawipa amah rori in hi rundamnak thu cu a hmaisabik ah a than ih amah a theitu hmuahhmuah in a dik zia kha kan hnenah an langter zo.

⁴Cule annih ih an theihpinak a dik a si ti theihnak ah Pathian in khawruahhar le hmuhsaknak mak a phunphun a tuah ih Amah ih duhnak bangtuk in Thlarau Thianghlim ih laksawng kha a zem ciar a si.

⁵Pathian in a ra thleng dingmi a thu kan relmi lei thar uktu dingah vancungmi a ret dah lo.

⁶Cu hnakin, Ca Thianghlim in hmun khat khatah, “Maw Pathian, milai hi ziangso a si ih na seherh ringring? Mihring taak ko hi ziangso a si ih a zawn na ruah?

⁷Vancungmi hnakih niam deuh ah caan tawite sung na tuah; Sunlawinak le upatnak lukhuh na khumter ih,

⁸Ziang hmuahhmuah uktu-ah na tuah,” a ti. Pathian in minung cu, “Ziang hmuahhmuah uktu-ah a tuah,” a ti. Ziang hmuahhmuah timi sungah hin ziang tinkim a tel a si. Sikhalsehla atu-ah cun minung hi ziang hmuahhmuah uktu a si ti kan hmu hrih lo.

⁹Asinain Jesuh cu, Pathian zaangfahnak ruangah mi hmuahhmuah ai-ih a thihnak ding hrangah, amah cu caan tawite sung vancungmi hnakin niam deuhah tuah a si ti kan hmu. Cule cutiih thihnak a tuar ruangah atu-ah cun sunlawinak le upatnak lukhuh khumin kan hmu.

¹⁰Minung tampi in Pathian sunlawinak an co thei venak dingah ziangzongza a tuahtu le a nungtertu Pathian in harsat tuarnak sungin Jesuh kha mi famkimih a tuah cu a dikmi a si. Ziangahtile Jesuh cu rundamnak ah anmah a hruai haitu a si.

¹¹Amah in minung pawl cu an sualnak in a tlengfai ih Amah le a tlenfaimi hmuahhmuah in Pa pakhat an nei tlaang a si. Cuti a si ruangah Jesuh in annih pawl cu ‘Ka unau,’ tiih kawh dingah a ning a zak lo.

¹²Amah in Pathian hnenah, “Na tuahmi cu ka unau pawl hnenah ka sim ding; An pumkhawmnak ah ka lo thangṭhat ding,” a ti.

¹³Cuih tlunah, “Pathian cu kan rinsan ding,” a ti ih, “hittawk ah Pathian ih i pekmi nauhak pawl hnenah ka um,” tiah a ti fawn.

¹⁴Cutiin “Nauhak pawl,” tiih a kawhmi a minung pawl cu thi le sa a neimi minung an si ruangah Jesuh khal cu anmah bangtuk in thi le sa nei-ah a cang ih milai sinak thawn a nung ve. Hitiin a tuah tikah a tumtahmi cu amah a thihnak ihsin thihnak parih thu neitu Satan kha a siatsuah ih,

¹⁵cuticun an nun sung hmuahhmuah thih ṭih-ah sal bangin khua a sami pawl luatter dingah a si.

¹⁶Ziangahtile a bommi pawl cu vancungmi an si lo, ti a fiang. Ca Thianghlim in a sim vekin, “Abraham tesinfa pawl a bawm,” ti a si.

¹⁷Cuti a si ruangah ziangtinkim ah a unau pawl vek a si ve a ṭul ih cuti a sinak cu minung pawl in sual ngaidamnak an co theinak dingah Pathian hna a ṭuannak ah hin rinsantlak le zaangfahnak neitu Puithiam Saang a si theinak dingah a si.

¹⁸Amah rori in sualforhnak le harsatnak a tuar zo ruangah atu-ah sualforhnak a tongmi pawl a bawm thei a si.