Read Falam Chin 2 PITER 1 Bible Online

2 PITER 1 - Falam Chin bible

2 PITER 1

¹Jesuh Khrih ih siahhlawh le tirhthlah a si mi keimah Simon Piter in kan Pathian le Runtu a si mi Jesuh Khrih ih dingnak ruangah hitluk a sunglawimi kan zumnak thawn bangrep in zumnak pek a si vemi nan hnenah hi cakuat hi ka ngan.

²Pathian le kan Bawipa Jesuh nan theihnak thawngin zaangfahnak le daihnak cu famkim zetin co hram uh.

³A sunlawinak le a ṭhatnak co ve dingah in kotu Khrih kan theihnak ruangin Pathian ṭihzahnak thawn kan nun theinak dingah kan ṭulmi hmuahhmuah cu Pathian ih cahnak huham in in pe zo.

⁴Cutiin in tiamkam ciami a tum le a sunglawimi laksawng cu in pek ih cuih laksawng ruangah in siatsuah theitu leilung tisa hiarnak ihsin nan luat thei ding ih Pathian a sinakah khan nan ṭawm aw thei ve ding.

⁵Himi ruang rori ahhin nan zumnak parah ṭhatnak bet tum uh; nan ṭhatnak parah theihnak bet tum uh;

⁶nan theihnak parah suup awk theinak bet hrih uh; cule suup awk theinak parah tuar theinak bet uhla nan tuar theinak parah Pathian ṭihzahnak bet uh.

⁷Pathian ṭihzahnak nan neihmi parah unau tlaihsannak bet uh; cule Khristian unau tlaihsannak parah duhdawtnak bet uh.

⁸Hi ṭhatnak pawl hi nan ṭul zetmi an si ih famkimin nan neih a si ahcun kan Bawipa Jesuh Khrih nan theihnak ah hin a lo caktertu le hmual a lo neihtertu an si ding.

⁹Sikhalsehla hi ṭhatnak pawl a nei lotu cu mitmalmi a si ih naite lawng a hmu theitu a si; hlanih a sualnak ihsin thianfaiter zomi a si hman kha a thei aw nawn lo.

¹⁰Hiti a si ruangah u le nau pawl, Pathian ih a lo kawhnak le a lo hrilnak hi kumkhua ih fek dingah zuam sinsin uh. Cutiin nan tuah asile nan zumnak ihsin nan pial dah lo ding.

¹¹Cuticun kan Bawipa le in Runtu Jesuh Khrih ih kumkhua uknak sungah luh theinak thu nan ngah ding.

¹²Hi thuhla pawl hi nan theih ciami le thutak nan theihmi sungah hngetkhoh zetih a ding ciami nan si ko naón ka lo theihter sal ringring ding.

¹³Ka nun sungah cun hi thu pawl lo theihter ringring hi a dikmi a si tiin ka ruat.

¹⁴Kan Bawipa Jesuh Khrih in fiang zetih i theihter zo vekin hi a thi theimi ka ruangpum cu ka taan cing ding ti ka thei.

¹⁵Curuangah hi thu pawl hi ka thih hnu khalah nan ciin ringring dingah ka ti thei tawkin ka zuam ding.

¹⁶Kan Bawipa Jesuh Khrih cu huham thawn a ratnak ding thu kan lo theihter tikah phuahcopmi thuanthu ring in kan lo simmi a si lo. A sunlawi maksak zia cu kan mit rori in kan rak hmuhmi a si.

¹⁷Sunglawi Cungnungbik hnen ihsin a rami aw in, “Himi hi ka duhdawtmi ka Fapa a si, a parah ka lung a awi,” tiah a ti zawng ah kan Pa Pathian in upatnak le sunlawinak a peknak hmunah khan kanmah khal kan um ve!

¹⁸Amah thawn tlang thianghlim parih kan um laiah vancung ihsin a thangmi cuih aw cu kan thei.

¹⁹Curuangah profet pawl ih an rak simmi thuthang parah lunghmuinak hnget sinsin kan nei. Nannih khal cuih thu cu thupi zet a si tiin nan ruat le a ṭha ding; ziangahtile cuih thu cu Khrih ih Ni tleunak nan thinlung sungah vaangzawng deirel arsi tleu bangin a tleu hlan tiang khawthim sungih a vangmi mei-inn bangtuk a si.

²⁰Thil dang hmuahhmuah hnakin himi hi ciing ṭha uh: zokhal amah bul in Ca Thianghlim sungih profet thusimmi kha a fiangter thei lo ding.

²¹Ziangahtile profet ih thusimmi cu milai duhnak meen ihsin a rami a si lo; Pathian hnen ihsin a rami thuthang an phuan tikah Thlarau Thianghlim forhfialnakin an phuanmi a si.