Read Falam Chin JEIM 1 Bible Online

JEIM 1 - Falam Chin bible

JEIM 1

¹Pathian le Bawipa Jesuh Khrih ih siahhlawh a si mi keimah Jeim in leilung tlun khuazakipah a ṭeekdarhmi Pathian minung phun hleihnih[1] nan hnenah cakuat in cibai ka lo buk.

²U le nau pawl, nan hnenah hniksak harsatnak a phunphun a thlen tikah mi vannei kan si tiah ruat aw uh;

³ziangahtile nan zumnak in cubangtuk hniksak harsatnak nan neh tikah tuar theinak a ra, ti nan thei.

⁴Tlaksamnak zianghman um loin a famkim le pitlingmi nan si theinak dingah a net tiang a tuar theitu si dingah zuam uh.

⁵Nanmah lakah fimnak a tlasammi nan um ahcun Pathian hnenah dil sehla Pathian in a pe ding. Ziangahtile zo hnen khalah Pathian cun siangzet le zaangfahnak thawn a pe a si.

⁶Sikhalsehla cutiin a dil tikah thinlung ṭhukṭhunnak um lo tein a dil pei ih ka ngah rori ding tiin a zum pei. Thinlung ṭhukṭhunnak a neitu cu thli in hmun kipih a semmi tifinriat tisuar bangtuk a si.

⁷Cubangtuk minung cu a thinlung a hmun lo ih a ṭhencat awk thei lo ruangah Bawipa ih hnen in zianghman ngah ding ring hlah seh.

⁹A farahmi Khristian unau pakhatkhat Pathian ih bomnak in neinungih a um tikah a lung awi ko seh.

¹⁰Cule a lianmi Khristian unau kha mi farahih a can asile a lung awi thotho seh. Ziangahtile milian pawl cu hramlak pangpar bangin an ziam ding.

¹¹Ni a suak ih pangpar kung cu niling in a em; pangpar cu a vuai ih a mawinak a ziam. Cubangtuk in milian pawl cu hnaihnok zetih an hna an ṭuan laifangah an hloral ding.

¹²Hniksak harsatnak a tuar ih hngette ih a ding theitu cu mi thlawsuak a si. Ziangahtile cubangtuk hniksaknak a neh thei ruangah Pathian in amah a duhdawtu pawl hrangih a tiam ciami nunnak sui lukhuh a ngah ding.

¹³Cubangtuk hniksaknak cu mi in an ton tikah, “Pathian in i hniksak a si,” tiah zohman in ti hlah seh. Ziangahtile Pathian cu sualnak in a hniksak thei lo ih amah khal in zohman a hniksak hai lo a si.

¹⁴Sikhalsehla minung cu sualforhnak a ton tikah amah ih taksa hiarnak in a thlem ih thang vekin a awh ṭheu.

¹⁵Taksa hiarnak in fa bangih a vunmi le a hrinmi cu sualnak a si; cule sualnak cu a ṭhang ih rah a rah tikah thihnak a suahter.

¹⁶Ka duhdawtmi u le nau, ruat sual pang hlah uh.

¹⁷A ṭhami le a famkimmi laksawng hmuahhmuah cu vancung ihsin a rami an si. Vancung tleunak a tuahtu Pathian hnen ihsin a rami an si. A siammi thil pawl cu an thleng aw naón Pathian cu a thleng aw dah lo; tikcu a her awk khalle Pathian hnen ahcun khawthim ti a um dah lo.

¹⁸Amah ih lungkimnak in sersiammi kan si ih kanmah sersiamnak ah thutak ṭongkam a hmang. Hiti a si ruangah a siammi thil hmuahhmuah lakah kannih cu rah hmaisa bik kan si.

¹⁹Ka duhdawtmi u le nau pawl, hi thu hi cing ringring uh: zokhal thu theih duhnak lam ahcun a zamrangmi si uhla ṭong ding le thinhennak lam ahcun khulfungmi si uh.

²⁰Milai ih thinhennak in Pathian ih tumtahnak a dingmi cu a hlensuah thei lo.

²¹Curuangah fihnung le a balmi ziaza ṭha lo hmuahhmuah cu hlon ṭheh uh. Pathian hnenah hlan aw uhla nan thinlung sungih khum ciami nan thlarau runsuak theitu thu kha fektein pom uh.

²²A thu kan theih taakah a tawk ko ti meenin nanmah le nanmah bum aw hlah uh. Nan theihmi kha a tuahsuak tum uh.

²³A theih lawng a thei ih a tuahsuak lotu cu thlalang ah a hmel a zoh awtu bangtuk a si. Amah cu thlalang ah a hmel a zoh aw ih a si vek cekci-in a hmu aw.

²⁴Felzet in a zoh-awk hnuah a feh ih hmakhatte-ah a hmel ziangvek a si ti a thei nawn lo.

²⁵Sikhalsehla mi a luattertu, a famkimmi daan kha felzetih a zoh ringringtu cu a thei mentu le a hngilhtu si loin a tuahsuaktu a si; cutiin a tuahsuak ruangah Pathian ih thlawsuahmi a si ding.

²⁶Biaknak lamah ka taima a si a titu nan um maw? Nan hmurka nan uk thei lo ahcun nan zumnak parih nan taimaknak cu santlai lo a si ih nanmah le nanmah a bum awtu nan si.

²⁷Pathian kan Pa in a taktak le a thiangmi biaknak ih a ruahmi cu: farah zonzai le nuhmei an harsatnak le an tuarnak ah ṭhatein kilkhawi le khawvel sualnak sungih buahcihter aw lo dingin mah le mah fingkhawi awk kha a si.