Read Falam Chin THUṬHENTU 15 Bible Online

THUṬHENTU 15 - Falam Chin bible

THUṬHENTU 15

¹Tikcu a hung rei deuh ih sangvut khawm caan a si tikah Samson cu a nupi leng dingah a feh ih me thuangte khal a hrangah a keng. Samson in, “Ka nupi ihnak khaan sungah ka lut duh,” tiah a puzon cu a sim. Asinain a puzon cun a lutter duh lo.

²A puzon cun, “Ka fanu cu na hua ngaingai a si, tiin ka zum ruangah sokhaw na rualpi pa hnenah ka pek. Asinain, a ngaingai ti ahcun anih hnakin a naunu sokhaw a mawi sawn. Na duh ahcun amah sawn hi ṭhi aw,” tiah a ti.

³Cutikah Samson cun, “Tuihṭum cu Filistin mi parah thil ṭha lo ka tuah khalle mawhthluk ka si lo ding,” a ti.

⁴Curuangah a feh ih cinghnia zathum a va kai. Cinghnia cu pahnih pahnih in an mei a ṭem ih an mei karlak ahcun meifar a ṭem cih.

⁵Meifar cu a vang ih Filistin mi pawl ih sangvut lo lakah cun cuih cinghnia pawl cu a thlah ciamco. Cuticun an khawm ciami sangvut lawng si loin an lo sungih a um laimi sangvut tiangin a kangter thluh. Olif hmuan pawl khal a kang ṭheh.

⁶Cutikah Filistin mi pawl in, “Hitiih a tuahtu cu zoso a si?” an ti ih Samson a si ti kha an thei. Ziangah cutiin a tuah tile Timnah mi a puzon in a nupi a lon sal ih a rualpi pa hnenah a pek ruangah a si. Curuangah Filistin mi pawl an feh ih cuih nunau nu cu meisa in an ur that ih a pa ih inn khal an ur thluh.

⁷Cutikah Samson in, “Hitiin maw nan thil tidaan a si! Siatcam in thu ka lo kam: nan parih phu ka lak hlanlo ka cawl lo ding,” a ti.

⁸Curuangah nasazet in a do ih Filistin mi tampi an thi. Cuih hnuah a vung feh ih Etam khaam ih lungpuk sungah a vung um.

⁹Filistin mi pawl cu an hung ih Judah ram ah ṭanhmun an khuar ih Lehi khua an nam.

¹⁰Cule Judah mi pawl in, “Ziangah so kannih in do?” tiah an sut tikah, Filistin mi pawl in, “Samson kaih kan duh ruangah a si; in tuah vekin kan tuah ve ding,” an ti.

¹¹Cutikah Judah mi thawng thum cu Etam khaam ih lungpuk ah an vung feh ih Samson hnen ahcun, “Filistin mi pawl cu kanmah uktu an si hi na thei lo mawsi? Kan parih na thlentermi thil hi zohhnik!” tiah an ti. Samson cun, “Ka parih an tuahmi vekin an parah ka tuah ve a si ko,” tiah a ti.

¹²Cule Judah mi pawl in, “Nangmah lo ṭawnhrem tahrat in Filistin mi pawl hnenih pek dingah kan ra a si,” tiah an ti. Samson cun, “Cuti asile, kanmah cun kan lo that lo ding, tiah siatcam in thu i kam uh,” a ti.

¹³Cutikah annih in, “Asi, a ṭawn lawng kan lo ṭawn pei ih an hnenah kan lo pek ding. Kan lo that hrimhrim lo ding,” tiah thu an kam. Curuangah hridai tharte pahnih in an ṭawn ih khaam ih lungpuk cun an hun suahpi.

¹⁴Samson cu Lehi khua a thlen tikah Filistin mi pawl a hnenah au phah in an ra tlan ciamco. Cutikah Samson cu BAWIPA ih thlarau in nasa zetin a umpi ih a baan le a kut ih an ṭawnnak hridai pawl cu olte in a botcat thluh; a ol tukah pat phang khat meisa ih ur cat vekin an cat mai.

¹⁵Cule laak khaberuh pakhat Samson in a hmuh ih a vun dawh ih a lak hnuah cumi cun Filistin mi thawng khat a vuak that.

¹⁶Cutikah Samson cun, “Laak khaberuh pakhat in milai thawng khat ka that, Laak khaberuh pakhat in miruak a thuah in ka thuah,” tiah a ti.

¹⁷Cuih hnuah laak khaberuh cu a hlon. Cuih hmun cu Ramath Lehi[16] tiah an ti.

¹⁸Samson cu a ti a haal ngaingai ih BAWIPA a ko ih, “Maw BAWIPA, na salpa kei hi ralnehnak tumpi i pe zo. Atu hi tihal in ka thi zik thlang; hiti in mawsi tihal in ka thih ding ih serhtan lo Filistin mi pawl ih kut sung ka thlen ding?” tiah a au.

¹⁹Cutikah Pathian in cutawk Lehi ih leilung sung ihsin kua a ongter ih cutawk ihsin tidai a hung put. A cuih tidai cu Samson in a in ih a tha a kim sal ih a cak sal. Curuangah acuih cirh cu En-Hakkore[17] tiah hmin an sak. Tuihsan tiangin Lehi ah a um lai a si.

²⁰Filistin mi in an ram an uk laiah Samson in Israel hotu kum kul sung a ṭuan.