Read Falam Chin THUṬHENTU 21 Bible Online

THUṬHENTU 21 - Falam Chin bible

THUṬHENTU 21

¹Israel mi pawl in Mizpah ah BAWIPA ih hnenah thukamnak fekzet pakhat an tuah. An thukam mi cu, “Kanmah lakah zohman in kan fanu pawl cu Benjamin miphun pawl ih ṭhit dingah kan pe lo pei,” ti a si.

²Cule Israel mi pawl cu Bethel ah an ra ih, BAWIPA ih hmaiah zanlam siim hnu tiang an to ih napi in an ṭap ciamco.

³An ṭah phah cun, “Maw BAWIPA, Israel ih Pathian, ziangah so hivek thil hi kan parih a thlen? Israel miphun lakah hrin khat cu a hlohralta ding hi!” tiah an ti.

⁴A thaizing zingpitah Israel mi pawl cu an tho ih cutawkah biakṭheng an dawl. Remnak thawinak pawl le mei-ur thawinak pawl cu BAWIPA hnenah an pek.

⁵Cule annih in, “Israel miphun pawl sungah BAWIPA ih hmai ih pumkhawmnak ah hin a ra suak lomi zo so a um?” tiah an sut-aw. Mizpah ah BAWIPA ih hmai ih a ra suak lomi cu thah an si ding, tiah fekzetih thukamnak an rak neih zomi a si.

⁶Asinain an unau Benjamin phun hrangah cun Israel mi pawl cu an riah a sia ngaingai. “Tuihsun ahhin Israel mi pawl in kan phunpi pakhat pumpi in kan hloter a si.

⁷Anmah ih sung ihsin a taangmi pawl hrangah ziangtinso nupi kan holh ding. Kan fanu pawl cu an ṭhit dingah kan pe lo pei tiah BAWIPA ih hnenah siat kan serh zo fawn,” tiah an ti.

⁸Cule pakhat le pakhat, “Israel miphun pawl sungin zoso Mizpah ah BAWIPA ih hnenah a ra lomi a um?” tiah an sut-aw. Cutikah Gilead ram ih Jabesh ihsin pakhat hman an pumkhawmnak ah an ra lo, ti an thei.

⁹Israel mi pawl cu an siar-awk tikah Jabesh ihsin pakhat hman an tel lo ngaingai.

¹⁰Curuangah an ralkap lakih ralṭha bik pawl thawng hleihnih an thlah ih, “Hung feh uhla Jabesh khawsung ih a ummi hmuahhmuah nunau le nauhak tiangin hung that thluh uh.

¹¹Fala siar lo mipa siseh nunau an zatein that thluh uh,” tiah thu an pek. Cule an thupekmi vek cun an tuah thluh.

¹²Jabesh khawsungah fala note zali an rak um ih cu pawl cu that loin Kanaan ram, an riahnak Shiloh ahcun an run hruai.

¹³Cule a pumkhawmmi pawl cun Rimmon Lungpi ih a ummi Benjamin mi pawl hnenah cun mi an hei thlah ih ralremnak thu an cah.

¹⁴Benjamin mi pawl cu an ra kir ih Israel mi pawl cun Jabesh khua ihsin that loih an run hruai mi fala pawl cu nupi ah an pek. Asinain fala in an daih lo.

¹⁵Israel miphun pawl pumkhat vekih a rak ummi cu BAWIPA in a ṭhenṭhek thluh ruangah Israel mi pawl cu Benjamin mi pawl hrangah an riah a sia ngaingai.

¹⁶Curuangah a khawmmi hotu pawl cun, “A taang hrih mi Benjamin mipa pawl hrangah ziangtinso nupi kan hawl sak ding? Benjamin miphun ih nunau pawl le thah thluh an si zo fawn.

¹⁷Israel miphun phun hleihnih sungih sin phun khat hman hloralta ding cu kan siang lo. Benjamin miphun a nun theinak dingin lamzin kan hawl suak tengteng a ṭul a si.

¹⁸Asinain kan fanu pawl an ṭhit ding cu a cang thei fawn lo,” tiah an ti. Ziangahtile, zohman in nan fanu cu Benjamin mi ih nupi dingah nan pe lo pei, tiih siatcam ih thu an rak kam zo ruangah a si.

¹⁹Annih in, “Shiloh ah BAWIPA hrangih kumtin tuah ṭheu mi puai cu rei lote-ah a um thlang ding a si,” an ti. Shiloh khua cu Bethel ihsin saklam ah, Lebonah ihsin thlanglam ah, le Bethel le Shekhem karlak lamzin ihsin nisuahnak lamah a um.

²⁰Israel mi pawl in Benjamin mi pawl hnen ahcun, “Va feh uhla sabit hmuan sungah va relh uh.

²¹Cule rak zoh ṭha uhla hi puai sungah Shiloh khua ih fala pawl an ra ding ih an laam ding a si. Cutikah sabit hmuan sung ihsin suak uhla cuih fala pawl sung ihsin nan duhmi ciar cu an duh lo cingin kai uhla hruaimai uh. Cule nan Benjamin ram ah fehpi uh.

²²An pa le an ṭapa pawl kan hnenih an rat ih an lungkim lonak an ra sim a si khalle kannih in, ‘Ngaithiam hai uh; nan fanu pawl cu co ko hai seh. Ziangahtile raldo laiah an nupi dingah kan kaihmi an si lo. Nan lungkim in nan pek mi an si fawn lo. Nan pekmi an si lo ruangah siatcam ih kan thukam mi nan buar fawn lo,’ tiin kan rak sawn ding,” tiah an ti.

²³Curuangah an sim vek in Benjamin pawl cun an tuah. A laammi fala pawl sung ihsin an nupi dingah pakhat ciar an kaih ih an tlanpi. Cule an ramah an tlung ih umhmun an khuar ih an khawpi pawl an sak sal.

²⁴Culai ah Israel mi pawl khal cu an ṭiak ih anmah ih hnam le hrin le innsang ciar in an khua le an ram ciar ah an tlung.

²⁵Culai ah Israel mi pawl in siangpahrang an nei lo. Mi hmuahhmuah in an duhduh in an nung.