Read Falam Chin THUPHUAN 10 Bible Online

THUPHUAN 10 - Falam Chin bible

THUPHUAN 10

¹Cule a cak zetmi vancungmi pakhat vancung ihsin a rung ṭum ka hmu. Amah cu mero in a thuam aw ih a lu kimvelah vangro a lang. A hmai cu ni bangtuk a si ih a ke cu meisa ṭhuam bangtuk a si.

²A kut in pharh ciami cazual a keng. A vorhlam ke in tifinriat a pal ih a kehlam ke in leilung a pal;

³cule a au ih a aw rindan cu kiosa tampi aw bangtuk a si. Cutiih a au ṭheh vete in khuari pasarih in tlir durdo in an hun let.

⁴Cutiin an ṭong ṭheh vete in ca in ngan ka tum. Asinain van ihsin aw ka thei ih, “Khawri pasarih ih simmi kha thuthup ah re aw; ngan hrih hlah,” tiah i run ti.

⁵Cule ka hmuh ciami vancungmi, tifinriat le leilungih a dingtu in van lamah a vorhlam kut a khai ih,

⁶kumkhua-in kumkhua tiang a nungmi Pathian, van le leilung, tipi thuanthum le a sungih ummi hmuahhmuah a tuahtu Pathian ih hmin in siatcam in thukamnak a tuah. Cutikah vancungmi in, “A rei nawn lo ding.

⁷Vancungmi pasarihnak in a tawtawrawt a tum tikah a siahhlawh a si mi profet pawl hnenih a rak than ciami a thupte ih a tumtahmi cu Pathian in a kimter ding,” tiah a ti.

⁸Cule vancung ihsin aw ka theihmi in, “Va feh awla tifinriat le leilungih a dingtu kut sungih a ummi pharh ciami cazual khi va la aw,” tiah i run ti sal.

⁹Vancungmi hnenah cun ka va feh ih cazual fate cu ka va dil. Anih in, “La awla ei aw; na pum sungah a kha ding naón na kaa sungah cun khuaitizu bangin a thlum ding,” tiah i ti.

¹⁰I ti vekin cazual cu ka lak ih ka ei tikah ka kaa sungah khuaitizu vekin a thlum; asinain ka dolh tikah ka pum sungah cun a kha ngaingai.

¹¹Cule in sim sal ih, “Pathian in miphun tampi, hrin tampi, ṭong tampi le siangpahrang tampiih thu thawn peh aw in a simmi kha na phuan sal a ṭul ding,” tiah i ti.