Read Falam Chin THUṬHENTU 14 Bible Online

THUṬHENTU 14 - Falam Chin bible

THUṬHENTU 14

¹Samson cu Timnah khua ah a vung leng ih cutawkah Filistin fala pakhat a hmu.

²An innih a tlun sal tikah a nu le a pa hnenah, “Timnah khua ah Filistin fala pakhat ka hmu. I biaksak hram uh. Ka ṭhi duh a si,” tiah a ti.

³Asinain a nu le a pa cun, “Ziangah so serhtan lomi Filistin mi pawl ih nunau cu nupi ah na duh ngelcel? Kan sungkhat le kan miphun pawl lak ahhin na duhmi fala pakhat hman an um lo maw si?” tiah an ti. Asinain Samson in, “In ṭhitsak dingih ka duhmi cu amah pakhat lawng hi a si. Amah lawng ka duhmi a si,” tiah a pa hnenah a ti.

⁴Filistin mi pawl do dingah BAWIPA in tikcu ṭha a hawl ruangah BAWIPA in Samson cu hiti in thil a tuahter a si, ti kha a nu le a pa in an thei lo. Culai ahcun Israel mi uktu cu Filistin mi an si.

⁵Samson cu a nu le a pa thawn Timnah ah an vung feh. Cutawk lampi sabit lo sungih an feh laiah Samson cu kiosa note pakhat in a rak hngirhngir.

⁶Cutikah BAWIPA ih thlarau cu Samson parah nasa zetin a thleng ih me note bauhthlek sehla cubangin kiosa cu a kut lawngin a bauhthlek thluh. Cutiih a tuahmi cu a nu le a pa a sim lo.

⁷Cule falanu hnen ahcun a feh ih thu tla an rel tlang ih a lung a kimzet.

⁸Tikcu malte a rei hnuah acuih fala ṭhi dingah Samson cu a vung feh lala. A feh laiah cun a rak thahmi kiosa ruak zoh dingah lamzin ihsin malte a pial duak ih a zoh tikah kiosa ruak sungah cun khuaibu khat a tizu thawn a hmu.

⁹Khuaitizu cu a lakih a feh phah in a ei vivo. A nu le a pa hnenah a va thleng ih khuaitizu cu a pek ve. Annih khal in an ei; asinain kiosa ih ruak sung ihsin a lak thu a nu le a pa a sim lo.

¹⁰Samson ih pa cu falanu ih inn ahcun a feh ih, culai tlangval pawl ih tuah ṭheu mi daan bangtuk in Samson in puai a tuah.

¹¹Filistin mi pawl in Samson an hmuh tikah a hnenih um dingah tlangval sawmthum an pek.

¹²Cule Samson in an hnen ahcun, “Thu ka lo polh hai ding. Nupi ṭhitnak puai ni sarih sungah ka thupolhmi ih tican in sim thei a si ahcun sunghruk puannemte zun sawmthum le hnipuan thlengnak korfual zun sawmthum ka lo pe hai ding.

¹³Asinain in sim thei lo a si ahcun sunghruk puannemte zun sawmthum le hnipuan thlengnak korfual zun sawmthum in pe ding,” tiah a ti. Annih in, “Na thupolh cu in sim hnik-aw he. Kan ngai hnik pei cu,” tiah an ti.

¹⁴Cutikah Samson cun: “Sa eitu sungin ei ding a suak, A cak sungin a thlummi a suak,” a ti. Ni thum sung a thupolhmi cu an ruat rero naón an thei thei lo.

¹⁵A ni linak ah Samson ih nupi hnenah cun, “A thupolhmi hi na hnenih phuang dingin na pasal hi leem aw. Cutiih na leem lo asile na pa ih inn kan ur pei ih nangmah khal kan lo ur cih ding. Hi puai ih in sawm hi farah thluh hai seh ti in duh ruangah maw a si?” tiah an ti.

¹⁶Curuangah Samson cu a nupi in ṭap phah in a pan ih, “I duh ngaingai lo a si; i hua a si hi! Ka rualpi pawl cu thu na polh ih a tican cu keimah rori hman i sim duh lo hi!” tiah a ti. Samson in a nupi hnenah, “Ruat ve hnik! I hringtu ka nu le ka pa hman ka sim lo. Ziangtin so nang ka lo sim thei ding?” tiah a sawn.

¹⁷Curuangah ni sarih sung puai a reh lai hlanlo nitinte a pasal cu a ṭah hnawh ringring. Cutiih thlah loih a ngiar tuk ruangah a ni sarihnak ahcun a thupolhmi ih tican cu a nupi hnenah a sim. Cule a nupi cun a rualpi pawl a sim sin.

¹⁸Curuangah ni sarihnak ni, a ihnak khaan sungih Samson a luh hlanah, khuasung mi pawl cun, “Khuaitizu hnakin a thlum sawn ziangso a um ding? Kiosa hnakin a caksawn ziangso a um ding?” tiin a thupolhmi cu an let. Cutikah Samson in, “Ka caw late thawn leilet hlah uhla cu, Nan thei lo ding nan ka thupolh mi cu,” a ti.

¹⁹Cule BAWIPA ih thlarau in Samson cu nasa zetin a umpi. Ashkelon ah a vung feh ih cutawk ah minung sawmthum a that ih an hnipuan a lak ṭheh ih a thupolhmi a let theitu pawl cu a pek. Cule a thinheng zetin a pa ih inn ah a tlung sal.

²⁰A nupi cu Samson ih rualpi ṭha bik, a nupi ṭhit lai ih a dinpitu an neihter.