Read Falam Chin HEBRU 9 Bible Online

HEBRU 9 - Falam Chin bible

HEBRU 9

¹Hmaisa bik Thukamnak in Pathian biak daan a nei ih milai ih tuahmi biakkhawmnak hmun khal a nei.

²Biakinn cu puan in an sak ih a lenglam khaan cu Hmun Thianghlim an ti. Cutawkah mei-inn le cabuai le Pathian hnenih pekmi saang pawl an ret.

³Puanzar pahnihnak ih dunglamah Hmun Thianghlim Bik timi khaan a um.

⁴Cutawkah rimhmui urnak sui biakṭheng le sui ih khutmi Thukam Kuang tla an um. Cuih Thukam Kuang sungah manna saang an retnak sui beel le hnah-no a cerhmi Aaron ih kianghrol le thukham pawl an ngannak lungtlep pahnih khal an ret.

⁵Cuih Thukam Kuang parah cun Pathian sunlawinak langtertu Cherub timi thlanei zuk an ret ih sual ngaithiamnak hmun tlunah an thla an pharh aw. Atu cu hi vek thu famkimih simnak tikcu a si lo.

⁶Puanthlam sungih thil an tuah daan cu hiti in a si. Puithiam pawl cu an hnaṭuan ṭuan dingah nitinte a lenglam deuh khaan sungah an lut ih,

⁷Puithiam Saang lawnglawng a sungta khaan sungah kum khat voikhat a lut. Amah ih sualnak le mi dang in thei loin sualnak an tuah pangmi sualnak hrangah thisen a keng ih Pathian a pek.

⁸Hi bangtuk an tuahmi sungin Thlarau Thianghlim in fiang zetih a langter mi cu: puanthlam lengta deuh a um lai ahcun Hmun Thianghlim Bik fehnak lamzin a ong hrih lo, tican a si.

⁹Himi cu tahṭhimnak a si ih atu kan san hi a sawh duhmi a si. A tican cu, Pathian hnenih pekmi laksawng le raithawinak ṭilva pawl in Pathian a biatu pawl ih thinlung famkim in a tlengfai thei lo, tinak a si.

¹⁰Ziangahtile cuih raithawinak pawl cu rawl le tidai le thianfainak ih tuahmi thawinak thawn a pehtlai awmi an si. Cu pawl cu a lenglam daan lawnglawng an si ih Pathian in ziang hmuahhmuah a thar in a rem hlan sung lawngih hmanmi an si.

¹¹Sikhalsehla Khrih cu thil ṭha a um ciami pawl ih tlunah Puithiam Saang si dingin a ra zo a si. A hnaṭuannak puanthlam cu a tum sawn ih a famkim fawn. Milai ih tuahmi puanthlam a si lo ih hi leilung tuahmi thil sungih a telmi khal a si lo.

¹²Khrih cu cuih puanthlam sungah a lut ih Hmun Thianghlim Bik ah kumkhua daihin a thlen tikah me thisen le cawcang thisen pawl kha raithawinak hrangah a keng lo; amah ih thisen sawn a keng ih kan hrangah kumkhua rundamnak a tuahsuak a si.

¹³A thiang lo misenpi parah puithiam in me thisen le cawcang thisen le urmi cawla ih vutcam pawl kha a theh ih cumi cun biaknak lamih an thianfai lonak hmuahhmuah a thianfaiter a si.

¹⁴Cubangtuk in thianfainak a um thei a si ahcun ziang tlukin so Khrih ih thisen cun a thianfaiter sinsin ding! Kumkhua ih a nungmi Thlarau sungin a famkimmi raithawinak ah amah le amah Pathian hnenah a pe aw a si. A nungmi Pathian hna kan ṭuan theinak dingah, santlai lo daan thlunnak ihsin kan siaṭha thleidannak thinlung kha a thisen in a tlengfai a si.

¹⁵Cuti a si ruangah Pathian ih a kawhmi pawl in Pathian ih a kam ciami kumkhua thlawsuah an co theinak dingah thukam thar a ngaihtuahtu cu Khrih a si. Cumi a si theinak cu Khrih a thihnak thawngin a si. A thihnak in a hmaisa thukamnak thuai an um laiih an sualnak sung ihsin a luatter.

¹⁶Ro cah thu kan ti ahcun ro cahtu a thih hnu lawngih thlun ding a si;

¹⁷ziangahtile a nun lai ahcun a ro cahmi cu hman a theih lo; a thih hnu lawngah hman a si.

¹⁸Curuangah a si thukamnak[1] hmaisa deuh hrang hmanah thisen thawn lawngin sullam a neihnak cu!

¹⁹Moses in a hmaisabik ah Daan cabu sungih a ummi thukam hmuahhmuah cu misenpi hnenah a than. Cuih hnuah cawcang thisen le me thisen kha a lak ih tidai thawn a rawi hnuah, hissop thinghnge fate le tuuhmul sen ṭemcihmi hmangin, Daan cabu le misenpi kha a theh hai ih,

²⁰“Nan thlun dingah Pathian ih thukamnak a lo pekmi a hngettertu cu hi thisen hi a si,” tiah a ti.

²¹Cuvek thotho in Moses in thisen cu Thukam Puanthlam le Pathian biaknak ih an hmanmi thilri pawlah a theh ṭheh.

²²Daan sungih a um vekin ziang hmuahhmuah cu thisen lawngin a tlengfai ih thisen a luan lonak ahcun sualngaidamnak a um lo.

²³Vancung ih a ummi thil an cawncopmi pawl cu cubangtuk ih thianfaiter an ṭul. Asinain vancungih ummi a ngaingai a si mi khal in thawinak ṭha sinsin a ṭul.

²⁴Cuih a ngaingai an cawncopmi thil, milai ih tuahmi Hmun Thianghlim sungah Khrih cu a lut lo. A luhnak cu vancung a si ih atu-ah kan ai-awh in Pathian hmaika ah a um.

²⁵Judah mi Puithiam Saang cu kumtinte ṭilva thisen keng tahratin Hmun Thianghlim Bik sungah a lut. Sikhalsehla Khrih cu amah le amah raithawinak ih pe-aw dingin voi tampi a lut lo;

²⁶cuti si lo sehla leilung seemtir ihsi cun voi tamzet a tuar a ṭul ding. Cubangtuk si loin atu san neta bik a cem zawng ah hin, amah le amah raithawinak ah pe-aw in sualnak a tlengfai theinak dingah kumkhua daih in voikhat lawng a lang.

²⁷Minung cu zokhal voikhat thih keel a si; cuih hnuah Pathian in thu a ṭhen ding.

²⁸Cubangtuk in Khrih khal minung sualnak tlengfai dingah raithawinak hrangah voikhat a pe-aw. Cule voihnihnak a lang sal dingih cutik ahcun sualnak thu-ah si nawn loin amah a hngaktu pawl rundam dingah a si ding.