Read Falam Chin THUṬHENTU 10 Bible Online

THUṬHENTU 10 - Falam Chin bible

THUṬHENTU 10

¹Dodo ih fapa cu Puah a si; Puah ih fapa cu Tola a si. Cule Abimelek thih hnuah Tola cu Israel luattertu ah a cang. Tola cu Issakhar miphun a si ih Efraim tlangpar ram Shamir khua ih ummi a si.

²Tola cu kum kul hluanthum sung Israel hotu a ṭuan. A thih tikah Shamir khua ah an phum.

³Tola thih hnuah Gilead ih Jair cu hotu ah a cang. Jair in kum kul hluanhnih sung Israel ih thuṭhentu a ṭuan.

⁴Fapa sawmthum a nei ih laak sawmthum parih to ṭheu mi an si. Gilead ram sungah khawpi sawmthum an nei ih tuihsan tiangin cuih khua pawl cu Jair ih Puanthlam Khawpi pawl[13] an ti ringring.

⁵Jair cu a thi ih Kamon khua ah an phum.

⁶Israel mi pawl cu BAWIPA ih hmaiah an sual lala. Baal timi khawzing pawl, Astartes timi khuazing pawl, le Siria ih khawzing pawl, Sidon ih khawzing pawl, Moab ih khawzing pawl, Ammon ih khawzing pawl, le Filistin ih khawzing pawl, an biak. BAWIPA Pathian cu an dungtun ih an bia duh nawn lo.

⁷Curuangah BAWIPA cu Israel mi parah a thin a heng ih Filistin mi pawl le Ammon mi pawl a nehter.

⁸A cuih kum cun Israel mi pawl an neh ih an hrem. Amor mi pawl an umnak Jordan Tiva ihsin nisuahnak Gilead ram ih a ummi Israel mi hmuahhmuah cu kum hleiriat sung an hrem.

⁹Cun Amor mi pawl in Judah mi, Benjamin mi le Efraim mi pawl do dingah Jordan tiva an tan. Curuangah Israel mi pawl cu vansaanglam in an um.

¹⁰Cutikah Israel mi pawl cu BAWIPA ih hnenah an ṭap an ai ih, “Kan Pathian, nangmah ih parah kan sual zo; kan lo dungtun ih Baal khawzing pawl kan biak a si,” tiin an ko.

¹¹Cule BAWIPA cun an hnenah, “A cem zomi tikcu caan sungah Izipt mi, Amor mi, Ammon mi, Filistin mi,

¹²Sidon mi, Amalek mi le Maon mi pawl in an lo hrem tikah ka hnenah nan ṭap nan ai ringring. Cutikah nanmah run suak loin ka um dah maw si?

¹³Asinain kei cu in dungtun ih khawzing dang nan bia thotho; curuangah atu cu ka lo run duh nawn lo ding.

¹⁴Va feh uhla nan hril sawnmi khawzing pawl hnenah va ṭap in va ai uh. Harsatnak nan ton tikah anmah in lo run hai seh,” tiah a ti.

¹⁵Sikhalsehla Israel mi pawl cun, “Kan sual tuk zo. Na duh vekin in tuah ko awla zaangfahte in tuihsun ah in run hram aw,” tiah BAWIPA cu an dil.

¹⁶Cutiin hnamdang khawzing an neihmi pawl cu an hlon thluh ih BAWIPA cu an biak. Cule Israel mi pawl ih zonzaih tuarnak cu a hmuh tikah BAWIPA cu a thin a nuam thei nawn lo.

¹⁷Cun Ammon ralkap pawl cu an khawm-aw ih Gilead ah ṭanhmun an khuar. Israel ralkap pawl khal an khawm-aw ih Mizpah ah ṭanhmun an khuar ve.

¹⁸Cutikah Gilead mi pawl le an hruaitu pawl cun, “Ammon mi pawl do dingah zoso in hruai ding? In hruaitu cu Gilead mi hmuahhmuah tlunah hotu a si ding,” tiah pakhat le pakhat an sut-aw rero.