Read Falam Chin 1 JOHAN 5 Bible Online

1 JOHAN 5 - Falam Chin bible

1 JOHAN 5

¹Zokhal Jesuh cu Messiah a si ti a zumtu cu Pathian fa a si. Cule zokhal sisehla an pa a duhdawtu cun a faale khal a duhdawt a si.

²Pathian faale pawl kan duhdawt a si ti kan theihnak cu amah Pathian kan duhdawt ih a thupekmi kan thlunnak hin a si.

³Ziangahtile Pathian kan duhdawt ti cu a thupekmi kan thlun tinak a si. A thupekmi cu kan hrangah thlun har a si lo,

⁴ziangahtile Pathian fa a si mi poh in khawvel kha an neh thei. Cule kan zumnak thawngin kannih cu khawvel nehtu kan si.

⁵Khawvel a nehtu cu zo so an si? Jesuh cu Pathian Fapa a si ti a zumtu pohpoh cu khawvel nehtu an si.

⁶Ti le thisen thawn a rami cu Jesuh Khrih a si. Tidai thawn lawng in a ra lo, tidai le thisen ceem in a ra. Hitiin a ratnak cu a dikmi a si tiah Thlarau rori in a theihpi, ziangahtile Thlarau cu thutak a si.

⁷Theihpitu pathum an um: [4]

⁸Thlarau le tidai le thisen an si ih an pathum in an theihpimi thu a bang aw a si.

⁹Minungih thu theihpimi kan zum; cule Pathian ih theihpimi cu a thupi sinsin ih a Fapa thu a theihpimi cu amah rori in a langter zo.

¹⁰Curuangah zokhal Pathian Fapa a zumtu cun amah ih thinlung sungah theihnak a nei a si; sikhalsehla Pathian a zum lotu cun, Pa in a Fapa thu a simmi a zum lo ruangah, Pathian kha thuphanper ah a canter.

¹¹Cutiih a theihtermi cu hiti in a si: Pathian in kumkhua nunnak in pe ih cuih nunnak cu a Fapa sungah a um.

¹²Zokhal Fapa a neitu cu nunnak a nei; Pathian Fapa a nei lotu cu nunnak a nei lo.

¹³Pathian Fapa a zumtu in kumkhua nunnak kan nei ti nan theihnak dingah hi cakuat hi nan hnenah ka ngan.

¹⁴Kannih cu Pathian hmaiah ralṭhatnak kan nei, ziangahtile amah ih duhnak thawn mil-aw in kan dil ahcun kan dilnak kha in theih sak ṭheh a si, tihi fiangtein kan thei.

¹⁵Amah kan dil tinten in theih sak; cule in theih sak ti kan theih ruangah kan dilmi hmuahhmuah in pe a si, ti khal kan thei.

¹⁶Na unau pakhatkhat in thihpitlak a si lomi sualnak a tuah na hmuh ahcun Pathian hnenah thla cam sak awla Pathian in luatnak a pe ding. Himi cu thihpitlak a si lomi sualnak a tuahtu pawl hrangah a si. Sikhalsehla thihpitlak sualnak a um ih cumi a tuahtu pawl hrangah cun Pathian hnenah thla cam sak uh ka ti lo.

¹⁷Thil tuah sualmi hmuahhmuah hi sualnak a si, sikhalsehla sualnak hmuahhmuah hi thihpitlak sualnak an si lo.

¹⁸Pathian faate a si mi cu sualnak tuah vivo in a nung nawn lo ti kan thei, ziangahtile Pathian Fapa in a hum ih Satan in a siatsuah thei lo.

¹⁹Leilung pumpi hi Satan kut hnuai ah a um; asinain kannih cu Pathian ta kan si ti kan thei.

²⁰Pathian Fapa cu a ra zo ih theihthiamnak in pek ruangah Pathian taktak kan thei, ti a fiang. A Fapa Jesuh Khrih thawn pehzomnak kan neih ruangah a dikmi Pathian thawn pehzomnak kan nei thei. Amah cu a dikmi Pathian a si ih kumkhua nunnak khal a si.

²¹Ka faale tla, milem pawl cu va hrial uh.