Read Falam Chin HEBRU 3 Bible Online

HEBRU 3 - Falam Chin bible

HEBRU 3

¹Pathian ih kawh vemi Khristian unau pawl, kan zumnak hrangih Puithiam Saang si dingah Pathian ih a run thlahmi Jesuh thu hi ruathnik uh!

²Moses cu Pathian inn sung hnaṭuan ah rintlak a si bangtuk in Jesuh khal hi hnaṭuantu si dingah a hriltu Pathian hnenah rinsan tlak a si.

³Inn saktu in a sakmi inn hnakin upatnak tam sawn a ngah. Cubangtuk in Jesuh khal Moses hnakin upatnak tam sawn ngah tlak a si.

⁴Inn hmuahhmuah cu mi pakhatkhatih sakmi a si; asinain ziang hmuahhmuah a saktu cu Pathian a si.

⁵Moses cu Pathian hnaṭuantu a si bangin Pathian innsang sungah rintlak hnaṭuantu a si ih Pathian in hmailam caanih a sim leh dingmi khal a sim thei a si.

⁶Sikhalsehla Jesuh cu Pathian innsang ah hotu rinsan tlak Pathian Fapa a si. Kanmah hi kan ruahsanmi kha thinlung hngetkhoh le ralṭha zetin kan kaihnget a si ahcun a innsang kan si.

⁷Curuangah Thlarau Thianghlim in, “Tuihsun Pathian aw nan thei asile,

⁸Mi lungruh va si hlah uh. Nan pupa pawl Pathian dodal ih an rak si vek cun si hlah uh; Hramlakih Pathian an hniksak Ni ih an rak um vek cun um ve hlah uh.

⁹Pathian in, ‘Kha tawkah nan pupa pawl in in dodal ih in hniksak a si; Kum sawmli sung an hrangih ka tuahmi an hmu naón,’ tiah a ti.

¹⁰Curuangah an parah ka thin a heng ih, ‘Annih cu rintlak lo an si ringring; Ka thupekmi an thlun duh lo,’ tiah a ti.

¹¹Ka thin a heng ih, ‘An colhnak ding hrangah ka timi ram cu an thleng hrimhrim lo ding, tiah thu ka tiam,’ a rak ti,” tiah a ti.

¹²Zumtu u le nau pawl, a nungmi Pathian tlansan duh khop tiangih a ṭha lomi le, zum lonak thinlung nan neih lonak dingah ralring uh.

¹³Cuhnakin sualnak ih bummi nan si lonak dingah le mi lungruh nan si lonak dingah Ca Thianghlim in “Tuihsun,” a timi ṭongfang hi kan hrangah sullam neimi a si sung ahcun, nitinte pakhat le pakhat bawm aw sawn uh.

¹⁴Ziangahtile a hramthok ihsin kan rak comi thinlung hnangamnak kha a netnak tiang kan kaihnget thei a si ahcun kan zatein Khrih ih hawipi kan si ding.

¹⁵Ca Thianghlim in, “Tuih sunah, Pathian aw nan theih asile, Nan pupa pawl in Pathian an rak dodal vek cun nan lung ruhter hlah uh,” a ti.

¹⁶Zoso Pathian aw a thei ih a dotu cu an si? Izipt ram ihsin Moses ih a hruaisuakmi pawl an si.

¹⁷Zo parah so Pathian kha kum sawmli sung a thin a heng? Nelrawn ramṭhing lakah a sual ih a thimi pawl parah a si.

¹⁸Pathian in thu kam-aw in, “An colhnak dingah ka timi ram cu an thleng hrimhrim lo ding,” a ti tikah a ti duh sanmi zo so an si? Amah Pathian a dodaltu kha an si.

¹⁹Cutiin asile a kammi ram sungih an luh thei lonak cu an zum lo ruangah a si, ti kan hmu.