Read Falam Chin 1 PITER 1 Bible Online

1 PITER 1 - Falam Chin bible

1 PITER 1

¹Jesuh Khrih tirhthlah a si mi keimah Piter in Pontus, Galatia, Kappadosia, Asia le Bithinia[1] pengih raltlaan bangin a ṭhekdarh awmi, Pathian ih hrilmi pawl, nan hnenah ca ka lo kuat.

²Jesuh Khrih ih thu nan thlunnak dingah le amah ih thisen ih thiantermi nan sinak dingah nannih cu kan Pa Pathian tumtahnak bangtuk in hrilmi le amah ih Thlarau in mi thianghlim ih tuahmi nan si. Pathian zaangfahnak le daihnak cu nan hnenah tlamtlingte in um hram seh.

³Kan Bawipa Jesuh Khrih ih Pa le a Pathian cu thangṭhat uhsi. In zaangfahnak a tum ruangah Jesuh Khrih cu thihnak in a thoter ih nunnak thar in pe zo. Cu ruangah a nungmi ruahsannak in kan khat ih,

⁴Pathian in a minung pawl hrangih a retmi ro cu co dingah hngakhlap in kan um. Cuih ro cu nan hrangah vancungah a lo ret sak ih a siat thei lomi, zohmanih ruk thei lomi le a ziam thei lomi an si.

⁵Ni neta bikih langter dingah atuih ret ciami rundamnak cu zumnak thawngin Pathian huham ih kilvenmi nanmah ih co ding ro a si.

⁶Curuangah nan lungawi uh! Harsatnak a phunphun nan tonmi ruangah caan tawite sung riahsia in um hman uhla lungawi in um thotho uh!

⁷Ziangahtile hi harsatnak nan tuarmi cu nan zumnak a ngai maw ngai lo ti theihnak dingah a si. A siat theimi sui hman meisa in hniksak a si ṭheu. Cu bangtuk in sui hnakih a sunglawi sawnmi nan zumnak cu harsatnak a tuar suak theitu si dingah hniksak a ṭul ve a si. Cule Jesuh Khrih a lang Ni ah thangṭhatnak le sunlawinak le upatnak nan ngah ding a si.

⁸Amah nan hmu dah lo naón nan duhdawt; nan hmu lo naón nan zum. Curuangah kaa ih sim thei lomi, a maksakmi le a sunglawimi lungawinak nan nei.

⁹Ziangahtile Jesuh Khrih sungih nan zumnak in tumtahnak nan neihmi nan thlarau rundamnak cu nan co ngah a si.

¹⁰Hi rundamnak thu hi profet pawl in an hawlmi le an zingzoimi a rak si; Pathian in a lo pek dingmi hi zaangfahnak laksawng thuhla hi profet pawl in an rak sim sung ciami a si.

¹¹Ziang tikah so cuih caan cu a ra thlen ding[2] tiah hawl suak an rak tummi a si. An sungih a ummi Khrih ih Thlarau in Khrih ih a tuar dingmi harsatnak le cuih hnu ih a co dingmi sunlawinak thu a rak sim cia tikah atuih caan hi a sawhmi caan cu a si.

¹²Profet pawl an hnaṭuannak cu anmah ih ṭhathnemnak hrangah si loin nanmah ih ṭhatnak hrangah a si sawn ti kha Pathian in an hnenah a langter. Cutiin profet pawl ih an rak simmi cu atu-ah vancung ihsin run thlah a si mi Thlarau Thianghlim ih cahnak thawngin Thuthang ṭha a phuangtu palai pawl hnen ihsin nan theihmi hi a si. Hi thu hi vancungmi hmanin theih an duhmi thu a si.

¹³Curuangah hnaṭuan thok dingah nan thinlung timtuah ciain um uh. Tiar ciain um uhla Jesuh Khrih a lang tikah nan ngah dingmi zaangfahnak parah nan ruahsannak zatein bun uh.

¹⁴Pathian duhnak thlun uhla nan aat lai caanih nan rak neihmi tisa duhnakih nan nunnak in lo uk nawn hlah hai seh.

¹⁵A lo ko tu Pathian cu Pathian thianghlim a si bangtuk in nitin nan nunnak ah thianghlim in nung ve uh.

¹⁶Ca Thianghlim sungah, “Keimah ka thianhlim ruangah nannih khal thianghlim ve uh,” tiin a um.

¹⁷Pathian hnenih thla nan cam tikah kan Pa tiin nan ko. Cuih nan Pa cu mi hmuahhmuah thleidannak nei loin anmah an hnaṭuannak bangtuk ciarin thu a ṭhentu a si. Cuti a si ruangah hi leilung tlun nan nun sungah hin amah ṭihzahnak thawn amah ih hrangah nung uh.

¹⁸Nan pu le nan pa ih an lo roh tami zianghman hlawknak um lo nan nundaan ihsin a lo tlensuaktu cu ziang a si ti nan thei ko. A siat theimi sui le ngun bangtuk a si lo.

¹⁹A lo luattertu cu a sunglawimi Khrih thisen a si ih Khrih cu soiselnak um lo raitluan tuufa bangtuk a si.

²⁰Amah cu leilung seem hlanah Pathian ih hrilcia mi a si zo ih atu nanmah ih hrangah neta bik caanah hin Pathian in a langtermi a si.

²¹Thihnak ihsin a thawhtertu le sunlawinak a petu Pathian kha Amah thawngin nan zum. Cuti cun nan zumnak le nan ruahsannak cu Pathian parih bunmi an si.

²²Atu-ah thutak nan thlunnak ruangin thianfaitermi nan si zo ih zumtu unau dang pawl tla nan thinlung taktein nan duhdawt. Curuangah nan thinlung zatein pakhat le pakhat duhdaw aw uh.

²³A nungmi le kumkhua in a hmunmi Pathian ih ṭongkam thawngin hrintharmi nan si zo; a thi theimi nu le pa-ih faate nan si nawn lo, a thi thei lomi ih faate nan si zo.

²⁴Ca Thianghlim in, “Mi hmuahhmuah hi hrampi bangtuk an si; An sunlawinak khal hramlak pangpar bangtuk a si. Hrampi cu an caar ih pangpar cu an ziam,

²⁵Sikhalsehla Bawipa ih thu cu kumkhua in a hmun,” tiah a ti. Nan hnenih phuanmi Thuthang ṭha cu hi thu hi a si.