Read Falam Chin HEBRU 4 Bible Online

HEBRU 4 - Falam Chin bible

HEBRU 4

¹Cuih colhnak cu ngah thei dingah Pathian in thukamnak in pe zo. Cutiih in kammi colhnak sungah thleng thei loin kan um pang lonak dingah ralring zetin um uhsi.

²Ziangahtile anmah ih an rak theih vekin kannih khal in Thuthang ṭha cu kan thei zo. Sikhalsehla Thuthang an theihmi cu an hrangah ṭhathnemnak zianghman a um lo, ziangahtile a theih lawng an thei ih zumnak thawn an pom duh lo.

³Asinain kannih a zumtu pawl hi Pathian ih a kammi colhnak a cotu sawn kan si. Pathian in, “Ka thin a heng ih, ‘An colhnak dingah ka timi ram cu an thleng hrimhrim dah lo ding,’ tiah thu ka kam,” a timi cu a kim a si. Leilung a rak tuah ihsin a hnaṭuan cu a ṭheh thluh naón hi bangtuk in a sim.

⁴Ziangahtile Ca Thianghlim in hmunkhat khatah ni sarih ni thu ah, “Ni sarih ni ah Pathian cu a hnaṭuannak ihsin a cawl,” tiah a ti.

⁵Himi thu ahhin a sim hrihmi a um, “An colhnak dingah ka timi ram cu an thleng hrimhrim dah lo ding,” a ti.

⁶Thuthang ṭha a thei hmaisatu pawl in cuih colhnak an ngah lo, ziangahtile Bawipa ih thu an thlun lo. Asinain a co ngahtu ding midang an um.

⁷Himi cu Pathian in “Tuihsun,” timi ni dang pakhat a retsalnak in a fiangter a si. Kum tampi hnuah a tlunih kan sim ciami Ca Thianghlim sungih a um vekin Pathian in David sungin, “Tuihsun Pathian aw nan theih asile mi lungruh va si hlah uh,” tiah a sim.

⁸Pathian ih kam ciami colhnak kha mipi hnenah Joshua in rak pe ngah sehla “Tuihsun,” timi ni dangih thu kha Pathian in a sim nawn lo ding.

⁹Atu vek a si ahcun Pathian cu ni sarih ni ih a colh vekin Pathian minung pawl hrangah colhnak ding a um lai.

¹⁰Ziangahtile Pathian ih kammi colhnak ngahtu cu, Pathian a hnaṭuannak in a colh vekin, an hnaṭuannak in an cawl ve ding.

¹¹Curuangah Pathian ih tiammi colhnak kan co theinak dingah kan zuam thei patawp in zuam uhsi. Annih pawl in Bawipa ih thu an thlun lo ruangah an co thei lo vek cun kannih pawl pakhat hman si hram hlah uhsi.

¹²Pathian ih thu cu a nungih a cak fawn. Kap hnih hriam ralnam hnakin a hriam sawn. Nunnak le thlarau an ton awknak le hlikhlok le thlik an peh awknak tiang a suntlang thei a si. Milai thinlung ih duhnak le ruahnak tla a thei thluh a si.

¹³Pathian hmaika ah zianghman kan thuh theimi a um lo. Pathian ih sersiammi thil hmuahhmuah cu a hmaika ah on thluhmi le pharh thluhmi bangtuk in an lang. Ni khatkhat cu amah ih hnenah thuhla kan neihmi hmuahhmuah kan phuang thluh leh ding a si.

¹⁴Curuangah kan zumnak hi khoh zetin kaihnget uh si. Ziangahtile Pathian Fapa Jesuh cu kan Puithiam Saang maktak a si ih amah cu Pathian umnak rori ah a thleng zo.

¹⁵Kan Puithiam Saang cu kan ṭonṭaihnak in theihsak lotu a si lo. Kanmah vekin sualforhnak a phunphun a tong vemi a si; asinain anih cu a sual lo.

¹⁶Cuti a si ruangah Pathian bawi tokham cu ralṭha zetin pan uhsi; cutawkah zaangfahnak a um. Cutawkah ngilneihnak kan co ding ih kan ṭul tik caanah zaangfahnak kan ngah ding a si.