Read Falam Chin HEBRU 5 Bible Online

HEBRU 5 - Falam Chin bible

HEBRU 5

¹Puithiam Sang pohpoh cu mipi lak ihsin hrilmi a si ih misenpi ai-awhtu ah Pathian hnaṭuantu dingih retmi a si. A hnaṭuan cu thawinak tuah le sualthlah thawinak pek tla an si.

²Amah khal kim lonak a phunphun a neimi a si ruangah zianghman theihnak nei lo le a palhmi pawl parah lungnemnak a nei.

³Cutiin tlaksamnak a neih ve ruangah cun midang sualnak hrang lawngah si loin amah ih sualnak hrang khalah raithawinak a pek a ṭul.

⁴Zokhal anmah le anmah Puithiam Sangah hril aw in an khaisaang aw thei lo. Aaron cu Pathian in a ko ih Puithiam Sang ih a can vekin zokhal Pathian kawhnak lawngin Puithiam Sangah an cang thei.

⁵Cubangtuk in Khrih khal in amah le amah Puithiam saangah a khaisaang aw lo. Pathian sawn in, “Nangmah cu ka Fapa na si, tuihsun ah na Pa ah ka cang zo,” tiah a hnenah a ti.

⁶Cule hmun dangah, “Nang cu kumkhua in Puithiam na si ding; Melkhizedek puithiam si daan in na si ding,” tiah a ti lala.

⁷Leilung tlunih a um laiah khan Jesuh in thihnak ihsin amah a runsuak theitu Pathian hnenah ringzet in a au ih mitthli tla-in thla a cam. Mi lungnem le pum pe-awmi a si ruangah Pathian in a theih sak.

⁸Pathian ih Fapa a si ko naón Pathian ih thungaitu si dingah harsat tuarnak ihsin a zir a si.

⁹Cule mi famkimih tuah a si tikah a thu a ngaitu hmuahhmuah hrangah amah cu kumkhua rundamnak hramah a cang;

¹⁰cule Pathian in, “Melkhizedek ih puithiam si daan thlun in Puithiam Saang na si,” tiah a ti.

¹¹Hi thu ahhin sim ding tampi ka nei; sikhalsehla thu nan theihthiam har tuk ruangah nan hnenih fiangter a harzet.

¹²Tucun zirhtu si ding hman nan cu zo; asinain Pathian thu a hramthok ihsin zirh nan ṭul lai. Rawl ngai ei nan cu naón cawhnawi nan in lai.

¹³Cawhnawi a intu cu nauhak a si lai; a ṭha le a sia theih theinak a nei hrih lo.

¹⁴Sikhalsehla rawl ngai cu upa hrangah a si; annih cu thleidan thiamnak thinlung hmangin a ṭha le a sia an theithiam a si.