Read Falam Chin THUPHUAN 17 Bible Online

THUPHUAN 17 - Falam Chin bible

THUPHUAN 17

¹Cule kheng pasarih a kengtu vancungmi pasarih lakih pakhat ka hnenah a ra ih, “Ra awla tiva tampi kiangih toh-mi khawpi, hminthang hlawhhlangnu khi ziangvekin hremnak a tong ding, ti ka lo hmuh ding.

²Leilung tlun siangpahrang pawl amah thawn nupa sualnak an tuah ih leilungtlun mi pawl khal in amah ih tisa diriam sualnak sabitti an in ruangah an ri ṭheh a si,” tiah a ti.

³Thlarau in i zeel ih vancungmi in hramlakah i feh pi. Cutawkah sahrang sen parah nunau pakhat a to ka hmu; cuih sahrang taksa pumpuluk ah Pathian hmuhsuamnak hmin tampi an ngan ih cuih sahrang cu lu pasarih le ki pahra a nei.[6]

⁴Cuih nunau cu mepian sen le puansen dup in a thuam aw ih hlawnthil sui le tikep lung le lungmankhung dangdang in a taksa cu a khat ṭheh. A kut in sui khuathai pakhat a keng ih cuih khuathai cu a tisa diriam sualnak thil zoh mawi lo le fihnungza thil in a khat.

⁵A cal ah hmin pakhat an ngan ih tican thup a nei. “A maksak zetmi Babilon, hlawhhlang hmuahhmuah le misual borhhlawh hmuahhmuah ih nu,” ti a si.

⁶Cule cuih nunau cu Pathian mithiang pawl ih thisen le Jesuh an rinsan ruangih thah a tuartu pawl ih thisen a in ruangah a ri, ti ka hmu. Cuih nunau ka hmuh tikah ka mang a bang ngaingai.

⁷Cutikah vancungmi pakhat in, “Ziangah so na mang a bang? Nunau ih tican thup le nunau nu a tonak sahrang lu pasarih le ki pahra a nei mi sahrang ih tican thup cu ka lo sim ding.

⁸Hi na hmuhmi sahrang hi a rak nung dah naón atu cu a nung nawn lo; tawpneilo khur sung ihsin a hung suak ding ih siatralnak ah a feh lan ding. Leilung siam hlan ihsin nunnak cabu sungih hmin ngan lomi pawl in cuih sahrang an zoh tikah an mang a bang ngaingai ding. A rak nung dah naón atu cu a nung nawn lo; asinain a hung suak sal ding.

⁹“Fimnak le theihnak neih a ṭul. Lu pasarih cu nunau a tonak tlang pasarih an si.[7] Siangpahrang pasarih khal an si.[8]

¹⁰Cuih siangpahrang pasarih lakah panga cu an tlu zo; pakhat in a uk lai; a dang pakhat cu a ra hrih lo. A rat tikah tikcu tawite sung lawng a uk ding.

¹¹A rak nung dah naón atu-ah a nung nawn lomi sahrang cu siangpahrang pariatnak a si; siangpahrang pasarih lakih a telmi a si ih siatralnak ih a thleng dingmi a si.

¹²“Ki pahra na hmuhmi cu ram a uk thok hrih lotu siangpahrang pahra an si; asinain annih cu sahrang thawn nazi pakhat sung uk dingah thuneihnak pek an si ding.

¹³An pahra in an huham le an thuneihnak cu sahrang hnenih pe ding cu an tumtah ciarmi a si.

¹⁴Annih cu Tuufa an do ding; sikhalsehla Tuufa le amah ih a kawhmi, a hrilmi le amah a rinsantu pawl in an neh ding, ziangahtile Tuufa cu bawi hmuahhmuah lakih Bawi bik, siangpahrang hmuahhmuah lakih Siangpahrang sin a si,” tiin i sim.

¹⁵Cule vancungmi in, “Hlawhhlang nu ih tonak tidai na hmuhmi cu miphun kip, hrin kip, ram kip le ṭong kip an si.

¹⁶Na hmuhmi ki pahra le sahrang in hlawhhlang nu cu an hua ding; a neihmi thil hmuahhmuah an long ding ih a taklawngin an taan ding; a sa an ei ding ih meisa in an ur ding.

¹⁷Pathian tumtahmi an tuahsuaknak dingah Pathian in an thinlung sungah tuah duhnak thinlung a ret. Curuangah thinlung rualtein hna an ṭuan tlang ih Pathian thu a kim hlan sung an ram uknak huham cu sahrang hnenah an pek.

¹⁸“Na hmuhmi nunau cu leilung tlun siangpahrang pawl a uktu khawpi tumpi a si,” tiah i ti.