Read Falam Chin 1 JOHAN 2 Bible Online

1 JOHAN 2 - Falam Chin bible

1 JOHAN 2

¹Ka faale tla, sual nan tuah lonak dingah hi ca hi nan hnenah ka ngan a si. Sikhalsehla pakhatkhat in sualnak nan tuah a si ahcun a dingmi Jesuh Khrih, kan ai-awh in Pa Pathian hnenih thu in simsak theitu kan nei.

²Cule Khrih amah ruangah kan sualnak cu in ngaithiam ih kanmah ih sualnak lawng si loin mi hmuahhmuah ih sualnak khal ngaithiam an si.

³Pathian thupek kan thlun ahcun amah a theitu kan si ti a fiang a si.

⁴Mi pakhatkhat in Pathian ka thei tiah a ti naón a thupek a thlun lo ahcun thuphanper a si ih a sungah thutak a um lo.

⁵Sikhalsehla Pathian thu a thluntu cu a sungah Pathian a duhdawtnak famkimin a um tinak a si. Pathian thawn pehzomnak kan nei ti kan theih fiangnak ding cu hiti in a si:

⁶Zokhal Pathian thawn pehzomnak ka nei a titu cun Jesuh Khrih bangin a nung ding.

⁷Ka duhdawtmi tla, nan hnenih ka nganmi thukham hi a thar a si lo; a hramthokin nan rak neihmi thukham hlun kha a si. Cuih thukham hlun cu nan theih ciami thu a si.

⁸Sikhalsehla atu nan hnenih ka nganmi thukham hi thukham thar a si, ziangahtile hi thukham thar a dik zia cu Khrih sung le nanmah sungah hmuh theih a si. Ziangtin tile khawthim cu a reh vivo ih khawtleu taktak a lang zo.

⁹Zokhal tleunak sungah ka um a ti naón a unau a huatu cu khawthim sungah a um hrih lai tinak a si.

¹⁰Zokhal a unau a duhdawtu cu tleunak sungah a um ih curuangah midang sualternak[2] ding a sungah zianghman a um lo.

¹¹Sikhalsehla a unau a huatu cu khawthim sungah a um a si; khawthim sungah cun a tawivak ih thimnak in a mit a cawtter ruangah khuitawk lam ka pan ti hman a thei lo.

¹²Ka faale tla, Khrih thawngin nan sualnak cu ngaithiam a si ruangah hi cakuat hi nan hnenah ka ngan.

¹³Pale tla, a hramthok ihsin a rak um zomi Amah nan theih ruangah hi cakuat hi nan hnenah ka ngan. Tlangval pawl, Satan nan neh thei ruangah hi cakuat hi nan hnenah ka ngan a si.

¹⁴Ka faale pawl, Pa Pathian nan theih ruangah hi cakuat hi nan hnenah ka ngan. Pale pawl, a hramthok ihsin a rak um zomi Amah nan theih ruangah hi cakuat hi nan hnenah ka ngan. Tlangval pawl, micak nan si ruangah hi cakuat hi nan hnenah ka ngan; Pathian thu nan sungah a um ih Satan khal nan neh zo a si.

¹⁵Hi leilung le a sungih thilri hi tlaihsan hlah uh; hi leilung hi nan tlaihsan asile Pathian duhdawtnak nan nei lo a si.

¹⁶Leilung ta a si mi thil hmuahhmuah: sualnak tisa in a hiar mi, milai in an hmuhmi le an duhmi thil, minung in hmaihngal porh awknak ih an ruahmi thil hmuahhmuah hi pakhatte hman Pa hnen ihsin a rami an si lo. A zatein leilung ihsin a rami an si ṭheh.

¹⁷Leilung le a sungih a ummi thilri, milai ih an tlaihsanmi pawl hi an hloral vivo zo; asinain Pathian duhnak a tuahtu cu kumkhua in a nung ding.

¹⁸Ka faale pawl, ni netnak a nai zo. Khrih ih Ral a ra ding ti nan thei; atu-ah Khrih ih ral tampi an lang zo ih curuangah neta bik caan a nai zo ti kan thei.

¹⁹Himi pawl hi kanmah ih mi ngaingai an si lo ruangah in tlansan a si. Kanmah sungih a telmi taktak si hai sehla in pawl ringring ko ding. Hitiih in suahsannak hin kan pawl sungih minung ngaingai an rak si lo, ti a langter a si.

²⁰Asinain nannih cu Khrih in Thlarau Thianghlim a lo burh zo ruangah nan zatein thutak theitu nan si.

²¹Nan hnenih cakuat ka ngan hi thutak nan theih lo ruangah a si lo; thutak nan thei ih thuphan cu thutak ihsin a ra dah lo ti khal nan theih ruangah a si sawn.

²²Cuti asile zoso thuphanpertu cu a si? Jesuh cu Messiah a si lo, a titu poh cu thuphanpertu a si. Cupa cu Khrih ih Ral a si ih Pa le Fapa a hnongtu a si.

²³Ziangtin tile, Fapa a hnongtu cun Pa khal a hnong a si. Zokhal Fapa a pomtu cu Pa khal a pom ve.

²⁴Cuti a si ruangah a hramthok ihsin nan theihmi thuthang cu nan thinlung sungah ṭhatein re uh. Cutiin ṭhateih nan ret asile Pa le Fapa thawn a pehzom aw ringringmi nan si ding.

²⁵Cuih kumkhua nunnak cu Khrih amah rori ih in tiamkammi a si.

²⁶Nanmah bum a lo tum rerotu pawl ih thu-ah hi cakuat hi nan hnenah ka ngan.

²⁷Nannih cu Khrih in a Thlarau nan parih a burh zo ruangah cuih a Thlarau nan sungih a um sungah cun midang ih zirh rero nan ṭul lo. Ziangahtile a Thlarau in ziang hmuahhmuah a lo zirh ih a lo zirhmi cu thuphan a si fawn lo, thudik a si sawn. Curuangah Thlarau ih zirhmi cu thlun uhla Khrih thawn pehzom aw ringring in um uh.

²⁸A si, ka faale pawl, amah thawn nan pehzom awknak ahcun hmun ringring ko uh; cuticun amah a rat tikah ralṭhatnak in kan khat ding ih a ra thlen Ni ah ningzakih a hmai-ihsin kan relh rero a ṭul lo ding.

²⁹Khrih cu a ding a si ti nan thei ko; curuangah zokhal a dingmi a tuahtu cu Pathian faate a si ti thei uh.