Read Falam Chin THUPHUAN 18 Bible Online

THUPHUAN 18 - Falam Chin bible

THUPHUAN 18

¹Hi hnuah vancungmi pakhat vancung ihsin a rung ṭum ka hmu. Amah cu thuneihnak huham tumzet a nei ih a tleunak in leilung pumpuluk a vangter ṭheh.

²Ring zetin a au ih, “Nunau nu a tlu zo! Babilon maksak cu a siat zo! Khawsia le thlarau borhhlawh in an luah ih a sungah fihnungza le mitkemza vate a phunphun in an khat.

³Ziangahtile miphun hmuahhmuah in a taksa hiar sualnak zu an in ih an ri ṭheh. Siangpahrang pawl thawn tisa sualnak an tuah ih sumtuahtu pawl khal supnak nei lo a taksa hiar nomnak thawngin milian ah an cang,” tiah a ti.

⁴Cule aw dang pakhat vancung ihsin ka thei ih, “Ra suak uh, ka minung pawl, Kha nu hnen ihsin ra suak uh. A sualnak sungah tel hlah uh, Hrem a tuarnak sung khalah tel hlah uh.

⁵Ziangahtile a sualnak cu van a tiang ih, A ṭhatlonak cu Pathian in a ciing ringring a si.

⁶Nanmah a lo tuah vek cekci-in a parah tuah ve uh. A tuahmi let hnih in phulei sam uh. Nan in dingih a rawimi hnakih let hnih cak in a in dingah a khuathai sungah rawi sak uh.

⁷Sunlawinak le nunnomnak amah le amah a rak pek awk zat in, natnak le riahsiatnak pe ve uh. Ziangahtile a thinlungte in, ‘Hinah ka to, siangpahrang bawinu ka si, nuhmei ka si lo, riahsiatnak ka tong dah lo ding,’ a ti.

⁸Hi vek a si ruangah ni khat sungah rinlopi in pulhnat in a tlun ding. Natnak, riahsiatnak le paampi a tong ding. Meisa ih ur a tong ding. Ziangahtile a thuṭhentu Bawipa Pathian cu Ziangkimtithei a si,” tiah a ti.

⁹A tisa sualnak le a taksa hiar nomnak sungih a teltu leilung siangpahrang pawl in Babilon khawpi meisa ih a kangnak meikhu an hmuh tikah an ṭap an ai ding.

¹⁰Cutiih a tuarnak an hmuh tikah tuar ve pang ding an ṭih ruangah hlavaang ah an ding ih, “Ziangtluk ṭihnungza so a si! Ziang tluk tuksumza so a si! Khua maksak le a cakmi Babilon khawlipi! Nazi pakhat sungah hremsiatnak na ton hi!” tiah an ti ding.

¹¹Leilung tlun sumtuah pawl khal cu nu hremsiatnak a ton cu an ninghanpi ih an ṭap, ziangahtile zohman in an thilri an lei nawn lo.

¹²Zohman in an sui, an ngun, an lungmankhung, an tikep lungmankhung le patzai in tahmi puanrang, mepian sendup puan, pu puan, puan sen le a ngah har zetmi thing ihsin tuah mi a phunphun, vuiho le thing mankhung ihsin tuahmi a phunphun, daar, thir, lungrang le,

¹³thinghawng hmui, masala, rimhmui, mura rimhmui, frankinsens rimhmui le sabitti le hriak, vainim le sangvut, caw le tuu, rang le rangleng, sal le minung khal zohman in an lei nawn lo.

¹⁴Sumtuah pawl in cu nuih hnenah, “Nei ningla tiih saduh na thahmi thil ṭha hmuahhmuah an hloral ṭheh zo; na lennak le na sunlawinak kha an cem thluh zo ih ziangtik hmanah na ngah sal nawn lo ding,” an ti.

¹⁵Cutawk khawpi sungah sumtuah tahratih a lianmi pawl in a tuarnak sungih tel ve pang ding an ṭih ruangah hlatzet ah an ding ding. An riahsia in an ṭap ding ih,

¹⁶“ṭihnungza a si! Tuksumza a si! Babilon khawlipi cu! Patzai in tahmi puanrang, sendup puan le puan sen in a rak thuam aw ṭheu ih sui hlawnthil le lungmankhung le tikep lungmankhung in a cei-aw ṭheu a si.

¹⁷Asinain nazi pakhat sungah a hlawnthil hmuahhmuah cu a cemral ṭheh a si,” an ti ding. Tangphawlawng mawngtu bawi pawl le lawng a totu mi hmuahhmuah, lawng hnaṭuan pawl le tidai parih pumcawmnak a hawltu hmuahhmuah hlapi ah an ding ih,

¹⁸khawpi a kangnak meikhu an hmuh tikah, “Hi khawlipi bangtuk khawpi ziangtik hmanah a um dah lo,” tiah an au.

¹⁹An lu ah leivut phulh aw in an ṭap an raak ih, “ṭihnungza le tuksumza a va si so, hi khawpi hrangah cun! Tangphawlawng a nei ih ti parah sum a tuahtu hmuahhmuah cu hi nunau ih lennak thawngin milian ih an cannak khawpi a si. Asinain nazi pakhat sungah a neihmi hmuahhmuah a cemfai ṭheh a si!” an ti.

²⁰Maw van, Babilon a siatral ruangah na lungawi aw! Maw Pathian mithiang pawl, tirhthlah pawl le profet pawl, lungawi aipuang in um uh! Ziangahtile nan parih a thiltuahmi ruangah Pathian hnen ihsin cawhkuan a tong zo.

²¹Cule a cak zetmi vancungmi pakhat in lungto pakhat, fang rialnak lungtlep tumpi tia khi a khai ih tifinriat sungah a vun hlon ih, “Hi bangtuk in Babilon khawlipi cu vuakthlakmi bangin hlon a si ding ih zohman in an hmu sal nawn lo ding.

²²Babilon khawlipi ṭingṭang tum thawng le minung awzai, phirivau tum thiam pawl in phirivau an tum thawng le tawtawrawt tum thiam pawl ih an tawtawrawt tum thawng cu na sungah a thang nawn lo ding. Ziangbangtuk hnaṭuan a si khalle hnaṭuantu na sungah an um nawn lo ding. Fang rial awn thawng na thei nawn lo ding.

²³Ziangtik hmanah na sungah mei-inn a vang nawn lo ding. Nupi ṭhi tlangval aw siseh mothar aw siseh na sungah a leng nawn lo ding. Na sungih sumtuahtu pawl cu leilung tlunah huham nei bik an si, sikhalsehla na dawithiamnak in leilungtlun mi hmuahhmuah cu na bum ṭheh a si,” tiah a ti.

²⁴Profet le Pathian mithiang pawl ih thisen a sungih a luan ruangah Babilon cu hrem a tong zo. A si, leilung tlunih thah a tuartu pawl ih thisen cu hi khawsungah a luang a si.