Read Falam Chin THUPHUAN 11 Bible Online

THUPHUAN 11 - Falam Chin bible

THUPHUAN 11

¹Tahfung a bangmi funghreu pakhat i pek ih, “Va feh awla Pathian biakinn le biakṭheng va tah aw; cule biakinn sungih Pathian a biatu pawl siar aw.

²Asinain biakinn tual cu va tah hlah, ziangahtile Pathian thei lomi pawl hnenah pek a si zo ih cu pawl cun thla sawmli le thla hnih sung Khawpi Thiang cu an cilbal thluh ding.

³I theihpitu pahnih, buri hnipuan thawn thuam aw in, ka thlah ding; annih in Pathian thu cu profet bangin ni thawngkhat ni zahnih le sawmruk sung an sim ding,” tiah i ti.

⁴Cuih theihpitu pahnih cu leilung Bawipa ih hmaiah a dingmi Olif thingkung pahnih le mei-inn pahnih an si.

⁵Anmah a siatsuah tumtu an ral pohpoh cu an kaa sung ihsin a suakmi meisa in an siatsuah ding; cuti cun annih tuahmawh a tumtu cu thah an si ding.

⁶Van pihter theinak thu an nei ih Pathian thu an phuan sung cu van ihsin ruah a sur lo ding. Tidai tlun khalah thu an nei ih cerhti pawl kha thisen ah an canter thei. Leilung hi an duh tik caan pohah natnak a phunphun in hrem theinak thu an nei.

⁷An thusim an ṭheh tikah tawpneilo khur sung ihsin a suakmi sahrang in a do ding. A neh dingih a that ding.

⁸Cule an ruak cu an Bawipa thinglamtah parih an thahnak khawpi lamzin ah an taanta ding. Cuih khawpiih hmin deu cu Sodom a si lole Izipt a si.

⁹Miphun kip, hrin kip, ram kip le ṭong kipih mi hmuahhmuah in an ruak cu ni thum le a hrek sung an zoh ding ih a phum ding khal an kham ding.

¹⁰Hi profet pahnih an thih ruangah leilung tlun minung cu an lung a awi ding. An lungawinak puai an tuah ding ih pakhat le pakhat laksawng an ṭhen aw ding, ziangahtile hi profet pahnih ruangah leilung mi harsatnak tamzet an rak tuar.

¹¹Asinain ni thum le a hrek hnuah Pathian hnen ihsin nunnak petu thaw a ra ih an sungah a lut ih annih cu an hung ding; cumi a hmutu hmuahhmuah cu an tuk a sum ṭheh.

¹²Cule cuih profet pahnih cun van ihsin, “Hinah hung uh,” tiah a run titu aw ringzet an thei. An ral pawl ih mithmuh rori-ah annih cu mero thawn vancungah an kai.

¹³Cuih caan cekci-ah nasazet in ling a hnin ih khawpi ṭhenhra ih ṭhenkhat a siat ṭheh; minung thawng sarih an thi. Midang pawl cu ṭih le phangin an um ih vancung Pathian ih maksak zia an hmu ih an thangṭhat.

¹⁴Ṭihnungza pahnihnak cu a cem, asinain pathumnak rei lote-ah a ra ding.

¹⁵Cule a pasarihnak vancungmi in a tawtawrawt a tum ih vancungah a ring zetmi aw in, “Leilung tlun uk theinak huham cu kan Bawipa le a Messiah kut sungah a um zo ih kumkhua-in kumkhua tiang amah in a uk ding,” tiah an ti.

¹⁶Cutikah Pathian hmaiah an bawi tokham ih a totu upa kul hluanli pawl cu an bok ih Pathian an biak,

¹⁷Annih in, “Ziangkimtithei Bawipa Pathian, atu-ah a ummi le hlan ihsin a rak um zomi! A nasami na huham na langter ih uknak hram na thok zo ruangah kan lo thangṭhat.

¹⁸Na thinheng a langnak tikcu a thleng ih mithi pawl thuṭhen caan a kim ruangah, Pathian awi lo pawl an thin a ling in a ling. Na siahhlawh profet pawl le a lo upattu na minung pawl a tum a seen in ṭuanman an ngah caan a thleng a si. Leilung a siatsuahtu siatsuahnak an ton caan a thleng zo,” tiah an ti.

¹⁹Vancung ih a ummi Pathian biakinn an ong ih cutawkah Thukam Kuang a um. Cule nimthla a kau zukzo, khua a ri durdo, ling a hnin ih rial napi in a tla.