Read Falam Chin THUṬHENTU 12 Bible Online

THUṬHENTU 12 - Falam Chin bible

THUṬHENTU 12

¹Efraim mi pawl an ko khawm-aw ih Jordan Tiva an tan hnuah Zafon an thleng ih Jefthah hnenah, “Ziangah so Ammon mi pawl do dingih na feh laiah kannih pawl in sawm duh lo? Na inn meisa in kan ur dingih na lu parah meisa a tla ding,” tiah an ti.

²Asinain Jefthah in, “Keimah le ka minung pawl cu Ammon mi pawl thawn thu el awknak nasazet kan neita a si. Cutikah i ra run dingah nanmah pawl ka lo ko naón zohman nan ra lo.

³I ra run dingah zohman nan ra lo ti ka hmuh tikah ka nunnak hman ruat loin ka feh ih Ammon mi pawl cu ka do a si. BAWIPA in i zaangfah ih ka neh. Ziangah so atu-ah keimah riangri do dingih nan rat?” tiah a ti.

⁴Cule Jefthah in Gilead mi pawl hmuahhmuah hmun khatah a kawh khawm ih Efraim mi pawl cu an do ih an neh. Ziangahtile Efraim mi pawl in, “Efraim le Manasseh ramih a ummi nannih Gilead mi pawl cu Efraim ihsin mitlanrol pawl nan si ko lo maw,” an ti ringring ruangah a si.

⁵Gilead mi pawl in Efraim mi pawl an tlansuak lonak dingah Jordan tiva tan theinak zawn hmuahhmuah in an rak kan khelh. Efraim mi luat tum in khatlam tiva ral fehnak a dil tikah Gilead ralkap pawl in, “Efraim mi na si maw?” tiah an sut. “Efraim mi ka si lo,” a ti ahcun,

⁶“Shibboleth tiah sal hnik,” an ti ih, feltein sal thiam loin “Sibboleth,” ti ih an sal tikah Gilead ralkap pawl cun an kaih ih cutawk Jordan Tiva tannak ahcun pakhat hnu pakhat an that. Cuih ṭum ah Efraim ralkap thawng sawmli le thawng hnih an thi a si.

⁷Gilead mi Jefthah cun Israel thuṭhentu kum ruk sung a ṭuan. A thih tikah Gilead ram amah ih khua ah an phum.

⁸Jefthah thih hnuah Israel cu Bethlehem khua mi Ibzan in a ho.

⁹Ibzan in fapa sawmthum le fanu sawmthum a nei. A fanu sawmthum pawl cu hrindang mi pasal a neihter hai ih, a fapa sawmthum hrangah khal hrindang mi nupi a neihter. Ibzan in Israel cu kum sarih sung a ho.

¹⁰A thih tikah Bethlehem khua ah an phum.

¹¹Ibzan thih hnuah Zebulun mi Elon in Israel cu kum hra sung a ho.

¹²Elon cu a thi ih Zebulun ram sung Aijalon khua ah an phum.

¹³Elon thih hnuah Pirathon khua mi Hillel ih fapa Abdon in Israel cu a ho.

¹⁴Abdon in fapa sawmli le tupa sawmthum a nei ih laak sawm sarih parih a to ṭheu mi an si. Abdon in Israel cu kum riat sung a ho.

¹⁵A thi ih Amalek mi pawl ih tlangpar ram, Efraim ram sungih Pirathon khua ah an phum.