Read Falam Chin THUṬHENTU 5 Bible Online

THUṬHENTU 5 - Falam Chin bible

THUṬHENTU 5

¹Cuih sunah Deborah le Abinoam ih fapa Barak in hi hla hi an sak:

²BAWIPA cu thangṭhat uh! Israel hotu nasa zetin an ṭang, Israel mi pawl tha tho zetin ral an do ruangah, BAWIPA cu thangṭhat uh.

³Maw siangpahrang pawl, ngai uh; Maw uktu pawl, theihnik uh; BAWIPA hnenah awnmawi ka tum dingih hla ka sak ding, BAWIPA Israel Pathian hnenah.

⁴Maw BAWIPA, Seir tlang ihsin na pok ih, Edom ram rawn na pal tikah, Leilung a hnin durdo ih van ihsin ruah a sur; Asi, khawdur ihsin tidai an tla.

⁵Sinai tlang ih BAWIPA hmai ahcun, Tlang pawl an hnin aw; BAWIPA, Israel ih Pathian hmai ahcun.

⁶Anath ih fapa Shamgar sanah, Jael ih san ahcun, Khual tlawnnak lamzin a ṭhing reprep, A tlawng pawl cun zinte an zawh.

⁷Israel khua pawl an ṭhing thluh, Riangvai za in an dai ṭhepṭhep; Israel ih nu a si mi Deborah na thlen hlanah cun.

⁸Israel in khawzing thar pawl a hril tikah, Doral an khua kotka an ra thleng; Israel mi thawng sawmli lakah, Phaw le feipi kengtu pakhat tal an um maw?

⁹Ka thinlung Israel ralbawi pawl hnenah a caam ringring; Thinlung tho teih ral a dotu Israel mi hnenah cun. BAWIPA cu thangṭhat uh!

¹⁰Hi thu cu sim ciar uh, Laak raang parih a to mi pawl; Rang todan parih a tomi pawl le, Ke lawngte in a fehtu pawl khal in sim ciar uh.

¹¹Ngai hnik uh! Tikhur kiangih mipi au thawm cu, BAWIPA ih nehnak an aupi a si; Israel miphun ih nehnak cu! BAWIPA ih minung pawl cu an khua ihsin an vung feh.

¹²Tho aw, Deborah, tho awla hruai aw; Tho aw, hlasak phah in hruai hai aw. Hmai ah, Abinoam ih fapa Barak, Na kaih mi pawl hruai hai aw.

¹³Israel mi pawl cu an hotu hnenah an rung; BAWIPA ih minung pawl raldo dingin an ra.

¹⁴Efraim hrin pawl phairawn an thleng, Benjamin hrin pawl in an run thlun. Makhir ihsin ralbawi pawl, Zebulun in bawi pawl an rung.

¹⁵Issakhar hotu pawl cu Deborah thawn an ra, Asi, Issakhar a ra, Barak thawn, Phairawn ram ahcun an vun thlun. Reuben hrin pawl an cu ṭhen aw, Feh ding thu an relcat thei lo.

¹⁶Ziangah so tuukhal pawl dungah an din ringring? An tuu kawhnak ngai dingah maw? Asi, Reuben hrin pawl cu an ṭhenṭhek aw; Tel ve dingah an relsuak thei lo.

¹⁷Gad hrin pawl Jordan khatlam ralah an um, Dan hrin pawl cu ṭilva tlannak ramah an um. Asher hrin pawl cu tifinriat kapah an um, Tikap ahcun an um meen ringring.

¹⁸Asinain Zebulun le Naftali hrin pawl cu, Sa le ral lakah an nunnak pek an ngam a si.

¹⁹Siangpahrang pawl an ra ih ral an do, Megiddo tiva kiang Taanak khua ahcun; Kanaan siangpahrang tla in an do, Asinain sumsaw lon mi an nei lo.

²⁰Van ih arsi pawl khal in, Van ih an fehnak ihsin, Sisera cu an do ciamco.

²¹Kishon tiva a lian ih a fen thluh hai, A luang kumkhua mi Kishon cun. Cak sinsin in hmaiah ka nor ding.

²²Cule rang pawl cu an tlan ciamco, An ketin in leilung an khawn ciamco.

²³“Meroz cu siatserh si ko seh, Khawsung mi pawl siatserh si ko seh; Ziangahtile BAWIPA bawm dingah an suak lo, BAWIPA ih ral an do lo,” tiah BAWIPA ih vancungmi in a ti.

²⁴Jael cu nunau lakah vannei bik a si, Ken mi Heber ih nupi cu; Puanthlam ih a ummi nunau lakah, Jael cu mi sunglawi bik a si.

²⁵Sisera in tidai a dil ih cawhnawi a pek, Kheng mankhung in cawhnawi hlap a pek.

²⁶A kehlam kut in puanthlam khennak fungzum a kai, A vorhlam kut in hnaṭuantu-ih sobul a thlir, Sisera ih lu a hnakhang cu a khen, A tlang ih a sop thluh.

²⁷Sisera cu a sawn ih a ril, Jael ih ke hram ahcun a ril riai; A ke hram ahcun a sawn ih a ril, A rilhnak hmun ahcun a thi.

²⁸Sisera ih nu cun sangkate in khua a cuan, Tukvirh ong in khawza a thlir; “Ziangah so a rangleng a thlen dah lo? Ziangah so a rang pawl hi an tlai e,” a ti.

²⁹A nunau lakih a fimbik pawl in an sawn, An simmi cu amah in a nolh sal vivo.

³⁰“An lon mi thil le sumsaw an zem aw, Ralkap pakhat hrangah fala pakhat maw pahnih maw, Sisera hrangah puan ṭelh mankhung, Siangpahrang nuih hngawng hrangah coihcinmawi puan mankhung,” an ti.

³¹Curuangah, Maw BAWIPA, na ral pawl cu hloral hai seh, Asinain nangmah a lo duhdawtu cu, Zinglam ih a suakmi ni bangtuk in cak hai seh. Cun ram sungah raldaihnak kum sawmli sung a um.