Read Falam Chin THUṬHENTU 17 Bible Online

THUṬHENTU 17 - Falam Chin bible

THUṬHENTU 17

¹Efraim tlangpar ramah Mikah an timi mipa pakhat a um.

²Voikhat cu a nu hnenah, “Na ngun tangka thawngkhat le zakhat an ruk laiah a rutu kha na cam ciamco a si. Na cam lai rori ka lo thei a si. Zohhnik, na ngun tangka cu ka hnenah an si. Keimah in ka lak,” tiah a ti. Cutikah a nu in, “BAWIPA in lo thlawsuah hram seh, ka fapa,” tiah a ti.

³Cule a fapa in ngun tangka thawngkhat le zakhat cu a nu hnenah a pek sal. Cutikah a nu in, “Ka siatserhnak cu na parih thleng lo dingah hi tangka hi atu ihsin BAWIPA hnenah ka pek ih thing ih tuah mi milem le burmi milem tuahnak ah a si pei. Curuangah hi tangka cu atu na hnenah ka lo pek sal a si,” tiah a ti.

⁴Mikah cun a nuih hnenah tangka cu a khirh sal. A nu in ngun tangka zahnih a lak ih ngunsertu hnenah a pek. Cule ngunsertu cun milem ah a bur ih a tuah. Cule Mikah ih inn ah an ret.

⁵Mikah cu amahte in biaknak inn a nei. Milem pawl a tuah ih puithiam angki ṭaangthlaih khal a tuah. Cule a fapa pawl lakah pakhat cu puithiam ah a ret.

⁶Culai ahcun Israel ram sungah siangpahrang an um lo ih mikip in an duhduh in an nung.

⁷Judah ram Bethlehem khua ah tlangval pakhat[19] a um. Amah cu Judah ramih a ummi Levi miphun a si.

⁸Voikhat cu khawdang vai dingin Bethlehem khua ihsin a suak. A feh vivo ih Efraim tlangpar ih a um mi Mikah innah cun a thleng.

⁹Cutikah Mikah in, “Khuitawk inso na rat?” tiah a sut. Tlangval pa cun, “Judah ram Bethlehem khua ihsin ka ra ih Levi miphun ka si. Umhmun khuarnak ka hawl vivo a si,” tiah a ti.

¹⁰Cutikah Mikah in, “Ka hnenah hin um aw. Ka hrangah remruattu le puithiam si awla kum khatah ngun tangka fanghra ka lo pek ding. Hnipuan khal ka lo pek ding ih rawl khal ka lo cawm ding,” tiah a ti.

¹¹Levi tlangval pa cun Mikah hnenih um cu a lung a kim ih a fapa vek rori ah a cang.

¹²Cule Mikah in a puithiam ah a tuah ih a inn ah a um.

¹³Mikah cun, “Levi mi ka puithiam ih ka neih ruangah atu cun BAWIPA in i hlawhtlingter ding ti ka thei,” tiah a ti.