Read Falam Chin THUṬHENTU 20 Bible Online

THUṬHENTU 20 - Falam Chin bible

THUṬHENTU 20

¹Israel miphun pawl, saklam bik Dan ihsin thlanglam bikih Beersheba tiang, le nisuahnak lam ih Gilead ram tiangin, an zatein an suak ih thinlung khat pu in Mizpah ah BAWIPA ih hmaiah an tongkhawm thluh.

²Hitiih Pathian minung pawl a khawmmi lakah Israel miphun pawl ih hotu kimtein an tel thluh. Ke ralkap lawnglawng thawng zali an si.

³Israel miphun pawl hmuahhmuah Mizpah ah an feh thluh ti kha Benjamin mi pawl in an thei. Cule Israel mi pawl cun, “Na nupisun an thahnak thuhla in sim hnik,” tiah Levi miphun pa cu an ti.

⁴Cutikah a nupisun an thah mipa Levi pa cun, “Ka nupisun le keimah cu Benjamin ram sung Gibeah khua ah zan riak dingin kan feh.

⁵Gibeah mi pawl cu an ra ih keimah thah tum in kan riahnak inn cu zan ah an kulh ṭheh. Ka nupisun sawn an sualpi ih a thi.

⁶Cutikah a ruak cu ka phur ih ka can thluh ih Israel ram khuazakip ah ka kuat. Hi khua mi pawl in thil ṭha lo le thil borhhlawh kan parah an tuah a si.

⁷Hitawkih a ra suakmi hi Israel mi hlir kan si. Ziangtin so tuah sehla a ṭha ding tiah nan ruat?” tiah a ti.

⁸Cutikah an zatein hmun khat ah an ding ih, “Zohman inn ah kan tlung lo pei. Deu sungih a ummi kan si khalle, inn ngaingai sungih a ummi kan si khalle, kan tlung lo pei.

⁹Kan tuah dingmi cu hiti in a si pei: Gibeah khua dotu dingah camcawhfung zuk in mi kan hril pei.

¹⁰Israel minung zate ih ṭhen hra ṭhen khat in kan ralkap pawl hrangah rawl kan phur pei. A dang hmuahhmuah cun Israel ram sungih thil borhhlawh an tuah ruangah Gibeah mi pawl kan hrem pei,” tiah an ti.

¹¹Cuticun Israel mi hmuahhmuah cu thukhat vua in Gibeah khawpi siim dingah an khawm-aw.

¹²Israel miphun pawl cun Benjamin miphun ih ram sung khuazakip ah mi an thlah ih, “Ziangtluk thil ṭha loso nan tuahmi hi a si?

¹³Gibeah khawsung ih mi huatsuak pawl cu kan hnenah rak keng uh; kan that ding ih cuticun Israel ram kan thianfaiter ding,” tiah an ti. Sikhalsehla Israel mi pawl ih ṭongmi cu Benjamin mi pawl in zianghman ah an siar lo.

¹⁴Cule Benjamin ram sungih khawpi hmuahhmuah in mi tampi Israel do dingin Gibeah khua ah an ra.

¹⁵Cuih sun lawnglawng ah an khawpi pawl ihsin ralkap thawng kul hluanruk, ralnam keng fetfet, an ko. Cuih tlunah Gibeah khua mi pawl in a hleice ih hrilmi ralkap za sarih an khawm.

¹⁶Ralkap hizat sung ihsin an hrilce mi kehtlak minung za sarih cu an zatein, lungherhden thiam lamah cun, samphang pakhat hman ṭhelh loih sai thei pawl an si.

¹⁷Cun Israel mi pawl cun Benjamin mi siar loin raldo thiamzet nam keng ralkap thawng zali an ko khawm.

¹⁸Israel mi pawl cu Bethel khua ih Pathian biaknak hmun ah an feh ih Pathian hnenah, “Zohrin inso Benjamin cu a do hmaisa ding?” tiah an ron. BAWIPA in, “Judah hrin in do hmaisa hai seh,” a ti.

¹⁹Curuangah Israel mi pawl cu a thaizing an tho ih Gibeah khua kiangah an riak.

²⁰Cule Benjamin do dingah an pok ih ralkap pawl cu Gibeah khua ih hmai zawn ah an ṭang.

²¹Benjamin ralkap pawl cu khawsung ihsin an ra suak ih an do-aw ih cuih ni ah Israel ralkap thawng kul hluanhnih an that.

²²Israel mi pawl cu Bethel ah an hung feh ih BAWIPA ih hmaiah zanlam tiang ninghang riahsia in an ṭap. Cule annih in, “Kan unau Benjamin mi do dingah kan feh sal pei maw?” tiah BAWIPA an ron sal. Cutikah BAWIPA in, “Feh uhla do sal uh,” tiah a ti. Curuangah Israel ralkap pawl cu an tha a tho sal ih an ralkap pawl a hmaisa ih an ṭannak hmun thotho ah an ṭanter sal.

²³

²⁴Hihi Benjamin do dingah a voihnihnak an tiar awknak a si.

²⁵Cule a hmaisa vek thotho in Benjamin ralkap pawl cu Gibeah khawsung ihsin an ra suak ih Israel ralkap raldo thiamzet pawl cu thawng hleiriat an that lala.

²⁶Cutikah Israel mi hmuahhmuah Bethel ah an hung feh ih ninghang riahsia in an ṭap ciamco. BAWIPA ih hmaiah cun zanlam tiang rawl khal ei loin an to. Cule remnak thawinak le meiur thawinak pawl cu BAWIPA ih hnenah an pek.

²⁷Culai ahcun Pathian Thukam Kuang cu Bethel ah a rak um ih,

²⁸Eleazar ih fapa Finehas in puithiam a ṭuan. Eleazar cu Aaron ih fapa a si. Cun BAWIPA hnenah thu an ron sal ih, “Kan unau Benjamin mi pawl do dingah kan pok sal pei maw, a si lole kan baang dingso?” tiah an ti. Cutikah BAWIPA in, “Do uh. Thaisun cu anmah nehnak ka lo pe ding a si,” tiah a ti.

²⁹Curuangah Israel mi pawl cun Gibeah kiangkap ah ralkap hrekkhat a thupte in an bawhter.

³⁰Cule a ni thumnak ni ah Benjamin do dingah an feh ih a hlan vek thotho in an ralkap pawl cu Gibeah khua ih hmaiah cun an ṭang.

³¹Benjamin ralkap pawl cu a hlan vek thotho in an khawsung ihsin an ra suak ih Israel ralkap hrekkhat pawl Bethel lamzin le Gibeah lamzin le hramlak ah an that. An thahmi cu ralkap sawmthum tluk an si.

³²Benjamin ralkap pawl cun, “A hlan vek thotho in kan neh ding a sihi,” an ti. Asinain Israel mi pawl cun, “Dunglam ah kan siip vivo pei ih Benjamin ralkap pawl an khua suahsan thluh hai sehla lamzinpi hi run zawh hai seh,” an ti.

³³Curuangah Israel ralkap pawl tam sawn cu dunglamah an siip ih Baal-tamar ah an khawm-aw thluh sal. Cule Gibeah khua kiangih a rak thup-awmi ralkap pawl cu an thuh awknak ihsin an ra suak.

³⁴Israel mi sung ihsin hrilcemi ralkap thawng hra pawl in Gibeah khua cu an nam ciamco ih nasazet in an do-aw. Asinain Benjamin mi pawl cun kan van a duai thlang ding a si, ti an thei lo.

³⁵Benjamin ralkap pawl parah nehnak cu BAWIPA in Israel mi hnenah a pek zo. Curuangah Israel mi pawl in ni khat sungah Benjamin ralkap thawng kul hluannga le zakhat an that.

³⁶Cutik lawngah Benjamin mi pawl in kan sung a si ti an thei. Israel mi pawl cun Gibeah kiangkapih a thup awmi an ralkap hrekkhat pawl kha an rinsan ruangah Benjamin ralkap pawl ih hmai ahcun dunglam ah an siip vivo.

³⁷Hi a thup awmi ralkap pawl cu hmakhatte-ah Gibeah khua sungah an lut ih an ṭhek-aw ih khawsung mi hmuahhmuah cu an that thluh.

³⁸Israel mi pawl le a thup awmi an ralkap pawl cu tiam awknak an rak nei. An tiam awknak cu: Gibeah khua sung ihsin meikhu tamzet van ih a kaimi an hmu asile,

³⁹Israel mi pawl ral an donak ah dunglam siip nawn loin hmailam ih nor ding an si. Benjamin mi pawl in cutiang ahcun Israel mi sawmthum an that zo ih anmah le anmah cu, “A hlan vek thotho in kan neh a sihi,” an ti aw rero.

⁴⁰Cutikah an tiam-awk cia vek in Gibeah khawsung ihsin meikhu a suak ngualngo kha an hmu. Benjamin ralkap pawl in an dunglam an hei zoh tikah an khua cu a pum tein a kang rero kha an hmu ih an mang a bang ngaingai.

⁴¹Cuvete in Israel ralkap pawl cu an her sal ih, an nor ciammam ih, Benjamin ralkap pawl cu an lung hmuah a aa thluh; ziangahtile kan ci in hmit thluh thlang ding a si ti an thei.

⁴²Curuangah dunglamah an siip ih hramlak lamah an tlan. Asinain an tlan suak thei lo. Israel ralkap burpi pawl le khawsung ihsin a ra mi ralkap pawl in an ciipton ih an sat that ciamco.

⁴³Cutiih an ciipton hnuah an dawi ih Gibeah ihsin nisuahnak lam tiang an dawi vivo ih lamzin tluanah an thah phah vivo.

⁴⁴Benjamin ralkap ṭha bik pawl thawng hleiriat an that.

⁴⁵A dang pawl cu Rimmon ih Lungpi lamah hramlak ah an tlan. Lam tluanah thawngnga an that. A taanglaimi pawl cu Israel mi pawl in Gidom tiang an dawi ih an saat that phah vivo. Cunah thawnghnih an that.

⁴⁶Azate kom ah, Benjamin ralkap ralṭha zetzet lawnglawng thawng kul hluannga an that.

⁴⁷Asinain minung zaruk cu Rimmond Lungpi lamah hramlak ah an tlan suak ih cutawkah thla li an um.

⁴⁸Cule Israel mi pawl cu an kir sal ih khawsungah an feh ih mipa siseh, nunau siseh, nauhak le ṭilva tiangin an hmuhmi hmuahhmuah an thah thluh. Cuih kiangkapih khua hmuahhmuah khal an ur thluh fawn.